1 ህንተኖ፥ ዩሾይ አባን ተቀትዳ ቢታቶ፥

ታኒ ኦደይሳ ስእተ።

ህንተኖ፥ ሃሆሶን ደእያ ካዎተቶ አኬክተ፤

ታኒ የለታናፐ ካሰ ጎዳይ ታና ፄግስ፤

ታ አየ ኡሎን ደእሽን፥ ታ ሱን ሱንስ።

2 ታ እንፃርሳ ቃራ ማሽ ኦስ፤

ባ ኩሽያ ኩያን ታና ገንስ።

እ ታና ፖሸትዳ ዶንገ ዪሽ ኦድ

ባ ሾሁዋን ታና ቆትስ።

3 እ ታኮ፥ "እስራኤለ፥ ኔኒ ታ አይለ፤

ታኒ ታ ቦንቹዋ ነናን ቆንጭሳና" ያግስ።

4 ሽን ታኒ፥ "ታኒ ጮ ዳቡራስ፤

ታ ዎልቃ ጎእ ባይናባንነ ሀዳባን ዉርሳስ።

ግዶሽን፥ ታ ፕርዳይ ጎዳ ማታና፤

ታ ጋተይ ታ ፆሳ ማታና" ያጋስ።

5 ታኒ ጎዳ አይፈ ስንን ቦንቸትዳ ግሾ፥

ታ ፆሳይ ታዉ ዎልቃ ግድዳ ግሾ፥

ያይቆባ እያኮ ዛራናዉ

እስራኤለ እያኮ ሺሻናዉ፥

ታኒ እያ አይለ ግዳና መላ

ታና ታ አየ ኡሎን ዶርዳ

6 ጎዳይ ታኮ ሀይሳዳ ያጌስ፤

ኔኒ ያይቆባ ኮቻ ደንናዉ

እስራኤለፐ አትዳ ጉታ ዛራዳ ኤሀናዉ

ኔኒ ታዉ አይለ ግደይስ ዳሮ ጉባ።

ሄሳፈ አዳ፥ ታ አቶተይ ቢታ ጋፃ ጋካና መላ

ታኒ ነና ካዎተታስ ፖኦ ኦና።

7 ካትዳይሳስነ እፀትዳይሳስ

ቃስ ካዎተታ ሃርያ አይልያስ፥

እስራኤለ ዎዝያ ጎዳይ፥

እስራኤለ ጌሻይ ሀይሳዳ ያጌስ፤

አማንያ ጎዳ ግሾ፥

ነና ዶርዳ እስራኤለ ጌሻ ግሾ

ካዎት በእድ ደንድ ኤቃና፤

ደርያ ሃረይሳት በእድ ጎይናና።

8 ጎዳይ ያጌስ፤

"ታኒ ዶርዳ ዎደን ነ ኦይሻ ዛራና፤

አቶተ ጋላስ ታኒ ነና ማዳና።

ታኒ ነና ናጋና፤

ኔኒ ቢታ ዛራዳ ኤሳና መላ፤

አስ ዶና ቢታ ኔኒ ላትሳና መላ

ታኒ ነና አሳስ ጫቆ ኦዳ እማስ።

9 ድኤትዳይሳታ፥ ‘ከይተ!’

ማ ቃሾን ደኤይሳታ፥ ‘ብርሸትተ!’

ጋና መላ ታኒ ነና ኦና።

ኤንቲ ኦገ ማታን ሄመታና፤

መላ ደረ ቦላ ሄመትያ በሲ ደማና።

10 ኤንቲ ኮሻቶኮና ዎይኮ ሳሞቶኮና፤

ኤንታ መላ ቢታ ምሻይ ፁገና፤

አዋይ ኤንታ ሜና።

ኤንታዉ ቃተይስ ኤንታ ካለና፤

ፑልቶ ሃኮ ኤንታ ላጋና።

11 ታኒ ታ ደረታ ኡባ ኦገ ከሳና፤

ታ ዎጋ ኦገታ ቁ ኦና።

12 ሄኮ፥ ታ አሳይ ሃሆሶፐ ያና፦

ፑደሀ ባጋፈነ ዉሎሀ ባጋፈ፥

ቃስ አስዋና ቢታፈ ያና" ያጌስ።

13 ህንተኖ ሳሎቶ፥ ኡፋይሳን የፅተ፤

ነኖ ቢታዉ ኡፋይታ።

ህንተኖ ደረቶ፥ እልልተ!

