Tjifananidzo tjeNlanda Usingayetile Bamwe Mazwibhatigwa
21 Phethiro wakakohha akati kuwunli, "He, gamu langu linganditjinyila kukadza kukaba kangana, ndiliyetila mazwibhatigwa? Ndingawuyetila mazwibhatigwa kukadza kukaba kutondeka?"
22 Yesu wakati kuwunli, "Anditoti kukuli kukadza kukaba kutondeka, koga kukadza kukaba makumi ali kutondeka akapamhiwa kakutondeka. 23 Ndizo ke bumambo gwekudzimu gungafananisiwa namambo wakayemula ziba kuti balanda babe banowukweleda kungapani. 24 Wakati etanga lingisisa, bakahhisa kuwunli umwe waka enakwelete tjematalenta18.24 talenta unsindo wetshipi dzinonga zeezi, talenta lin’ompela laka lakalizana nema kg ali 30 ali zwiwulu zwili gumi. 25 Nlanda esingatubule lipa kwelete, batezi babe bakati ngaatengesewe, kose nemfumakadzi uwe, nebana babe, nayiko kose kwaanako, mari yawanikwa ilipe kwelete. 26 Nlanda wakapfigama, akakumbila eti, ‘Mundiyetileni moyonlefu ndowholipa kose.’ 27 Ngentha yewuwhila ngoni batezi benlanda bakawuyetila mazwibhatigwa kwelete, bakawunletja akayenda zwe."
28 "Koga nlanda iwhoya zwe, ebhuda wakahangana newumwe webalanda waka anakwelete tjitje tjemaloso edinari18.28 dinari lin’ompela laka lakalizana nenlipo wehhuba lin’ompela unopiwa n’hingi ali gulu. Wakawundzipa pawhulo eti kuwunli, ‘Lipa kwelete tjangu ngwenuwali.’ 29 Nlanda iwhoyo wakapfigama ekawunkumbilisisa eti, ‘Undiyetile moyonlefu, ndowhokulipa.’ 30 Koga wakalamba, akayenda naye akanowuhhalilila mujele kuswikila alipa kwelete tjitje. 31 Bamwe balanda baaka ehinga nabo, pabakabona tjayetikala bakagwadziwa kwazo, bakayenda bakanobudza mambo wabo kose kwayetikala. 32 Mambo akakotjiwundhana akati kuwunli, ‘Iwe nlanda mbi, ndakakuyetila mazwibhatigwa kwelete tjitjo tjose, ngobe wakandikumbila kuti ndikuyetile mazwibhatigwa. 33 Wawusakafanila whila ngoni bo umwe nlanda sawe, sekwandaka kuwhila ngoni bo?’ 34 Mambo wakamon’wa akawuhhalilila mujele, kuswikila alipa kwelete tjitje tjose."
35 "Ndizo Tate bangu bakudzimu bo banowhothama bejalo kumwe newumwe wenyu hapa musingayetile makamu enyu mazwibhatigwa kubva mumimoyo yenyu."
/images/a/Tcg2NiV7ce24OT6kCIQGR)
/images/a/a0208299-6f37-40a0-66e1-2576b9435f00)