1 Tolchimalcho waaccotike haqichchinni qephphi asse giisse; isinna shoole kasa afeeke, qeerrinni 2 meetirenna 20 santi meetire, godobi 2 meetirenna 20 santi meetire, hojja 1 meetirenna 30 santi meetiremman; 2 Tolchinke shoolinge kasa'ni cunnichchuwwa ugge duuchchinga naasetike sibiljinni bunqe; cunnichchuwwa tolchimalchik welti mitteba mitteke asse giisseemman. 3 Tolchimalchiinka miya, distuwwa, giira faanshaachcho, hubbuqqitte qore, ontaachcho affeexxa mooqqo, giira ha'inshaachcho naasetike sibiljinni giisse; 4 diddiqqa fakkaataachcho naasetiki sibiljinn giisse; isoonna tolchimalchiinxe hojjaka gamisa butti'a shikki asseexxi kifaafeti hunda ugge; 5 dulkinaaka haqichcho sikkinaaxxa shoole fanno giisseexxi shoolinge kasa'ni abidisse. 6 Dulkinaaka haqichchonna waaccotike haqichchinni giisse naasitke sibiljini bunqe, 7 tolchimalchiinke kasa'ni hexxeexxe fannuwwa'ni e'yishshe; tolchiinki boonchina raaphphetteti giissineeke kadeexxi oddo haanni hiyyeekemman.

8 Ansheccatixxa qorenna isee ugginaachcho Duuchchi Woddiki Gootti ulfinniki leellammake dunkaaniinxe wuddume'ni ergatendammaxxi melaalle iyyedaggeexxe daa'wituwwanaa'ni aa'neexxe nehaasenni giisse.

9 Woyyichcha dunkaanixxe hulaka golo eloxxe layinonni giisse; goluwwiinki qeerrininna bita'i darree'ni 44 meetiremman; 10 goluwwa kiphaaka lame tomme utuphuwwanna lame tomme lekkuwwa nehaasetike sibiljinni giisse; utuphuwiinxa hookkuwwanna zanguwwa birretike sibiljinni giisse; 11 Middi darrexxa wuddumme hujee qicinna bita'i darrexxa wuddume hunjee qici mittengemman.

12 Dhidhimii darree'ni 22 meetire qeerrinne afeeka goluwwa afeemman; goluwwikinna tomme lekkuwwa afeeka tomme utupha afeemman; utuphuwwikinna birretike sibiljinni hunjeexxa hookkuwwanna zanguwwa afeemman. 13 E'yinaaxxe hulaba boroti darrexxe wuddummeki godobi 22 meetiremman. 14 Hulate'ni hedheeki goli qeerrinni 6 meetirenna 60 santi meetiren, sase utuphi sase lekka afeemman. 15 Ittanni wele darre'ni wuddummetixxi hula kaba'ninna elqee'ni 6 meetirena 60 santi meetire qeerrinne, sase utuphi sase ifixxa lekka afeemman. 16 Dunkaantixxe hulake qarqara'ni hedheki goluwwi duuchchi giissemeeki eloxxe layinonitemman; 17 utuphuwwiinxi lekkanna giissendeeki nehaasetike sibiljinnitemman; hookkuwwa, zangetinna utuphuwwiinxa qacce buqaachcho giissineeki birretike sibiljinnitemman; qarqarake'ni hedheeki utuphuwwi duuchchi weli abidemeeki birretike sibiljinni giissineexxe zanguwannitemman; 18 dunkaani giddi'a e'yatixxe hulaki goli layino iimatixxe bifanni, hamiraawwi hiyyendaaxxe bifanninna diimmoxxe horiinxe ordanni, suqemeeke haare hiyyemaake shimalinni seense giissineekemman; isinna dunkaaniinxe hulake golishshanni qeerrinni 9 meetire, hojja 2 meetiremman; 19 shoole naasetike sibiljixxa lekka afeeke utuphuwwa'ni irkinseemman; hookkuwa, qacce utuphuwwiinxa bunqeemmakinna zange birretike sibiljinni giissineexemman; 20 Dunkaanetanna dalla'iinka utuphuwwa wodaroti dhinsaaka chikaala giissineeki nehaasetike sibiljinniten.

21 Muuseke ajajinni qeesichcho Aaroonike belto Itamaari hunda ergataamaaxxe Leewwitoxxi huje woyyichchi dunkaan giddika miya giissatee iyyedangeechcho duuchcha laakko'aatemman.

22 Yihudake gosatike mininaa'ni Huuriki akka'i Uuriki belti Baatsili'eeli Duuchchi Woddiki Gootti Muuse ajajemmashshanni duuchchiinxa yaane giisse. 23 Iisinni welti Daanike gosatike mininaa'ni Ahisaamak belti Oholi'aabinna sibilo baqisaake, mitte yaane hujaa qico leellishaake, iittanni eloxxa layino iimatixxe bifanni, hamiraawwi hiyyendaaxxe bifanninna diimmoxxe horiinxe ordanni gane giissaammake manjomman.

24 Woyyichcha seemmatike fooqixxe huje'a Duuchchi Woddike Gootti'a lele'misatike tolcha assine shiqinsheexxe worqexxi miki, ege'nendeexxe mike'ni minkee'na mitte kuma kiilo giraamamman. 25 Laakko'emeeke ardanaa'ni bukki assineeki birretiki sibilji, ege'nendeexxe mika'ni minkee'na sase kumanna shoole dhibbanna sase tomme kiilo giraamamman; 26 Isoonna laakkonne wodda borressemeeki manji duuchchi uuwweexxenni qixxete kaddaaxxemmani; mitti mittingi uwweeki ege'nendeexxe mika'ni laqemeeshshanden; arda laakkonnee wodda borreessemeeki lame tomme woggakenna lame tomme wogganni iimi'a hedheek 603,550 labballomman. 27 Birretike sibiljonaa'ni sase kumanna shoole dhibba kiilo kadaaka woyyichcha galmi'aanna goliinke utuphi'a kaddaaxxa dhibba lekkuwa giissine; eettene mitte mittende lekka'a 34 kiilo giraama kadaaka birretika sibiljo murreemman. 28 Gateeke 30 kiilo giraaminni Baatsili'eeli utuphakee zange, hookkotanna utuphiinxa qacce bunqaachcho giisse. 29 Duuchchi Woddike Gootti'a lele'misatik tolcha assine uuneeki nehaasetiki sibilji lame kumanna shoole dhibbannaa lame tommenna onde kiilo giraama kadaakemman; 30 Dunkaanibaa e'yatixxe hulaxxe wuddummeke utuphixa lekka, tolchimalchi diddiqqatishsha hedheechcho, tolchimalchii'a kadaaka miya duuchcha nehaasetike sibiljinni giisse; 31 Qarqara ookkone'ni hexxeexxe wuddummekanna wuddumetixxe hulake utuphixxa lekkuwwa, iittani dunkaanakanna dalla'iinka utupha wodaroti dhise abidaaka chikaala duuchcha naasetike sibiljinni giisse.