Atos 16

Paulo na Sila wogeligwa mdigeleza

16 Zua dimwe vichiitile hanhu hahaja hakufugamila, chiiting’hanila na biti imwe mtumwa yakalile yambule chinyamkela wa kulagula. Kubitila biti iyo wakulu wake wakala woipatila sente nyingi. 17 Baho, iyo biti kamuwinza Paulo na cheye ivija kuno yoguta nyangi na yolonga, "Wano wanhu ni wasenga wa Mulungu mkulu ng’hani. Wowalongeleni vija vumdaha kuloholigwa." 18 Biti iyo kakala yotenda ivo kwa mazua mengi, mbali zua dimwe Paulo kehiligwa, kamhindukila na kumlongela iyo chinyamkela, "Nokulakila kwa nzina da Yesu Kilisito, mlawe biti ino!" Bahaja iyo chinyamkela kamlawa.

19 Waja wazenzi wa ija biti viwaonile tamanilo jao da kupata sente dahabule, wawagoga Paulo na Sila, wawagala hazelu, haulongozi ha wakulu. 20 Wawalongelezela kwa walamuzi kwa kulonga, "Wanhu wano ni Wayahudi na wogala dwagi muikae yetu. 21 Wofunda mazoela gaja kumwetu cheye Walumi hachilondeka kuzitogola hebu kuziwinza." 22 Bumbila da wanhu dikalile haja diilumba na kuwatoa Paulo na Sila.

Baho waja walamuzi walamula wavuligwe vivalo vao na walibuligwe mbalati. 23 Viwamalile kuwalibula ng’hani wageligwa mdigeleza, na kumlagiza mkulu wa geleza kuweka muuwimilizi mkulu.

24 Viyabokele malagizo gago, iyo mkulu wa geleza kawegela mgati ng’hani mwa dija geleza na kuwafunga magulu kwa vihande va mbao.

25 Chilo chikulu Paulo na Sila wakala wopula na kwimba nyila za kumtogola Mulungu, kuno wafungwa wamwenga wakala wotegeleza.

26 Bahaja halawila gudemo kulu da isi mbaka iitigisa misimikilo ya geleza. Mala milwivi yose ivuguka na minyololo iwalekesa wafungigwa wose. 27 Mwimilizi wa geleza viyalamuke na kuona milwivi ya geleza ivuguligwa, kagesa kua wafungwa wose wakala wakimbila, na ivo kadisomola panga jake na kalonda kuikoma.

28 Mbali Paulo kaguta kwa dizi kulu kalonga, "Seke uikome mwenyego cheye chose chabaha!"

29 Mmilizi mkulu wa geleza kumkema munhu yagale lumuli, kengila mgati ya geleza na kuibwanha hamagulu ga Paulo na Sila kuno kogudema kwa kudumba. 30 Amala kawalava kunze na kawauza, "Mweye wakulu, nhendeze mhate kuloholigwa?"

31 Wao wamwidika, "Mtogola Mndewa Yesu gweye hamwe na wanhu wose wa ng’anda yako baho moloholigwa." 32 Baho, wamligulila usenga wa Mndewa yeye na wose weli mng’anda yake. 33 Chilo ichija ija mmilizi kawasola kawasunha vilonda vao, amala iyo na wanhu wose wakalile mng’anda yake wa bahaja wabatizigwa. 34 Labaho wawasola Paulo na Sila mbaka ukae yake, na kaweng’ha ndia. Iyo na wose wakalile mng’anda yake wadeng’helela sana kwavija sambi wamtogola Mulungu.

35 Igolo yake imitondo, walamuzi wawalagiza wakulu wa wamilizi kwa mmilizi mkulu wa geleza walonga, "Walekeseleni wanhu wao waite."

36 Ija mwimilizi mkulu wa geleza kamlongela Paulo, "Walamuzi wagala usenga ili mlekesegwe. Ivo, sambi modaha kulawa na kuita kwa utindiwala."

37 Paulo kamwidika, "Wachilibula mbalati hazelu hata kama chibanange chinhu na cheye cha Walumi, kaidi wachigela mdigeleza na sambi wonda kuchilekesela kwa chifiso, haidahika! Wolondeka wao wenyego weze hano wachilave mdigeleza."

38 Waja wakulu wa wamilizi wabwela wawalongela walamuzi mbuli iyo, nao viwahulike kua Paulo na Sila wakala wenekae wa Loma, wadumba. 39 Baho waita kuwapula ili wasamehigwe, na viwakomeleze kuwalava mdigeleza wawalongela wasegele kulawa muikae ija. 40 Paulo na Sila walawa mdigeleza, waita ukae kwa Lidia. Uko waiting’hanila na ndugu wamtogole Kilisito wawagela moyo, amala wasegela.