1 ଇୟା ୱିଜୁ ଗଟ୍‌ନା ୱେନେକା ମାପୁରୁ ଅବ୍ରହାମଦି ବିସ୍‌ବାସ୍‌ତି ପରିକା କିତାନ୍‌, "ଏ ଅବ୍ରହାମ । ଆବେଟ୍‍କୁ ୱାନ୍ ଇର୍ହାନ୍‌, ସୁଡ଼ୁଆ, ନାନୁ ଇବେନୁ ମାନା ।"

2 ନାସ୍ତିୱାଲେ ମାପୁରୁ ଇର୍ହାନ୍‌, "ନିନୁ ଇଲେଇ ନିଜେ ମାରିନ୍‌ତିଙ୍ଗ୍‌, ନି ମାରିଅରେନ୍‌ ମାରିନ୍‌ତିଙ୍ଗ୍‌, ମାରି, ନିନୁ ଏମେୱାନିଙ୍ଗ୍ ଜିବନ୍‌ନୋନି, ଆୟା ଇସ୍‍ହାକ୍‍ତିଙ୍ଗ୍‌ ଆସ୍‌ସି ମୋରିୟା ଦେସ୍‍ତୁ ସାଙ୍ଗ୍‍ଆ; ମାରି, ମାପୁ ଆୟା ଦେସ୍‍ତୁ ଏମେ ଗୋରନ୍‌ତୁ ଇନାପ୍, ଆୟା ଗୋରନ୍‌ ମୁସୁକୁ ୱାନିଙ୍ଗ୍‌ ପୁଜା ସିଆ ।"

3 ଆବେଟ୍‍କୁ ଅବ୍ରହାମ ନାଡ଼ାକାନେ ନିଙ୍ଗିଁଜି ଗଦ ମୁସ୍‌କୁ ରସ୍‌ସି ରିଏର୍‌ ଦାସକୁ ମାରି ନିଜେ ମାରିନ୍‌ ଇସ୍‍ହାକ୍‍ତିଙ୍ଗ୍‌ ଅର୍‌ସେ ଅତାନ୍‌, ମାରି ପୁଜା ସିନି ଉଣ୍ତିଙ୍ଗ୍ ୱେରୁକୁ କାତ୍‌ସି ମାପୁରୁଦି ଟିକ୍‌ ବାଡିଦୁ ସର୍ହାର୍ । 4 ତାନିୱେନେକା ମୁନେଟି ୱେନ୍‌କା ଅବ୍ରହାମ ବେସ୍‌ସି ଆକରାନ୍ ଆୟା ବାଡି ସୁଡ଼ୁତାନ୍ । 5 ନାସ୍ତିୱାଲେ ଅବ୍ରହାମ ଆୟା ଦାସରିଙ୍ଗ୍‌ ଇର୍ହାନ୍‌, "ମିରୁ ଇୟା ଜାଗାଦୁ ଗଦଦି ୱାଲେ ମାଡ୍ରୁରୁ, ନାନୁ ନି କଡ଼ ରିଅପ୍ ଆୟା ବାଡିଦୁ ସଲ୍‌ସି, ପାର୍‌ତନା କିଜି ୱେନେକା ମି ଲାକୁତୁ ଡ଼େସି ୱାନାପ୍ ।"

6 ଆବେଟ୍ ଅବ୍ରହାମ ହୋମ ୱେରୁକୁ ଆସ୍‌ସି ନିଜେଦି କଡ଼ ଇସ୍‍ହାକ୍‌ଦିଙ୍ଗ୍‌ ଗୁଜାମି ପିଣ୍ତିସ୍‌ସି ନିଜେ କିୟୁଦୁ ସିସୁ ମାରି କୁଡ଼ାମ୍ ଆସ୍‌ସି, ମାରି ରିଏର୍‌ ଅର୍‌ସେ ସର୍ହାର୍ । 7 ମାରି ଇସ୍‍ହାକ୍ ନିଜେଦି ବୁବେଙ୍ଗ୍ ଅବ୍ରହାମଦିଙ୍ଗ୍ କୁକ୍‍ସି ଇର୍ହାନ୍‌, "ଏ ନା ବୁବା ।"

ଆବେଟ୍ ୱାନ୍ ଇର୍ହାନ୍‌, "ଏ ନା କଡ଼ ସୁଡ଼ୁଆ, ନାନୁ ଇବେନୁ ।"

ନାସ୍ତିୱାଲେ ୱାନ୍ ୱେନ୍‍ବାତାତ୍, "ଇନିଙ୍ଗା ସୁଡ଼ୁଆ, ସିସୁ ମାରି ୱେରୁକୁ, ମାତର୍‌ ପୁଜା ଉଣ୍ତିଙ୍ଗ୍ ମେଣ୍ତାପିଲା ଏମେ ?"

