Luka 2

O čhavo o Isus ko Hrami

41 Sekova berš o dad hem i daj e Isuseskere džana sine ko Erusalim bašo prazniko Pasha. 42 Koga e Isuse sine le dešuduj berš, palo adeti, ola gele adari te slavinen o prazniko. 43 Koga nakhla o prazniko, dži kote iranena pe sine khere o Josif hem i Marija na primetinge deka lengoro čhavo o Isus ačhilo ko Erusalim. 44 Mislindor deka o Isus tano maškar o manuša so džana peske sine lencar, gele jekh dive phirindor. A poslem počminge te roden le maškar pumari familija hem ko amala. 45 Koga našti arakhle le, irange pe ko Erusalim te roden le. 46 I palo trin dive arakhle le ko Hrami, sar bešela maškar o učitejla, sar šunela len hem pučela len. 47 Sarine so šunena le sine, začudime sine taro leskoro džandipe hem taro leskere odgovojra.

48 Koga dikhle le leskoro dad hem i daj but čudisalile. Leskiri daj phengja leske: "Mo čhavo, soske kergjan amenge akava? To dad hem me but darandilem hem rodingjem tut!"

49 A o Isus pučlja len: "Soske rodena man? Na džanena li deka mora te ovav me Dadeske ko kher?"

50 Ama i Marija hem o Josif na svatinge so o Isus mangla te phenel lenge adaleja.

51 Palo adava, o Isus gelo lencar ko Nazaret hem sine lenge poslušno. A i daj leskiri sa akala bukja garavela len sine ko po srce. 52 A o Isus bajrola sine ki mudrost, ko telo hem ki blagodat anglo Devel hem anglo manuša.