ጎዳይ ባ አሳ ምንስ፤

ባ መቶተትዳ ባ አሳስ ቃትስ።

14 ሽን ፅዮነይ፥ "ጎዳይ ታና አግስ፤

ፆሳይ ታና ዶግስ" ያጋሱ።

15 አይያ ባ ንያ ናኣ ዶጋናዉ ዳንዳአይ?

ባ ኡሎፐ ከይዳ ናአስ ቃተኬ?

እያ ዶግኮካ፥ ታኒ ነና ዶግከ!

16 ሄኮ፥ ታኒ ነና ታ ኩሸ ቃቃን ፃፋ ዎስ፤

ነ ድርሳ ግምበት ኡባ ዎደ ታ ስንን ደኦሶና።

17 ነና ዛሪድ ኬፀይሳት ኤለስድ ያና፤

ነና ላልዳይሳት ኔፐ ሃካና።

18 አነ ቁ ጋዳ ነ ዩሹዋ ፄላ፤

ነ ናይት ኡባይ እስፈ ሺቅድ ኔኮ ያና።

ታኒ ጎዳይ፥ ታናን ጫቃስ፦

ኔኒ ኤንታ ኡባ አሌቆዳ ማአና፤

ገላናዉ ሀንያ ማጫስ አሌቀተይሳዳ

ኔኒ ኤንታን አሌቀታና።

19 ኔኒ ላለታዳ ባይሳ ግድኮካ፥

ነ ቢታይ ይኮካ፥

ሀእ ነናን ደእያ አሳስ ዳሮ ፁማና፤

ነና ላልዳይሳት ኔፐ ሃካና።

20 ኔኒ ካዮትያ ላይን

ነዉ የለትዳ ናይት ነ ሀይን፥

"ሀይስ በሳይ ኑስ ዳሮ ፁን ግድያ ግሾ፥

ኑ ዳና ዳልጋ በሲ እማ" ያጋና።

21 ኔኒ ነ ዎዛናን፥ "ሀ ናይታ ኡባ ታዉ ኦነ የልዳይ?

ታኒ የላዳ ን ግዳስ፤ ታኒ ድኤታስ፥ እፀታስ።

ያትን፥ ሀይሳታ ኦነ ድችዳይ?

ታኒ ታርካ አታስ፤

ያትን ሀ ናይት ኡባይ አዉፐ ይዶና? ያጋና።"

22 ኡባ ሃርያ ጎዳይ ሀይሳዳ ያጌስ፦

"ሄኮ፥ ታኒ ካዎተታ ማላታ በሳና፤

አሳስ ታ ባንድራ ኤሳና።

ኤንቲ ነ አደ ናይታ እድምድ፥

ነ ማጫ ናይታ ባንታ ሀሽያን ቶክድ ኤሀና።

23 ካዎት ነና ድችያ አዋታ ግዳና፤

ኤንታ ማጫ ካዎት ነና ንያ አዮ ግዳና።

ኤንቲ ጉፋንድ ነዉ ጎይናና፤

ነ ቶሆ ባና ላጫና።

ታኒ ጎዳ ግደይሳ ኔኒ ሄሳን ኤራና፤

ታናን አማነትድ ናገይሳት ዬላቶኮና" ያጌስ።

24 ኦላንቹዋፈ ድኦ የግሳናዉ፥

ዎዛን ኢታ አሳ ኩሸፐ ድኤትዳ አስ

ከስ ኤካናዉ ዳንዳኤትዬ?

25 ሽን ጎዳይ ያጌስ፦

ኦላንቾ ኩሸፐ ድኤትዳ አስ ከስ ኤካናዉ፥

ዎዛና ምኖ አሳፐ ድኦ የግሳናዉ ዳንዳኤቴስ።

ኔራ ኦለተይሳታራ ታኒ ኦለታና፤

ነ ናይታካ አሻና።

26 ነና ኡንኤይሳት ባንታ አሹዋ ማና መላ ኦና፤

ዎይነ ኡይድ ማተይሳዳ

ኤንቲ ባንታ ሱ ኡይድ ማታና።

ሄ ዎደ አሳ ኡባይ ታኒ ጎዳ፥

ነና አሽያ፥ ዎዝያነ ያይቆባ ዎልቃማ

ግደይሳ ኤራና።