1 Muuse Isira'eelika arda ye'e bukki asseexi «Muuxxinaashsha Duuchchi Woddiki Gootti uwweeki ajaji konneechchi butta hedheekeeran; 2 Huje hujjinaaxxa jaane barra affine'en; torbaxxi barra hafuura adhdhitinaashsha Duuchchi Woddike Gootti'a woyyitte barran; tenne barra'ni huje hujaaka manjo shinnaan;✝ 3 Tennexxee torbaxxe barra'ni mine ha'nooke'ni giiranda ha'ilshitinoqqe'e» hiyye.

4 Muuse Isira'eelika arda duuchcha «Duuchchi Woddiki Gootti ajajeexxi konneechchinni butti'a hexxeexxen: 5 Duuchchi Woddike Gootti'a uwwa idagge; mitti mittingi manji uwwa idago'a haseeki mitte godobinni haseeqico worqqe, birretika sibiljo yookaan naasetika sibiljo, 6 iimatixxe bifanni, haamiraawite hinaaxxe bifanninna diimmoxxe bifanni cuunpheexxa gedhebiinxen yookaan re'etixxe ordani giissineexxa seemma, eloxxa layino, 7 diimmoxxe bifa'ni cuunpheeka gedhebiinka goga, hallinseexxa ka'le, waaccotika haqichcho, 8 xassakee kaddaaxa ejeersiinxa zayite, hariirtetixxe zayite giissateenna fishshaaka ixaana giissinaaxxa shuutta shufuro, 9 Qeesetinke sooressixxe efuudi hiyyendaaxxe seemmaxxe kiise'ni ugginaaxxa megiriidi hiyyemaaka fiixeeka kinjonna wele seesa iyyedangowwaal.

10 «Ha'nooxe oddo'ni ogetixxe hujeka beekkuma afeeki manji duuchchi Duuchchi Woddiki Gootti ajajeeka miya hujaashsha dagowwaal: 11 Dunkaanetanna giddi gadhika isika buyyisanjo, elqe kayya abidaachcho, danqarisanjo, utuphanna lekkuwwa isixxa, 12 Kakotixxa Saaxine, dukatika haqichcho, Taabotiinka buyyisanjo, Taabota gollinaaka golo, 13 Beera, isoo dunkaaka haqichchonna isika miyuwwa duuchcha; ittani woyyitte midhatixxa kebbo, 14 torbaane dhankoka xassanna isika miya, isixxe zayitenninni, 15 ixaana gunbaachchonna isoo dunkaachchinn welti, hariirtetixxa zayite, eloke foolika ixaana, seemmatike fooqixxe hulaka golo, 16 tolchakee qephphi assine giissineke tolchimalcho'ni naasetika sibiljo, isoo dunkaaka haqichchonna isika miya duuchcha, ansheccatixxa qorenna iseka ofo'lisanjo, 17 wuddummetika goluwwa, uphuwwanna lekkuwa, wuddummetixxe hulaka golo, 18 afenshatik dunkaani'aanna wuddummetee'e kadaaka chikaalanna utuphuwwa chikaaliki welti abidisaaxxa wodaro, 19 qeesee woyyichcha booncho'ni ergatendaa wodda oddo'witaaxxa seense giissineexxa danchallamma seemma, Aarooni'aanna isixxe oose'a woyyitte seemma gannowwaal» hiyye.

20 Ookkoneechchi uduma Muuse haaso'a bire wodda Isira'eeliki ardi me'e; 21 Duuchchi Woddiki Gootti ulfinniki leellammaka dunkaana giissate mitti mittingi godobik hedeechcho Duuchchi Woddike Gootti'a iyyedage; magenooffachchotike boonchi'a hasissaaxxa yaanenna qeesetixa seemma giissatee kadaachcho iyyedange. 22 Uwwa idagate haseeki meyyakinna labbaki duuchchi goobixxa worqe, manshatixxa worqe, angatixxa qube, worqetika haachchabuwwanna duuchchinga worqetika seesa Duuchchi Woddike Gootti'a lele'misatike tolcha assine shiqinshe. 23 Eloxxa layino, iimatixxa bifa, hamiraawwete hinaaxxa bifa, diimmoxxa bifa re'etixxe ordani giissineexxa seemma, diimmoxe bifa'ni cuunpheeka gedhebiinka goga, ittanni hallinseexxa ka'le iyyedange. 24 Birretikanna naasetika sibiljo idagate dande'eeki duuchchi Duuchchi Woddike Gootti'a idage; heene huje'aanna kadaaka waaccotika haqichcho afeeki duuchchi idage. 25 Ogetixxe hujeka beekkuma affeexi melaalle eloxxa layinonna iimatixxa bifani, hamiraawwete hinaaxxa bifani, diimmoxxa bifaninna horiinxe ordani giissineexxa seemma idagge; 26 ittani re'etixxe ordani ganneexxa wodaro giissite. 27 Akeekisanjuwwikinna efuudi hiyyendaaxxe seemmaxxe kiise'ni ugginaaka meregidi hiyyemaaka fiixeeka kinjonna wele seesa, 28 xassinxa zayite, hariirtetixxa zayite giissatee, iittani eloka fishshaake foolika ixaana giissinaaxxa shuutta shufuro iyyedange; 29 meyyakinna labbaki Isira'eeliki ardi duuchchi Duuchchi Woddiki Gootti Muuse hujaashsha ajajeexxe huje'a kaddaaxxa yaanuwwa Duuchchi Woddike Gooti'a uwwa idage.

30 Ookkoneechchi uduma Muuse Isira'eelika arda hiyyee qici: «Duuchchi Woddiki Gootti Yihudake mininaa'ni Huurika akka'o, Uurika belto Baatsila'eelii fi'leen; 31 heneenna ogetixxa huje hujaashsha Mageni ege'na, dande'anna galchecca iittanni hunna ifixxa isi'a uwwe'een. 32 Beekkumiki mise yaane giisina qico hede qixxeessa, iseenna worqeti, birretikenninna naasitke sibiljinni seesaashsha, 33 fiixeeke kinjuwinni seesa giissateenna haqichchiinka seesa giissatee, ittanni wele ogetixa huje hujatee dande'a uwween. 34 Isi'aanna Daanike mininaa'ni Ahisaamake belti'a Oholi'aabi'aanna ogetixxe hujeka beekkuma welekee barachchiisatixxa dande'a uwweemmani. 35 Baqisatixxa, mise yaane giissendaaka toora kulatixxa, eloxxe layinoni, iimatixxe bifanni, hamiraawwi hiyyendaaxe bifaninna diimmoxe bifa'ni cuunpheexxa horiinxa orda, weli seemma ganaake mannini giisseexxe yaane duuchcha'ni seesa giissatixxa dande'a Duuchchi Woddiki Gootti insa'ne'a uwwe'en; insa'nenna heneenna ogetixxe hujeka beekkumanna mise yaane giissinaaka toora fulchatixxa dande'a anfeemman.