1 Muusenna, «Anee amana gonphoolenna, hiyyennexxanna adhdha gonpheexxi Duuchchi Woddiki Gootti ate'n leelleebaan hinoolennaa'a» hiyyeexxi hiisse haaso'e.

2 Duuchchi Woddik Goottinna iso'o, «Anga abixxiteettechchi maachcho?» Hiyye.

Isinna «Siqichchoten» hiyye.

3 Duuchchi Woddiki Goottinna «Butti'a wocci assi» hiyye; Muusenna siqqichcho butti'a wocci assee wodda siqqichcho bofake kadde; Muusenna isinaa'n baaje. 4 Duuchchi Woddik Goottinna Muuse'e, «Anga qeerrissettexxi eege isixxa abid» hiyye; Muusenna anga qeerriseexxi abidee wodda bofi anga isixxe'n higgeen siqqichchote kade. 5 «Tinni iitta kaddeechchi» Duuchchi Woddik Goottinna hiyya'nee qici, «Edike insa'neeke annuwwa Abirihaamik, Yisaaqikinna Ya'iqoobik Duuchchi Woddik Gootti Magen ate'n leelleexxa insa'ne amano'aaten» hiyye. 6 Duuchchi Woddik Gootti, «Anga atixxa boba giddo uggi» hiyye; Muusenna anga ifixxe boba giddo uggeexxi fulchee wodda soomote'e kaadetishsha gola'lite. 7 Duuchchi Woddik Goottinna, «Anga atixxa higgeenna boba giddo uggi» hiyye. Muusenna anga ifixxa boba ifixxi giddo uugeexxi fulchee wodda wirri hite isika biso labbe. 8 Duuchchi Woddiki Goottinna «Yoona atee amana gonphoole yookaan siretike mambe'iinka beessissixxa yaane laqa gonphoole langake beessissixxa yaane amannaan. 9 Konne lame beessissuwwa amana gonphoole yookaan hitettexxa laqa gonphoole kinni Abbaayike galaananaa'ni shiixxoka wode'e aaxxettexxi buttinake'n duni. Iikki galaanakenaa'n aaxxettek wodi'i buttinake'n mundete kadaan» hiyye.

10 Muusenna Duuchchi Woddika Gootta, «Anke Gootta edonna kadi ta'a ati anee erganjo atikenni haasottettelchi udduma haranga ani haasollichchakebaan. Ani loqoxaannekenna ca'a asse'e haaso'a dande'aabe'noke manjon» hiyye.

11 Duuchchi Woddiki Goottinna Muusee'e, «Manjokee'e afo'o dadeeki ayyete? Afo'o duuda yookaan mansha laqabaake, ille affaake yookaan balla'ake assaak ayyete? Ante Duuchchi Woddike Goottabaata? 12 Ta'a kexxe me'i! Ani atee haasottattoshsha assaannon; haasottattoxxanna ate barsiisannon» hiyye.

13 Muusenna «Koo Duuchchi Woddike Gootta maganneten, wele manjo ergi» hiyye.

14 Eettene yanna'n Duuchchi Woddike Goottixxi aare Muuse'ni bubbee'naa hiyyee qici, «Leewwichchi dayyi atik Aarooni hedheenni hedhebaa? Isi elooshsha haaso'aaxxa ege'neennen; matanga ta'a isi kunnise atiba dagate'n hedheen afendatton; atee uudaa woddanna qalbet gammadaan. 15 Atinna iso'n haasottettexxi haaso'aaxxa yaane afo'o isike'n uggitatton; lamiinga ha'no'o haasotinaashsha assannon; maa assitinaaxxanna ha'no'o barsiisannon. 16 Ati isike Mageno kadde'e iso'n haasottatton; isinna afo'a atika ardake'n haaso'aan. 17 Mambe'a beessisa isenni assitottaa tennee siqqichchonna anga abixxite me'i» hiyye.

18 Muusenna are ifixxika anna, Yetirobaa illee iima hige mareexxi iso'n, «Gibtse hedheek ank firi telchi qico'n hedhoti hedhoole maganneten mare uudo» hiyye. Yetironna «Nage'ik me'i» hiyye.

19 Muusenna Midiyaam giddo hedhee'naa Duuchchi Woddiki Gootti, «Atee shiyo'a hasa'emmak manni duuchchi reyemmaxxee'e Gibtse'a illee iima higge me'i» hiyye. 20 Muusenna are ifixxanna labbaxxa ifixxa oose adhdheexxi harrete'n gulufise Gibtsee'n illee iima higo'a ke'e; Mageniinxa siqqichchonna anga abixxeemman.

21 Duuchchi Woddiki Goottinna Muuse, «Gibtse'a illee iima hggatto wodda anga atixxe'n uwwenneka manbe'uwwa duuchcha Feri'oon edo assitattoxxa deetoxxe'e. Yaane kinni arda wocci assabaashsha ani qalbe isixxa jabeesannon. 22 Tennexxe Feri'ooni'nna hitatto qici: ‹Duuchchi Woddiki Gootti hiyya'nee qici: Isira'eeli anke angafa belton; 23 «Anee magenooffato'a belto anka wocci assi» hiyye'e ate'ni kuleennan; yaane kinn ati isoo wocci assa gibbeten; tennexxee ani atika angafa belto shiyannon.› »✝

24 Muuse ora me'a'n galeeba Duuchchi Woddiki Gootti isinni afemeexxi iso'o shiyo'atemman. 25 Yaane kinni Sipaara qaraxxa cabbe aaxxeexxi ifika belto jila offo'lishshe; woxxeemmake ifike beltike shoggorininna Muusexxa lekka kisseexxi, «Ati ani'a mundiinke waajubichchon» hite. 26 Tennexxe'e Duuchchi Woddiki Goottinna iso'o waale; isenna «Ati ani'a mundiinke waajubichchon» hiteemmak jila ofo'latixxeetemman.

27 Duuchchi Woddiki Goottinna Aaroonii'i, «Gammoojje qiilla giddi'a marte'e Muusenni afemi» hiyye. Aarooninna mareexxi Mageniinxe kooba'ni isinni afeme; isoonna sunqedhe. 28 Muusenna Mageni kulaashsha iso'n haaso'emmaxxa duuchchanna asso'a iso'o ajajemmaka manbe'iinka beessisuwwa Aarooni'n kule. 29 Ookkoneechchi uduma Muusenna Aarooni marreexxi Isira'eeli ardika akeekalluwwa duuchcha bukki assine. 30 Aarooninna Duuchchi Woddiki Gootti Muuse'n haaso'eemmaka haaso'a duuchcha insa'ne'n kule; manbe'uwwakanna ardi edo asse. 31 Ardikinna isoo amane; Duuchchi Woddiki Goottinna Isira'eelika arda to'ateexanna seldo insa'nexxa uudeexxa landee wodda kunbe hine magenooffante.