Hiyyeyete Uwwatixxe’e
1 «Manni ha’noo uudo’a ‹eloxxa ha’nooxxa huje› manni edo assitnoqqe’e, heqqedhdhe! Assitinoole iimike ha’noke anninaa’n hira alfitinaba’a.
2 «Manji edo ulfaatatee ora ora’ninna Ayihudiinke magenooffachchotike mine duucchcha’n malagata ufuufisammake ifi uggudhdhammake mannisha ha’nonna hiyyeeyyetee uwwa uutina wodda leellatee hitineexxi iitta assitinoqqe’e; dhugaate ha’no’n ahaaso’a’ennen iitta assaak manni ifika hira alfe’een. 3 Ha’no kinni hiyyeeyyetee’e uwwa uutinaa wodda ha’noxxi middixxi anga uutaachcho ha’noxxi bita’ixxi anga midde egendoqqe’e! 4 Uwwa ha’nooxxi sho’ikite kaddowwaal. Sho’ik assendeexxa ege’naak ha’nook anni sho’ik hira ha’no’a uwwaan.
Soodachcho Barachiisatixxee
(Luq. 11:2-4)
5 «Ha’no soodattinaa wodda, ifi uggudhdhaake mannishsha kaddinoqqe’e! Insa’ne manni insa’nee uudo’a hineexxi Muuseka seera barantammake minuwwaninna weldeena weldeenna’n uurrineexxi Mageno soodantaan. Dhugaate ha’no’n haaso’aannenni; insa’ne ifixxe hujeka hira edinseenni adhdhine’eeni.6:5 Luq. 18:10-14. 6 Ha’no kinni soodattinaa wodda ifixxe kuta giddi’a e’yitineexxi leella’nebaake ha’nooke Annibaa soodatte; Sho’ik assendeexxa afaak Anni ha’nookinna hira ha’no’a uwwaan.
Agabo Goddoxxee Barachcho
16 «Ha’no agabo goddo hossinaa wodda ifi uggudhdhaak manni assammashsha lumbu hitinoqqe’e! Insa’ne agabo goddo hosa insa’neexxi ege’nendo’a alba ifike’n yaadotixxa bifa leellinshan. Dhugaate ha’no’n haaso’annenni iitta assakiir ifika hira alfe’een.6:16 Isa. 58:5. 17 Ati kinni agabo goddo hossatoo wodda alba atika anshedhi; umo atike’ninna issati. 18 Tennenni agabo goddo hosa atixxa ege’neddaaki leellabaake atike Anna’nite malee’e wele manna’ni kinni sho’endeexxe kadda; sho’iki assendaaxxa afaaki atik Anninna atika hira ati’a uwwaan.»