Lucas 19

O Isus khuvela ko Erusalim sar caro

28 Koga o Isus vakergja lenge adava, prodolžingja pe drumoja ko Erusalim.

29 Togaš alo paše uza ko gava Vitfagija hem Vitanija uza ko rido so vikinela pe Maslinova Gora i bičhalgja duje učenikon 30 vakerindor: "Džan ko akava gav, soj angli tumende. I samo so ka khuven ki leste, ka arakhen terno her soj phandlo, so panda nijekh manuš na uklilo ki leste. Phraven le hem anen le akate. 31 I te pučlja tumen nekoj: ‘Soske phravena le?’, vakeren leske: ‘E Gospodareske trebela.’ "

32 Ola gele hem arakhle agjar sar so phengja lenge o Isus.

33 I dži kote phravena sine e terne here, o manuša kaskoro sine o terno her, pučle len: "Soske phravena le?"

34 A ola odgovoringe: "E Gospodareske trebela." 35 Togaš ange le anglo Isus, i čhige pe šeja upro terno her hem uklargje e Isuse upro leste. 36 Dži kote džala sine o Isus e hereja, o manuša bujlarena sine pumare šeja ko drumo.

37 A koga alo paše uza ko than kote so hulela pe sine tari Maslinovo Gora, sa o učenikija so sine adathe počminge radosno hem sa pe glasoja te slavinen e Devle bašo sa o čudija so dikhle, 38 vakerindor:

"Blagoslovimo tano o Caro

so avela ko anav e Gospodareskoro!✝19:38 Ps 118:26.

Neka ovel mir ko nebo

hem slava e Devleske ko učipe!"

39 Togaš nesave fariseja, so sine maškar lende, vakerge e Isuseske: "Učitele, zaptin te učenikon te na vakeren adava."

40 A o Isus odgovoringja lenge: "Vakerava tumenge, te kjutinge ola, o bara ka vikinen."