Luka 2

E Isuse anena ko Hrami

22 Koga alo o vreme bašo adeti i daj te čistinel pe palo e Mojseskoro Zakoni, o Josif hem i Marija legarge e čhave ko Erusalim te anen le anglo Gospodari 23 (sar so sine pišimo ko Zakoni e Gospodareskoro: "Sekova prvo bijamo murš trebela te posvetinel pe e Gospodareske"✝2:23 Iz 13:2,12.) 24 hem te den žrtva (sar soj phendo ko Zakoni e Gospodareskoro: "duj tikne gulubija ili duj terne gulubija.✝2:24 Lev 12:8.")

25 A ko Erusalim sine jekh manuš so vikinela pe Simeon. Ov sine pravedno hem pobožno. Adžikerela sine te avel o Mesija te spasinel e Izraelcon, hem o Sveti Duh sine upro leste. 26 Leske sine phendo taro Sveti Duh deka nane te merel sa dži kote angleder na dikhela e Gospodareskere Mesija*2:26 Mesija Akaja Evrejsko forma ko Grčko lafi Christos značinela pomazaniko, so ko javera biblije bešela sar Hristos.. 27 O Sveti Duh vakergja leske te džal ko Hrami, i ov gelo. Togaš dikhla e Josife hem e Marija so ange e čhave e Isuse ko Hrami te keren adava so sine o adeti taro Zakoni. 28 O Simeon lela e čhave ko pe vasta hem blagodaringja pe e Devleske vakerindor:

29 "Gospode, akana me to sluga šaj te merav ko mir,

sar so phengja mange.

30 Soske me jakha dikhle to spasenije,

31 so spremingjan le anglo jakha sa e nacijenge.

32 Ka ovel svetlina so ka svetinel okolenge so na džanena tut,

hem ka anel slava te narodoske e Izraelconge✝2:32 Izraelconge Isa 42:6; 49:6; Del 13:47; 26:23.."

33 E Isuseskoro dad hem i daj čudisalile adalestar so o Simeon phengja baši leske.

34 Togaš o Simeon blagoslovingja len hem phengja e Marijake e Isuseskere dajake: "Akava čhavo i birimo buten te peravel hem te vazdel ko Izrael. Ov tano birimo te ovel e Devleskoro znako, ama but džene ka otfrlinen le. 35 Ka sikaven pe butengere garavde misle, ama i čhurik ka posavel ti duša."

I Ana blagodarinela e Devleske bašo Mesija

36 Adathe sine i proročka i Ana, i čhaj e Fanuileskiri taro pleme e Ašireskoro. Oj sine ko phure berša, a pe romeja živingja efta berša. 37 Palo adava sine udovica dži ko oftovardešu štar berš. Oj nikat na mukhla o Hrami, nego služinela sine dive rat, molindor hem postindor. 38 Ko adava momenti, ali uza lende, blagodaringja e Devleske bašo čhavo, hem lela te vakerel bašo čhavo sarinenge so adžikerena spasenije e Erusalimeske.