1 Ʉwʉ wʉwʉ mʉlongo nʉwa ndʉgʉ ang’wa Kilisito, ng’wana wang’wa Daudi, ng’wana wang’wa Ibulahimʉ.

2 Ibulahimʉ wɨkamʉtuga Isaki nʉ Isaki wɨkamʉtuga Yakobo, nʉ Yakobo wɨkamʉtuga Yʉda nɨaluna akwe 3 Yʉda wɨkamʉtuga Pelesi nʉ Zela, nyinya wao aɨ Tamali, nʉ Pelesi wɨkamʉtuga Esilomu nʉ Esilomu wɨkamʉtuga Alamu. 4 Alamu wɨkamʉtuga Aminadabu nʉ Aminadabu wɨkamʉtuga Nashoni nʉ Nashoni wɨkamʉtuga Salimoni 5 Salimoni wɨkamʉtuga Boazi nʉ nyinya wang’wa Boazi aɨ Lahabu nʉ Boazi wɨkamʉtuga Obedi nʉ nyinya wang’wa Obedi aɨ Luti nʉ Obedi wɨkamʉtuga Yese.

6 Yese wɨkamʉtuga Daudi naɨza Mʉtemi. Daudi wɨkamʉtuga Solomoni, ʉnyinya wang’wa Solomoni aɨ Bati Sheba yʉyo naɨ mʉkɨma wang’wa Ulia. 7 Solomoni wɨkamʉtuga Lehoboamu. Lehoboamu wɨkamʉtuga Abiya. Abiya wɨkamʉtuga Asa, 8 Asa wɨkamʉtuga Yehoshapati nʉ Yehoshapati wɨkamʉtuga Yolamʉ nʉ Yolamu wɨkamʉtuga Ʉzia, 9 Ʉzia wɨkamʉtuga Yotamu nʉ Yotamu wɨkamʉtuga Ahazi nʉ Ahazi wɨkamʉtuga Hezekia, 10 Hezekia wɨkamʉtuga Manase nʉ Manase wɨkamʉtuga Amoni nʉ Amoni wɨkamʉtuga Yosia, 11 Yosia wɨkamʉtuga Yekonia nɨ aluna akwe. Itungo nɨlanso papo Ayahudi naɨahamɨgwe kʉtalwa kʉ Babeli.

12 Ayahudi naɨ ahamigwe kʉtalwa kʉ Babeli, Yekonia wɨkamʉtuga Shealitieli nʉ Shealitieli wɨkamʉtuga Zelubabeli, 13 Zelubabeli wɨkamʉtuga Abiudi nʉ Abihudi wɨkamʉtuga Eliakimʉ, Eliakimʉ wɨkamʉtuga Azoli, 14 Azoli wɨkamʉtuga Sadoki nʉ Sadoki wɨkamʉtuga Akimʉ nʉ Akimʉ wɨkamʉtuga Eliʉdi, 15 Eliʉdi wɨkamʉtuga Eliazali nʉ Eliazali wɨkamʉtuga Matani nʉ Matani wɨkamʉtuga Yakobo, 16 Yakobo wɨkamʉtuga Yusupu, Yusupu aɨ mʉgoha wang’wa Malia, Malia yʉyo aɨ ʉmʉtugile Yesʉ nʉ witangwa Kilisito.

17 Kʉpuma kʉng’wa Ibilahimʉ kʉpikɨɨla kʉtugwa kʉng’wa Daudi aɨ akolɨ matʉgɨlo ikʉmi na annɨ nʉ kʉpumɨɨla kʉng’wa Daudi kʉpikɨɨla nɨ Ayahudi naɨ aholwa kʉhamɨligwa kʉ Babeli, aɨ matugɨlo ikʉmi na innɨ nʉ kʉpuma naɨ aholwa kʉhamɨligwa kʉ Babeli, kʉpikɨɨla nʉ Kilisito naɨ ʉkʉtugwa aɨ matugɨlo ikʉmi na innɨ.

18 Ʉʉgwa, kʉtugwa kʉng’wa Kilisito aɨ it. Malia nyinya wang’wa Kilisito aɨ ʉligigwe nʉ Yusupu, ɨkaze akɨlɨ atankane kɨmʉɨlɨ, ʉ Malia wɨkatʉla waʉsha mɨligo kʉʉhumi nʉa Ng’wahʉ Ng’welʉ. 19 Yusupu naɨwaona kɨna Malia ʉyʉ nʉmʉligilye waʉsha mɨligo, wɨkasɨga wamʉleke kɨnkʉnkʉ, kʉnsoko ʉ Yusupu aɨ mʉntʉ nʉwɨtenda aya nagombekile kʉng’wi Itunda shanga aɨ ʉloilwe kʉmʉhumya mɨnyala ʉ Malia. 20 Yusupu naɨwakɨlɨ ʉkisɨja kʉmʉleka, Mitʉmi nʉakigʉlʉ nʉang’wi Itunda wang’wi Itunda wɨkamʉɨla mʉndoti, "Ʉewe Yusupu ng’wana wang’wa Daudi, leka kogopa kʉmʉhola Malia watʉle mʉkɨmako, kʉndogoelyo mɨligo ɨyɨ nʉkete ingɨ kʉʉhumi nʉwa Ng’wahʉ Ng’welʉ. 21 Ʉkʉtuga ng’wana mʉgoha, nʉewe ʉkʉmʉta lina Yesʉ, kʉnsoko nʉanso yʉyo ʉkʉaguna antʉ akwe mʉmɨlandʉao."

22 Aya ɨhi aɨapʉmɨe kʉtimɨlya ʉlʉkani ni Itunda aɨʉtambʉe kʉkɨɨla mʉ amanga akwe kɨna, 23 "Kolwa, mʉnanso nʉwakɨlɨ kʉmanya mitʉnja ʉkʉpantɨka mɨligo nʉyo ʉkʉtuga ng’wana mʉgoha lina lakwe akʉmʉta Imanueli" Ndogoelyo alina ɨlɨ, "Itunda palʉng’wɨ nʉsese".

24 Itɨgwa Yusupu naɨwapitya mʉtʉlo wɨkatenda anga naɨʉlagɨigwe nʉ Itʉmi akigʉlʉ niang’wi Itunda wɨkamʉhola Malia kʉtula mʉkɨma wakwe anga Itʉmi akigʉlʉ niang’wi Itunda nʉwang’wi Itunda aɨ ʉmʉtambʉye mʉndoti. 25 Ingɨ Yusupu shanga aɨ ʉtankanile kɨmʉɨlɨ nʉ Malia, kʉpikɨɨla Malia naɨ utugile ng’wana mʉgoha. Ʉʉgwa Yusupu wɨkamʉta ʉng’wana lina Yesʉ.