8 ଆବେଟ୍ ଅବ୍ରହାମ ଇର୍ହାନ୍‌, "ଏ ମାରିନ୍‌, ମାପୁରୁ ନିଜେ ପୁଜାସିନି ଉଣ୍ତିଙ୍ଗ୍ ମେଣ୍ତାପିଲା ସିନାନ୍ ।" ଆବେଟ୍ ରିଏର୍‌ ଅର୍‌ସେ ସର୍ହାର୍ ।

9 ମାରି ମାପୁରୁ ୱେର୍‌ତି ବାଡିଦୁ ଇତି ୱେନ୍‌କା, ଅବ୍ରହାମ ଆବେନୁ ଉଣ୍ତ୍ରି ପୁଜାବେଦି ତିଆର୍‌ କିଜି ତାନି ମୁସୁକୁ ୱେରୁକୁ ନେର୍‌ସି ନିଜେଦି କଡ଼ ଇସ୍‍ହାକ୍‌ତିଙ୍ଗ୍ ତରିସି ବେଦିଦି ୱେରୁକୁ ମୁସୁକୁ ତେର୍‍ପେତାନ୍ । 10 ତାନିୱେନେକା ଅବ୍ରହାମ କିୟୁ ପେରିଜି କଡ଼ଦିଙ୍ଗ୍‌ କାତ୍‍ନି ଉଣ୍ତିଙ୍ଗ୍‌ କୁଡ଼ାମ୍‌ ପେର୍‌ତାନ୍ । 11 ଇୟାନାନି ବେଡ଼ାଦୁ ବାଦଡ଼ଦାନ୍ ପ୍ରବୁଦି ଦୁତ୍ ୱାନିଙ୍ଗ୍ କୁକ୍‍ସି ଇର୍ହାନ୍‌, "ଏ ଅବ୍ରହାମ, ଏ ଅବ୍ରହାମ !" ଆବେଟ୍‍କୁ ୱାନ୍‌ ଇର୍ହାନ୍‌, "ସୁଡ଼ୁଆ, ନାନୁ ଇବେନୁ ।"

12 ଆବେଟ୍‌ ୱାନ୍ ଇର୍ହାନ୍‌, "ନିନୁ ଆୟା କଡ଼ଦି ମୁସୁକୁ କିୟୁ ପେର୍‍ମା ମାରି ୱାନି ଉଣ୍ତିଙ୍ଗ୍ ଇନିକା କିମା; ଇରିଙ୍ଗ୍‌ ମାପୁରୁଦି ଉଣ୍ତିଙ୍ଗ୍ ନି ମାନାନିକା ମାନାତ୍, ଇକା ଇଲେଇ ନାନୁ ନେସ୍‍ତା; ଏଣ୍ତେସ୍ ନିନୁ ନାଙ୍ଗିଁ ନିଜେଦି କଡ଼, ନିଜେଦି ଅରେନ୍ କଡ଼ଦିଙ୍ଗ୍ ସିଦେଙ୍ଗ୍ ମୋନ ଉଣାକିଇତି ।"

13 ନାସ୍ତିୱାଲେ ଅବ୍ରହାମ ବେସ୍‌ସି ନିଜେଦି ୱେନେକା ତରିନ୍‌ ଦୁପା ଲୋଇ କମୁକୁମାନି ଉଣ୍ତ୍ରି ମେଣ୍ତା ସୁଡ଼ୁତାନ୍; ଆବେଟ୍‍କୁ ଅବ୍ରହାମ ସଲ୍‍ସି ଆୟା ମେଣ୍ତାଦିଙ୍ଗ୍‌ ତାସି ନିଜେଦି କଡ଼ ବାଦୁଲୁ ତାନିଙ୍ଗ୍‌ ପୁଜା ସିତାନ୍‌ । 14 ମାରି ଅବ୍ରହାମ ଆୟା ଜାଗାଦି ଦରୁ ଜିହୋବା-ଜିରି ଇଟ୍‌ତାନ୍ । ଆଦେଙ୍ଗ୍‌ ନେରୁସାନ୍ଦି ଲୋକୁ ଇନାର୍, ସଦାପ୍ରବୁଦି ଗରନ୍‌ତୁ ଜାଗେକିନା ସିନାନ୍‌ ।‌

