1 Ookkoneechchi uduma Duuchchi Woddiki Gootti Muuse'e hiyyee qici: «Atinna Gibtseke boganaa'ni akeekke fulchitettaki ardi duuchchi tenne baakkanaa'ni kexxine Abirihaami'a, Yisaaqi'aanna Ya'iqoobi'a ittanni horte insa'neexxee'e uwwonna'a kako aagennake bogiba me'e.✝ 2 Ati edo me'ittaaxa erganna ergannon, Kenaanika, Amooraka, Hiititotika, Feeriizitotika, Hiiwaatotikanna Iyyaabusitotika arda ati edii'ni shorrannon. 3 Martina'neek boginna shamokenna ba'laken; yaane kinni ha'noo godoba jabake manna kaddinemmaxxee orake'ni ha'noo birabe'noshsha ha'nonni welti me'abe'non» hiyye.

4 Ardikinna tenne laqee wodda lumoshsha yaade; langaxxa seesake hinaaxxa yaane uggudhdha waale. 5 Duuchchi Woddiki Gootti Muuse'e ardake'ni «Ha'no godoba jabake mannan; shiixxoxxe yanna'aanna ha'nonni me'onnole ha'noo mitti gattinebaangi birannon; ta'anna seesa ha'nooka uggudhitinoqqen hoyye; maa assannoxxa ta'anni murannon» hite kuli hiyye ajaje. 6 Tennexxee Isira'eeliki ardi Siinaxxa kooba waale me'eexxe yannanaa'ni seesake hinaachcho uggudhdha waale.

7 Isira'eeliki ardi mare geyeeba duuchcha Muuse dunkaane olla'akenaa'ni bayyisee otaamman; isinna «Duuchchi Woddiki Gootti ulfinniki leellaake dunkaana» hiyye summa fulche. Duuchchi Woddika Gootta qodhdhatee haseeki duuchchi okko'a maraamman. 8 Muuse ookkone Duuchchi Woddik Gootti ulfinniki leellaake dunkaanibaa me'aa wodda mare e'yaaxxee'e ardi ifi ifinge dunkaanixxe hula'ni uurree uudaamman. 9 Muusenna ookko'a e'yeechchi uduma duumanchi dagee dunkaaniinxe hula edo uurraan; Duuchchi Woddiki Goottinna duumanchi giddii'ni Muuse haasossaamman. 10 Ardikinna duumanchi dunkaaniinxe hula'ni uurree'na uuda wodda ifi ifinge dunkaanixxe hula'ni guluffatee magenooffataamman. 11 Manji ifike jaalinni haaso'ammashsha Duuchchi Woddiki Gootti Muuse haasossaamman; ookkoo'ni Muuse olla'i giddi'a higaamman; yaane kinni isoo qarqaaraammaki qee'lichchi Neweki belti Iyyaasu dunkaanibaa'ni gophemaammabani.

12 Muusenna Duuchchi Woddika Gootta «Ookkone bogibaa arda konne akeekannoshsha ajajeettan; yaane kinni aninni welti ayyee ergitaattexxa kuldeboxxon; anee egendeettexxanna ane'ni gammadeettexxa kuldeetten; 13 ta'anna tinni dhugaate kaddoole, ati'a ergatemate'ni itti jabaatonnaanna atee gammachchiisonnaa'a ati heddettexxa ane'ni kuli; kunni ardi atike arda kadaashsha fi'litetteke kadeexxa kassi hiyyi» hiyye.

14 Duuchchi Woddiki Goottinna «Ani atinni welti me'annon; injifattattoshshanna assannon» hiyye.

15 Muusenna «Ati no'onni welti me'a gophphaattole kone boochonaani me'inonna'a no'o waaldoxxe'e; 16 Ati no'onni me'a gophphaattole ati no'o'ni gammaddeettexxa manni hitta ege'natee dande'a? Buttate'ni hedheeke ardanaa'ni no'oo gargar hiissitaaxxi atixxe no'onni hedhan» hiyye hiisse.

17 Duuchchi Woddiki Goottinna Muuse «Ani atee ege'nennaxxeenna ate'ni gammadaannaxxee hitettexxa duuchcha assannon» hiyye.

18 Muusenna «Maganeten, atika ulfiinnika ifina uudannoshsha assi» hiyye.

19 Duuchchi Woddiki Goottinna «Ati edii'ni sa'annon; atinna ani hittee qico eloxxa assaannekenna elaanneke kadennexxa uuddatton; aninna woyyichcha summa anka lassannon; ani fi'lenekee shaqqunte anxanna arjunte anxa leellishannon.✝ 20 Yaane kinni alba anka uude gataaki hedha gophemmaxxee alba anka uuddotta'a waalabe'non, 21 Ookkoneechchi uduma kaba ani bira kinjoke'ni uurritattoxxi bakka hexxeen. 22 Ani anke ulfinike ifinninni sa'anno wodda kinjiinke baqaqa'ni atee uggannon; sa'anno qico'ni anga anxenni ille atixxa buqannon; 23 Ookkoo'ni anga anxa hoyyedhannon; atinna alba anke kadebaaki dudduro anka uuddatton» hiyye.