1 Isira'eelik ardi Gibtseke boganaa'ni fuleeke sakkake agenjixxe taakkaxxe barra'n Siina hiyyendaaxxe qilla gammoojje dange. 2 Insa'nenn Raafedimii'ni ke'neechchi uduma Siinaxxa qiilla gammoojjebaa e'yine; Isira'eelinna eettene qiilla gammoojje giddo koobati edo qececce'e ofolde. 3 Muusenna koobati hana qabate; Duuchchi Woddik Goottinna iso'o ye'eexxi, «Ya'iqoobixxe horte kadeeke Isira'eelika arda'n hitatto qici: 4 ‹Ani Duuchchi Woddik Gootti ha'no sinbriinke Gibtseke manna'n assenexxa, ha'nonna sinbiriinke keelinninna ba'edhennexxi ifibaa idaqqennexxa ha'no umo ha'noongenninni uuddine'een. 5 Tennexxee ani'a adda ajajendinoole, kako anxanna heqqexxinoole, gosa gosake ardi duuchchinaa'n ha'no ani'a mellendineeke ardan. Buutta duuchcha anxe kadde'naanni,✝✝ 6 Ha'no ani'a qeesoletixxe moottummanna Woyyichcha arda kaddinaan› Kunni Isira'eelike arda'n haasottattoke hiyyichchon» hiyye.✝ 7 Tennexxee Muuse illee iima hige; ardinka akeekisanjuwwanna ye'eexxi Duuchchi Woddik Gootti ajajemmaka hiyyichchuwwa duuchcha insa'ne edo haaso'e. 8 Ardi duuchchinna mitteba, «Duuchchi Woddik Gootti hiyyeexxa duuchcha assannon» hiyye. Muusenna konne ardi hiyyeeka hiyyichcho Duuchchi Woddike Gootta'n geessise.

9 Duuchchi Woddik Goottinna Muuse, «Ani atinni welt haaso'anno wodda ardi ani hiyyaanexxa laqatinna duuchchi woddi'a atee amanaa insa'nexxa heene yanna'ninna ate'ni uggudhinaashsha jabake duumanchinni atiba dagannon» hiyye. Ookkoneechchi uduma Muuse ardi hiyyeexxa duuchcha Duuchchi Woddike Gootta'n kule. 10 Duuchchi Woddik Goottinna Muuse hiyyee qici, «Martettexxi telchonna soodo arda qulloons; seemma ifixxanna borcedhdhowwaal. 11 Sakka baro Duuchchi Woddik Gootti ardi duuchchixxe ille edo Siinaxxe kooba hana dirra'emmaxxe eettenne barra'a ardi qophpheefatowwaal. 12 Koobatike qarqara duuchcha'n gabala giissite insa'nee ‹Heqqedhdhe kooba tenne hana qabattinoqqe; yookaan hundika kasa isekanna tuqqinoqqe'e; ayyinna kooba tenne tuqoole shiyemaaxxi barrate. 13 Isi kinjik cancaqemaan; yookaan mogidik otemaan; ayyixxi anganna iso'o tuqqabaan. Manjokenna kadi hori lubbo uggabaa› eettene kooba hana qabantaak malagati ufuufemoole callan.»

14 Muusenna koobatenaa'n ardinba'a dirre; insa'neenna qulleense; insa'nenna seemma ifixxa borce'ne. 15 Muusenna arda «Sakkaxxe barra'a qophpheeffatte; dubartetiba'anna shiqqinoqqe'e» hiyye.

16 Sakkaxxa barra gorsa dindinsonna banqo, dimmi duumachinna jabak malagatink hafuurinna koobat hana kade; kaanbe giddo hedheek ardi duuchchinna culphise.✝ 17 Muusenna Duuchchi Woddike Goottinni afemo'a arda kaanbetenaa'n fulche; ardikinna eettene kooba hunda kasake'n uurre. 18 Duuchchi Woddik Gootti giirati itti hana dirremmaxee Siinaxxa kooba wiliille buqqe abidde'emman; isenaa'n wiliille boosii'n tuqu tuqu hitammaxxee wiliilsha tuqu tuqu hitaamman; iitti kooba duuchchanna fuggo girigiri hite. 19 Malagatiink hafuurinna hara leba'n me'e. Ookkoneechchi uduma Muuse haaso'e; Mageninna isi'a hiissichcho diindinsot hiisse. 20 Duuchchi Woddik Goottinna Siinaxxe koobaxxe xungo hana dirre; Muusenna eettene koobaxxe xungo hani'a ye'e; Muusenna qabate. 21 Duuchchi Woddik Goottinna Muuse'ni hiyyee qici: «Ardi Duuchchi Woddika Gootta uudate hunnatati heddi manni mudabaashsha dirrite martettexxi insa'nee xexe'achchiis. 22 Wele waalni Duuchchi Woddike Goottiba shiqqaaxxi qeesenna midde ifi qulleessexxowwaal; iitate kada gophphoole mufeti insa'nee ganaan» hiyye.

23 Muusenna Duuchchi Woddika Gootta hiyyee qici, «Ati umo atingenninni ‹Qarqara tenne koobake'n gabala giissitettexxi isee woyyoons› hitettexxi no'o'o xexxe'achchiissettexxenni kunni ardi Siinaxxe koobaba qabata dande'abaan» hiyye.

24 Duuchchi Woddik Goottinna iso'o, «Dirrite martettexxi Aaroonii'i aaxxe welt qabatte; qeesoletinna ardi kinni Duuchchi Woddike Goottiba qabatate hunnatoqqe'e; iitate kada gophphoole isi insa'ne mufet ganaan» hiyye. 25 Muusenna dirre mareexxi ardake'n haaso'e.