15 ମାରି ମାପୁରୁଦି ଦୁତ୍ ମାରିଉଣ୍ତ୍ରିଦେବା ବାଦଡ଼ତାନ୍ ଅବ୍ରହାମଦିଙ୍ଗ୍ କୁକ୍‍ସି ଇର୍ହାନ୍‌, 16 "ପ୍ରବୁ ଇଜିନାନ୍‌, ନିନୁ ମାଙ୍ଗିଁ ନିଜେଦି ମାରିନ୍‌, ନିଜେଦି ଅରେନ୍‌ନେ ମାରିନ୍‌ତିଙ୍ଗ୍‌ ସିଦେଙ୍ଗ୍ ମୋନା କିଏତି; 17 ନି ଇୟା ପାଣି ଉଣ୍ତିଙ୍ଗ୍ ମାପୁ ନିଜେଦି ଦରୁଦାନ୍ ପାର୍‍ମାଣ୍‍ କିଜି ଇଜିନାପ୍‍, ମାପୁ ନିଙ୍ଗିଁ ଏଣ୍ତେସ୍‌ବା ଆର୍ସିବାଦ୍‌ କିଜି ବାଦଡ଼ତି ସୁକେଙ୍ଗ୍ ମାରି ସାମୁଦୁର୍‌ତି ବାଲି ୱାଜା ନି କୁଟୁମ୍‌ ନାଣ୍ତ କିନାପ୍; ନି କୁଟୁମ୍‌ ସାତ୍ରୁରି ଗାଡ଼୍‌କୁ ଅଦିକାର୍‌ କିନାର୍ । 18 ମାରି, ଦୁନିଆଦି ୱିଜୁ ଜାତି ନି କୁଟୁମ୍‌ ଦାନ୍ ଆର୍ସିବାଦ୍‌ ପୋଇନାର୍; ଇରିଙ୍ଗ୍‌ ନିନୁ ମା ମାଟା ମାନାତିମାନି ।" 19 ତାନିୱେନେକା ଅବ୍ରହାମ ଆୟା ଦାସରି ଲାକୁତୁ ଡ଼େସିସର୍ହାନ୍‌; ମାରି ୱାର୍ ନିଙ୍ଗିଁଜି ଅର୍‌ସେ ବେର୍‍ସେବାଦୁ ସର୍ହାର୍ ମାରି ଅବ୍ରହାମ ବେର୍‌ସେବାଦୁ ବାସା କିତାନ୍ ।

20 ଆୟା ଗଟ୍‌ନା ୱେନେକା ଅବ୍ରହାମଦିଙ୍ଗ୍ ଇୟା କାବୁର୍ ସିଆତାନ୍, "ୱେନ୍‍ଆ, ମିଲ୍‍କା ବା ମି ତଡ଼ାନ୍‌ ନାହୋର ଉଣ୍ତିଙ୍ଗ୍ କଡ଼ର୍‌ ଆଇଲିକ୍‌ ଜନମ୍‌ କିତାମାନାତ୍ । 21 ତାନି ପେରି କଡ଼ ଉସ୍‌ ମାରି ତାନି ତଡ଼ାନ୍‌ ବୁସ୍ ମାରି ଅରାମଦି ବୁବା କମୁୟେଲ, 22 ମାରି କେସଦ୍ ମାରି ହସୋ ମାରି ପିଲଦସ୍ ମାରି ଜଦ୍‍ଲପ୍ ମାରି ବତୁୟେଲ୍ ।" 23 ଆୟା ବତୁୟେଲ୍ ଗାଡ଼ି ରିବିକା । ଅବ୍ରହାମଦି ତଡ଼ାନ୍‌ ନାହୋର ଉଣ୍ତିଙ୍ଗ୍ ମିଲ୍‌କା ଇୟା ଆଟ୍‌ ଲୋକ୍‌ ମାରିନ୍‌କାଙ୍ଗ୍‌ ଜନମ୍‌ କିତାତ୍ । 24 ମାରି, ନାହୋରଦି ରୁମା ଦର୍‌ତି କଗ୍‌ରି ଆଡ଼ିଦି ମାଡ଼ାନ୍ ଟେବହ ମାରି ଗହମ୍ ମାରି ତହସ୍ ମାରି ମାକା, ଇୟାକାର୍ ଜନମ୍‌ ଆତାର୍‌ ।