1 Ardi Muuse koobatenaa'ni dirrebaangi lumoxxa yanna tureexxa uude'e Aaroonii'i oddote'ni buqeexxi «Gibtseke boganaa'ni no'oo aadhe fulchemmaki iikki Muuse hiyyemaaki manjichchi maa kadeexxa egennebe'non; tennexxee no'o edo me'a'ni akeekaaka magenuwwa giissi» hiyye.✝

2 Aarooninna «Are ha'nooxi, labbaxinna meyyaxi oose ha'nooxi manshate'ni uggudhdhiteeka worqetika seesa duuchcha, bukki assitine anibaa idagge» hiyye.

3 Tennexxee duuchchingi ifi ifixxa manshatixxa worqe duuchcha fulcheexxi Aaroonibaa iyyedange. 4 Isinna manshatixxa worqe duuchcha aadheexxi giirate'ni baqqaashsha asse; baqqeexxa worqenna jabbichchiinxe fakke asse giisse.

Ardikinna weli'aanni weli «Isira'eelike arda! Gibtseke boganaa'ni no'oo fulcheeki mageni no'oki konnete» hiyye.✝

5 Aarooninna worqetike jabbichchi edo tolchimalcho giisse, «Soodo Duuchchi Woddika Gootta ulfeesatike ayyaanan» hiyye kule. 6 Langaxxa barra manni gorsanni ke'eexi ciincatike tolchikanna mittoomiinke tolchika hore aadhe iyyedage tolche; ardikinna ito'aanna ha'wo'a ofo'le; ite ha'we goddeechchi uduma sirba'ni afeeshshanni kadate'ni ke'e.✝

7 Duuchchi Woddiki Goottinna Muuse'e, «Gibtsee'ni fulchitetteki ardi atiki cubbo hujee anee gibee'en; rakke dirrite mari; 8 Ardi ajaja anka waalle'en; worqe jibbichchiinxe fakke'ni giissexxine ise'anna sagadde; tolchakanna isi'a tolchineexxi ‹Gibtseke boganaa'ni fulcheeki mageni konneten› hine'en. 9 Kunni ardi hittee qico godoba jabake manna kadeexxa ege'neennen; 10 Ta'a yooni insa'ne'ni mufate insa'nee bironnaa'a ke'eennen anee waali hitoxxe; ateenna atixxa ila lumoke arda assanon» hiyye.

11 Muuse kinni Duuchchi Woddika Gootta isika Mageno magannisa'ni, «Duuchchi Woddike Gootta ballo! Lumoxxenna jabaxxe hunna atixxenni Gibtseke boganaa'ni fulchitetteke arda atike'ni mayee mufattatto?✝ 12 Gibtseki ardi ‹Adana Mageni arda ifika Gibtseke boganaa'ni fulcheechchi koobate'ni shiye biro'aate› hiyyaashsha mayee assitaatte? Maganneten mufattoxxeni waali; iitta hexxeexa elobaaxxa arda atike'ni iyyedaggoxxe'e. 13 Erganjuwwa atika Abirihaamii, Yisaaqiinna Ya'iqoobii hedi; horte insa'neexxa iimixxe urjeshsha bira sa'issitotta'aanna uutotta'a addachchiissetteka boga duuchchi woddi'a geegoke assite uutotta'a jijjiirendabaaxxa kako aaggettaxxa hedi.»✝ 14 Tennexxee Duuchchi Woddiki Gootti mufe waale'e insa'ne'ni iyyedagammaxxa elobaaxxa yaane sa'isse.

15 Okkoo'ni Muuse lamii darre'ni tommi ajaji itti borreessemeexxa lame kino aadheexxi koobatenaa'ni dirre. 16 Tinni kino Mageni umi isingenninni giissee tommiinga ajaja itti borreesseexxen.

17 Iyyaasunna ardiinka canca laqeexxi Muuse'e, «Laqi olla'i giddo lolake hedheeni» hiyye.

18 Muusenna,

«Kunni lanqaanneki injifachchotike hafuuraban;

Injifatemeeke mannixxe oodhishshabaan;

lanqeennek canci sirbiinken» hiyye hiisse.

