21 Anga Tata nʉwɨiʉsha ashii nʉkʉapa ʉpanga, ʉʉgwa nʉ Ng’wana wakwe ʉkʉapa ʉpanga awo ɨhi nʉtakile. 22 Tata shanga wɨmʉpɨsɨɨlya mʉntʉ wɨhi, ingɨ ʉkʉlʉ nʉwa kʉpɨsɨɨlya wamʉlekee Ng’wana, 23 ingɨ antʉ ɨhi amʉkʉlye ʉ Ng’wana anga itɨ nɨɨza amʉkʉɨye ʉ Tata. Mʉntʉ wɨhi nɨshanga ʉmʉkʉiye ʉ Ng’wana shanga ʉkʉmʉkʉlya nʉ Tata nʉmʉlagɨɨye.

24 "Kʉmʉɨla ɨtai taai, mʉntʉ wɨhi nʉʉkija ʉlʉkani lane, nʉkʉmʉhʉɨɨla ʉyo nʉntʉmile, ʉkete ʉpanga nʉwa kalɨ na kalɨ. Kwe shanga ʉkʉpɨsɨligwa, ingɨ ʉkʉtula wakɨla kʉpuma mʉnsha nʉkingɨla mʉʉpanga. 25 Kʉmʉɨla ɨtai taai, matungo apembilye, hangɨ apika, nɨashi akija lʉli nʉla Ng’wana wang’wi Itunda, nawo nɨakija, akɨshiɨ. 26 Anga ʉ Tata nɨng’wandyo nʉwa ʉpanga, ʉʉgwa ʉmʉpee nʉ Ng’wana wakwe kʉtula ng’wandyo nʉwa ʉpanga. 27 Hangɨ Itunda ʉmʉpee Ng’waakwe ʉhumi nʉwa kʉlamʉla kʉnsoko yʉyo mʉntʉ Itunda nʉmʉtʉmile. 28 Leki kʉkʉɨlwa ikani ɨlɨ, kʉnsoko itungo lɨpembilye awo ɨhi nɨamoli mʉibɨɨla akija lʉli lakwe, 29 ɨhi akɨʉkigwa. Awo naɨatendile nɨmaza akʉlija upanga nʉwa kalɨ na kalɨ, nawo naɨatendile ʉʉbɨ akiʉkigwa nʉkʉpɨsɨɨligwa.

30 "Ʉnene shanga nɨhumile kitʉma kɨntʉ kɨhi kʉʉhumi wane. Ʉnene kʉlamʉla anga nɨnigulye kʉpuma kʉng’wa Tata, nʉʉlamʉli wane ingɨ wa tai. Shanga nɨduma kituma anga nɨntakile ʉnene, ingɨ nʉtakile ʉyo nʉndagɨɨye.

31 Anga nitambʉle iza ʉnene, witambʉli wane shanga ʉkʉgombwa kɨna watai.