1 Duuchchi woddik Gootti Muuse'e hiyyee qici: «Ani atee Feri'ooni'a Magnoke assannon; dayyi atik Aarooninna atike waabeekichcho kadaan. 2 Ani atee ajajannoxxa duuchcha haassotatton; dayyi atik Aarooninna Isira'eelika arda boga isikenaa'n fulo'a wocci assaashsha Feri'ooni'n kulaan. 3 Yaane kinni Ani Feri'oonixxa qalbe jabeessannon, heddo mambe'a beessisuwwakanna masuwwa Gibtse'ni assonnolenna midde,✝ 4 ha'no hitinaaxxa Feri'ooni laqabaan; ookkonechchi uduma anxe anganni Gibtsee ganannon; anke jabake xixichinni anka sannachcha Isira'eelika arda Gibtsee'ni fulchannon. 5 Anga anxanna Gibtsee'ni wirri assennexxi Isira'eelika arda ookkoo'n fulchanno wodda Gibtseki ardi ani Duuchchi Woddike Gootta kadeennexxa ege'naan.» 6 Muusenna Aarooni Duuchchi woddiki Gootti isna'nee ajajemmashshanni assine. 7 Muusenna Aaroon Feri'oonii yaansiseemmaxxa yanna Muuse saddeeta tomme wogga manjomman, Aarooninna saddeeta tommenna sase woggake manjomman.

8 Duuchchi woddik Gootti Muusenna Aarooni, 9 «Feri'oon ‹Mambe'a asse ha'noo hiyyaa wodda›, atinna Aaroonii ‹siqqichcho atixxa aaxxettexxi Feri'oon edo wocci assi› ookkonechchi uduma siqqichchotinna bofake kaddaan» hiyye. 10 Tennexxee Muusenna Aarooni Feri'ooniba marreexxi Duuchchi woddiki Gootti ajajemmashshan assine. Aarooninna siqqichcho ifixxa Feri'ooni edonna isike ja'laabuwwi edo butti'a wocci assee'naa bofake kadde. 11 Feri'ooninna beekkoletanna gojaameeyye ye'e; Gibtsexxi gojaameeyyenna gojo ifixxenni iitta assite. 12 Insa'ne mitti mittiniing ifi ifixxa siqqichcho butta wocci assee wodda bofake kadde; yaane kinni Aaroonixxi siqqichcho insa'neexxa siqqo liqiinste. 13 Kaddo malee Feri'oonixxi qalbe jabaatte; Duuchchi Woddiki Gootti haaso'emmashshanni insa'ne hineexxanna laqeba'a.

14 Ookkonechchi uduma Duuchchi woddiki Gootti Muuse'e hiyyee qici: «Feri'oon godoba jabaate'e arda wocci assa gibe'een. 15 Tennexxee gorsa soodimaro moyanjo Feri'ooniba mari; isi Abbayike galaanibaa dirraa wodda bofiibaa jijjiirendeemmaxxa siqqichcho aabiddetexxi galaani qarqara uurite isoo heqqi. 16 Ookkonechchi udumanna isoo hitatto qici: ‹Duuchchi woddik Gootti Ibritotiki Mageni: Ardi ank qiilla gammoojje giddo anee magenoofato'a wocci assitattoshsha atibaa anee ergeen; ati kinni ta'i qico'ni laqqebexxo. 17 Duuchchi Woddiki Gootti hiyya'nee qici: Assannoxxe yaanenaa'n kexxeexxa ani Duuchchi Woddike Gootta kadeennexxa egendatton: Tinninna anga abixxeennexxe siqqichonni kunse Abbayika galaana ganannon; wodi'ikinna mundete'n jijiiremaan.✝ 18 Ookkone Galaani giddo hexxeexxi qulxu'muwwanna rertaan; iikki Abbayik galaaninna bobaan. Gibtseki ardinna ookkone wodi'inaa'n ha'wa dande'abaan.› »

19 Duuchchi Woddiki Gootti Muuse hiyyee qici, «Aaroonii ‹Siqqichcho atixxa aaxxettexxi Gibtseke wode'uwwa'n tinninna muummuwwate'n, dareeruwwake'n baleesuwwake'ninna wode'e ca'matike gonguwwa'n anga atixxa diriirsi› hite iso'ni kuli; mundetibaa jijiiremaan. Gibtseke bogi giddo duuchcha haqqetanna kino bonce wode'e ca'matee giisineeke miyuwwi giddinna gatebaang Gibtsek bogi giddo kinjiinke wode'e ca'matike miya duuchcha'n munde booncho booncho'ninni kadaan» hiyye.✝

20 Muusenna Aarooni Duuchchi woddiki Gootti insa'ne ajajeemmashshanni assine; Aarooninna Feri'ooni edonna isike jalqaabuwwi edo ifixxa siqqichcho qophphi asseexxi galaaniinka wode'e gane; wodi'i duuchchinna jijiireme mundete kade. 21 Galaani giddo hexxemmaxxi qulxu'muwwa rerte; Abbayike galaani bochchokenaa'n kexxeexxa Gibtsek manni galaaniinka wode'e ha'wa dande'eba'a; Gibtseke bogi giddo duuchcha munde hexxemman. 22 Ookkonechchi uduma Gibtseke bogixxi gojaameeyye ifixxe gojjonni tenneenni assine; Feri'ooninna qalbe jabeessedhe; Duuchchi Woddik Gootti hiyyeemmashshanni Muusenna Aarooni hineexxa laqeba'a. 23 Feri'ooninna ifike moottummatike mine'n illee iima higee malee tennee yaane mittechchishshanna laakko'ebaan. 24 Gibtsek ardi duuchchinna Abbayike galaanika wode'e ha'watee dande'a gopheemmaxxee wode'e la'oonfante'e ookkone galaanike qarqara'n bale ume.

25 Duuchchi woddiki Goottinna ookkonee galaana ganeexxenni torbaane barra saxxe.