1 Isira'eelike ardixxi tuutta duuchcha Siinaxxe qiilla gammoojjena'ni Duuchchi Woddik Gootti insa'nee ajajemmashshanni mitte bakkanaa'n wele bakkabaa me'ineexxi Raafedimi qecence ofolle; yaane kinni ardi ha'waak wode'i hedhemmabaan. 2 Tennexxe «Ha'winannoka wode'e no'a uwwi» hiyya'n ardi Muusee lole.

Muusenna, «Anee mayee lolidina? Maye'a Duuchchi Woddika Goottanna mayee hega uuddina?» Hiyye.

3 Yaane kinni ardi ookko dheeboteemmaxxee «No'onna oose no'ooxxanna hore no'ooka dheeboti mundannoshsha mayee no'o Gibtsee'ni fulchitette?» Hina'ni Muuse'ni adhumme.

4 Muusenna «Konne arda'n maa assanno? Kunniixxi anee cancanqo'aten» hiyya'n Duuchchi Woddike Goottibaa raare.

5 Duuchchi Woddiki Goottinna Muuse hiyye hiisse haaso'ee qici, «Isira'eelike ardike akeekisanjuwwinaa'n aadhi; ardakenaa'ninna edi'a saxxe me'i; Abbaayike galaana gandetaxxa siqqo anga abixxi. 6 Kunse ani ookko Koorebixxe rassa'n ati edo uurannon; atinna rassa gandaton ardikinna ha'wo'a wodi'i isenaa'n fulaan.» Tennexxe Muuse Isira'eelike ardike sooresuwwi edo tenne asse.

7 Isira'eelik ardinna hiyyee qici: «Duuchchi Woddiki Gootti no'inni hedheemo hedhebaa?» Hiyya'ni adhumemmaxxenna Duuchchi Wodika Gootta hega uundemmaxxe'e ookkone booncho Maasahinna Meriibate hiyye summa fulche.

8 Amaaleqito daggeexxi Isira'eelito Raafidiimi lolde. 9 Muusenna Iyyaasuu «No'oke manninaa'n mellitettexxi Amaaleqito lolatee fuli; aninna soodo Duuchchi Woddike Goottixxa siqqichcho abixxennexxi ookkone tullichchixxe xungo hana uurrannon» hiyye. 10 Iyyaasunna Muuse isoo ajajemmaashsha Amaaleqitotti lolme; Muuse, Aarooninna Huuri ookkonee tullichcha qabante xungote'n sa'ne. 11 Muuse anga ifixxa iimi'a diriirsaa wodda Isira'eelito injifatta'emman; anga ifixxa butti'a hissedhdhaa wodda kinni Amaaleqito injifatta'emman. 12 Muusexxi anga gophphaa wodda Aarooninna Huuri kinjo aa'neexxi isi hunda ugginee'na'a isinna kinji hana ofo'le; Aarooninna Huuri mitti kayyii'n mitti elqee'n he'neexxi anga isixxa kinphe; tinninna arishsho aaggaa qico'ni anga isixxi jabaatteeshshanni hexxo'aten. 13 Konnee qicinni Iyyaasu Amaaleqitootika lolinka manna wolaantichchik injifate.

14 Ookkoneechchi uduma Duuchchi Woddiki Gootti Muuse hiyyee qici: «Ani Amaalqitootixxa qalli hiyyensha buttatenaa'n hara balleessannaxxee'e tennee qalli hite maxaafake'n borreesi; Iyyaasunna isee laqeexxa wo'me»✝ 15 Muusenna tolchimalcho ijaareexxi summa isikanna Duuchchi Woddiki Gootti anke baandiran hiyye summa fulche. 16 Isinna «Anga iimi'a Duuchchi Woddike Goottixxe mootebaa diriirtemmaxxee* Duuchchi Woddiki Gootti Amaaleqito ilatenaa'n ilati qico'ni lolaan» hiyye.