Mateus 4

Yessuusixxa Hega Uudensha

1 Ookkonechchi uduma dabiloos*4:1 Diyabiloosinna seexaan hiyyemeek lamiing summi umoke kadeeke mitte seexani’a uwwemeeke summa kadeemmaxxee Gede’uffat seexana hiyyaake duriisa, dabiloos hiyyaakee hedheeshanni dabiloos hiyyemaashsha murende’een. Yessuusii hega uudaashsha Woyyichchi Hafuurinni qiilla gammoojjebaa isoo adhdhe me’e.✝4:1 Ibr. 2:18; 4:15. 2 Shoole tomme hashshanna shoole tomme barra agabo goddo hose galeechchi uduma solo’we.✝4:2 Fula. 34:28; 1 Moy. 19:8. 3 Iikki hega uudammakinna Yessuusibaa dageexxi, «Ati Mageniinke Belto kaddo’ottole tinni kino buddeena kaddo’a ajaji!» hiyye. 4 Yessuussinna « ‹Manjii Mageniinke afo’inaan fulaake hiyyichchi duuchchinni malee buddeeni callinni hedhabaan› hiyyendee borreessende’een» hiyya’n hiisse haaso’e.✝4:4 Lan. 8:3.

5 Ookkonechchi uduma dabiloos Yessuusii’i woyyichchi qachchiba iyyedagati woyyichcha galmixxe xungo hana isoo uuriseexxi, ✝4:5 Neh. 11:1; Dan. 9:24. 6 hiyyee qici, «Lekka atixxi kinjoke’n guggufattabaashsha

« ‹Anga ifixxenni atee ke’isitto’a erganna ifixxa atixxee ajajaan

hiyyendeexxi borreessendeemmaxxee

ati Mageniinke Belto kaddo’ottole kabaa’n ifi butti’a darbi› » hiyye.✝4:6 Far. 91:11-12.

7 Yessuusinna, «Iittanni maxaafake’ni, ‹Gootta atika Mageno hega uuddoxxe’e!› hiyyendee borreessende’een» hiyye iso’ni hiisse haaso’e.✝4:7 Lan. 6:16.

8 Higgeenni dabiloos Yessuusii’i hara lumo qico qeerraxxe kooba hana iyyemareexxi buttixxa moottummuwwa duuchcha ulfinna isengeerinninni iso’n leellisheexxi, 9 «Kumbu hite anee magenooffattottole, konne duuchcha ati’a uwwannon» hiyye.

10 Yessuusinna isoo, «Gootta atike Mageni’a kumbu hiyyi, ‹isoo callanna magenooffati› hiyyende borreessendeemmaxxee, ati Seexana! Me’i ani edii’n!» hiyye.✝4:10 Lan. 6:13. 11 Eettene yanna dabiloosi Yessuusii’i waaleexxi me’e; ergannatinna daggeexxi isi’a ergatte.