19 Muusenna olla'iinba shikki hiyye worqetika jabbichchonna sirba ardiinka uudee wodda lumoqico aare; aadhe dageexxa tommi ajaji itti borreessemmeexxa kino koobati hunda darbe butuchche. 20 Inisa'ne giissineemmaxxa worqetike jibbichchixxa fakke baqqaashsha asse; daye bulleessenna wodi'iki bulbuleexxi Isira'eeliki ardi ha'waashsha asse. 21 Muuse Aaroonii'i «Iitta hexxeexxa a'urteexxa cubbo ardi hujaashsha assitettengechchi, ardi atee maa assammalete?» Hiyye.

22 Aarooninna, «Ane'ni aartoxxen; ardi kunni hittee qico fuggoxxa assa eeyyaxxa atinni egendeetten; 23 Insa'nenna ‹No'oo Gibtseke boganaa'ni fulchemmaki ikki Muusete hinaaki manjichchi maa kadeexxa egennebe'non; tennexxee amo edo me'a'ni no'oo akeekaka mageno no'o'a giissi› hine. 24 Aninna worqetika seesa insa'neeka fulchitine iyyedangaashsha kulennen; insa'nenna ifi ifika seesa duuchcha fulchine iyyedangeen; aninna seesa iyyedangemaka giira giddo darbenne wodda tinni jabbetixxi fakke fuldeen» hiyye.

25 Ardi naapha ifiki edo salphato'a ifi galaashsha Aarooni wocci asseexxa Muuse afe. 26 Tennexxee olla'i giddi'a e'yinammaxxe hula'ni uurre «Duuchchi Woddike Goottixxe gamo kadeeki duuchchi anibaa dagowwaal!» Hiyye hafuura gikki asse haaso'e; Leewwito duuchcha isike qarqara'ni bukki hite; 27 Isinna «Mitti mitti ha'nooki wolaantichcha ka'litine tenne hulabaa'ni elqixxe hula qico'ni mammaremme; mitte hila belo dayyuwwa ha'nooka, jaaluwwa ha'nookanna ollalcho ha'nooka shiltinaashsha Duuchchi Woddiki Gootti Isira'eeliki Mageni ajaje'en» hiyye. 28 Leewwitotinna Muuse ajajamashshanni muuxe; eettene barra ardi giddii'ni laqe sase kuma geyaaka manna shilte. 29 Ookkoneechchi uduma Muuse Leewwitto hiyyee qici, «Telcho oose ha'nooxxanna dayyuwwa ha'nooka shiyati Duuchchi Woddike Gootti'a qeesummati ergatendino'a umo ha'nooka woyyoonsitine'een; Duuchchi Woddike Goottinna ha'noo eebbise'een» hiyye.

30 Langa baro Muuse Isira'eelika manna «A'urteexxa cubbo hujjine'en; yaane kinni ta'a illee iima wirri hiyye Duuchchi Woddiki Gootti leellammaxxe koobabaa higaannen; aki magaadda cubbo ha'nooxxa Duuchchi Woddiki Gootti gattowwaal hiyyaaxxe hexxeen» hiyye. 31 Muusenna Duuchchi Woddike Goottibaa hige «Kunni ardi ati edo hara a'urteexxe cubbo huje'en; worqeti wele magenixxa fakke giisse iseenna magenooffateen; 32 maganneten cubbo insa'neexa gattowwaal hiyyi; gattowwaal hiyya gophphaattoole atike ardika summa borreessiteettebaa'ni summa anka balleesi» hiyye.✝

33 Duuchchi Woddiki Goottinna Muusee, «Borreessenneka summa balleessaanneki cubbo hujati anee mufachchiiseemmake ardike summan. 34 Ta'a yooni me'i; kulennake boonchibaa arda akeeki; erganna anxi ati edo me'ita'ni akeekkaaxxa qalli hiyyi; yaane kinni arda konnee cubbo hujeexxee xixannoxxi barra daggebaaki gattabaan» hiyye.

35 Ardi Aarooni worqetixxe jabbexxe fakke'ni giissaashsha uttiseemmaxxee Duuchchi Woddiki Gootti ardake'ni jabaka dhukkuba ibise.