João 13

Jesu Unoshambisa Balayijwa Babe Makumbo

1 Ngweno kusanhu kwaswika miliya yePasika, Jesu waluzibakale kuti unshaji wokuti enyamuke ebhuda munyika enda kunaTate babe waswika, Iye wakabada babe bakabeli munyika, wakabada kuswikila kumapejelejo.

2 Nonshaji wechilayilo, guluzhanje wakababiga kale mumwoyo waJudasi, mwananhulumyana waSimoni Isikaliyoti kuti onchete. 3 Jesu eziba kuti Tate bakabiga zwinhu zwose mumaboko awe, nokuti wakava kunaMwali akale wakabenda kunaMwali, 4 nokudalo wakamilika pechilayilo akabhisa zwimbalo zwizwe zwopezhulu akazwibiga kumbali, akasunga uncheka munshana uwe, 5 kova edila ivula munachoshambila, akatanga kushambisa balayijwa babe makumbo, akabachumula noncheka waakaba ekasungilila munshana. 6 Wakezha kunaSimoni Pita, akale Pita wakati kwaali "Tezi mondishambisa makumbo angu na?"

7 Jesu wakounshandula eti, "Zwandikumukuta amutozwiziba ngweno, asi mukunda kwonshaji munoozwiwhisisa."

8 Pita wakati, "Amutooshambisa makumbo angu kuswika lini."

Jesu wakounshandula eti, "Kana imi ndisakushambisa makumbo autoba umwe wangu."

9 Simoni Pita wakati kunaiye, "Tezi kusibe makumbo angu oga asi namaboko nonsholo." 10 Jesu wakati kwaali, "Iye washamba ulokwelela kushamba makumbo chete nokuti umbili uwe wose uloshambijika. Imwi mose muloshambijika kuzhe kwomwempela wenu." 11 Nokudalo Jesu wakabeziba kuti ndiani uchoncheta, ndizwo akati abatoba ibo bose baloshambijika.

12 Paakabashambisa makumbo, wakatola chimbalo chiche akambala, akagala pasi akababhuza eti, "Munoziba kuti ini zwandata kwamuli? 13 Mondishoba muti Ndayiji akale muti Tezi, zwibuya nokuti ndili alo. 14 Kana imi Tezi akale ndili Ndayiji, ndashambisa makumbo enu, munokwelela kushambisana makumbo neebo. 15 Nokuti ndamupa chibonelo, kuti imwibo munokwelela kuta sezwandata imi kwamuli. 16 Ndinolebesa ndinoti kwamuli, unshingi, aatoba unkulwana kupinda tezi uwe, naiye wakatumwa aatoba unkulwana kupinda yoyo wakoontuma. 17 Kana muziba yezwi zwinhu, mulokombolelwa kana muzwita.