1 Rano sabajle, ko prvo dive taro kurko, o džuvla lele o mirisija so spreminge len hem ale ko grobo. 2 I arakhle o bar cidimo taro udara e groboskoro. 3 Koga khuge andre, na arakhle o telo e Gospodareskoro e Isuseskoro. 4 I dži kote tergjona sine adathe bunime, taro jekh puti pojavisalile anglo lende duj murša ko parne šeja so svetinena. 5 O džuvla but darandile hem telarge po šero, a ola vakerge lenge: "Soske rodena e dživde maškar o mule? 6 Ov nane akate. Uštilo taro mule! Setinen tumen so vakergja tumenge dži kote sine tumencar ki Galileja: 7 ‘O Čhavo Manušeskoro mora te ovel predajmo ko vasta e grešnikonge hem te ovel čhivdo ko krsto, a o trito dive te uštel taro mule.’" 8 Togaš setinge pe ko lafija e Isuseskere.

9 Koga irange pe taro grobo palal ko gradi, vakerge sa adava leskere dešujekhe apostolenge hem sarinenge so sine adathe. 10 Adala džuvla so vakerge e apostolenge sine i Marija tari Magdala, i Joana, i Marija e Jakoveskiri daj, hem nesave javera. 11 Ama ola na verujnge e romnen, soske mislinge deka sa adava ola izmislinge. 12 A o Petar uštilo hem prastandilo dži ko grobo. Telilo hem dikhla samo o čaršafi so sine leste pakjardo e Isuseskoro telo. I irangja pe palal pučindor pes so sine adava.

13 Ko adava dive duj taro e Isuseskere sledbenikija džana sine ko nesavo gav so vikinela pe Emaus, dur taro Erusalim dešujekh kilometre. 14 Drumaldan kerena sine lafi maškar peste baši sa so ulo akala dive. 15 Dži kote kerena sine lafi maškar peste bašo akala bukja, korkori o Isus alo uza lende hem lela te phirel lencar. 16 Ama lenge na sine dendo te pendžaren le.

17 I o Isus pučlja len: "Baši so kerena lafi dži kote phirena?"

Ola ačhile, a ko lengoro muj dikhlili žalost.

18 Jekh lendar, so vikinela pe sine Kleopa, pučlja le: "Tu sijan jedino jabandžija so na džanela so ulo ko Erusalim akala dive?"

19 O Isus pučlja: "So ulo?"

Ola odgovoringe: "Adava so ulo e Isuseja taro Nazaret. Ov sine proroko zoralo ko pe lafija hem ko pe dejla anglo Devel hem anglo sa o narodo. 20 Ama o prvosveštenikija hem amare vodačija predajnge le te ovel osudimo ko meriba hem čhige le ko krsto. 21 A amen nadingjem amen deka ov tano adava so ka otkupinel e Izraeleskere narodo. A akje više trito dive sar ulo sa adava. 22 Uza ko adava buninge amen nesave taro amare džuvla. Ola gele rano sabajleja ko grobo, 23 ama na arakhle e Isuseskoro telo adathe. I ale hem vakerge amenge deka pojavinge pe lenge angejla so vakerge lenge deka o Isus tano dživdo. 24 Palo adava nesave taro amare gele ko grobo hem arakhle agjar sar so vakerge lenge o džuvla. Ama na dikhle e Isuse."

25 Togaš o Isus phengja lenge: "O sar na svatinena? Soske tumenge pharo te verujnen ko sa adava so o prorokija vakerge? 26 Na trebela li sine o Hristos te nakhavel sa akava pharipe, a palo adava te khuvel ki pi slava?"

27 Togaš počmingja o Isus te objasninel lenge sa soj pišimo e Hristoske ko Sveta Lila, počmindor taro lila e Mojseskoro sa dži ko lila e Prorokongere.

28 Sar avena sine paše uza ko gav Emaus, o Isus kergja pe deka mangela po dur te džal. 29 Ama ola ačhage le vakerindor: "Ačhov amencar, soske počmingja te perel o kham, a i rat više avela!"

I o Isus khugja ko kher hem ačhilo lencar.

30 Koga alo uza ko astali, lela maro, blagodaringja, phagla le hem dengja lenge. 31 Togaš phravdile lengere jakha hem pendžarge e Isuse, a ov taro jekh puti našavdilo anglo lengere jakha.

32 I ola počminge te pučen pe maškar peste: "Na sine li amen jag ko amaro srce dži kote vakerela sine amenge ko drumo hem objasninela sine amenge o Sveta lila?"

33 I odma uštile hem irange pe ko Erusalim. A adathe arakhle e dešujekhe apostolen hem okolen so sine khedime lencar, 34 sar vakerena: "O Gospodari čače uštilo taro mule hem sikavgja pe e Simoneske!"

35 Togaš o duj manuša vakerge lenge sa so ulo ko drumo hem sar pendžarge e Isuse koga phagla o maro.

36 Dži kote panda sine kerena lafi bašo adava, o Isus taro jekh puti pojavingja pe maškar lende hem vakergja: "Mir tumencar!"

37 Ola sine bunime hem darandile, mislindor deka dikhena duho.

38 A ov vakergja lenge: "Soske darana? Hem soske isi tumen sumna ko tumaro srce? 39 Dikhen me vasta hem me pre! Me sijum isto! Pipinen man hem dikhen! E duho nane le telo hem kokala, sar so dikhena man isi man!"

40 Vakerindor akava, sikavgja pe vasta hem pe pre. 41 Ola doborom sine radosna hem čudime deka našti sine te verujnen. Togaš o Isus pučlja len: "Isi li tumen nešto hajbaske akate?"

42 I ola denge le jekh kotor peko mačho. 43 Ov lela hem hala anglo lende.

44 Hem vakergja: "Akavaj adava so vakergjum tumenge dži kote sijum sine tumencar: mora te phergjol sa soj pišimo baši mange ko Zakoni e Mojseskoro, ko lila e Prorokongere hem ko Psalmija."

45 Togaš phravgja lengiri godi te šaj te svatinen o Sveta Lila, 46 i phengja lenge: "Agjar tano pišimo: O Hristos ka cidel hem o trito dive ka uštel taro mule, 47 hem ko leskoro anav ka propovedinel pe o pokajanie bašo oprostiba o grevija sa e narodongere, počmindor taro Erusalim. 48 Tumen sijen svedokija akalestar.

49 A me ka bičhavav tumenge adava so vetingja le mo Dad. Ama ačhoven ko gradi dži kote i sila e Devleskiri na hulela upra tumende."

50 Togaš o Isus legargja pe učenikon paše uza ki Vitanija, i vazdingja pe vasta hem blagoslovingja len. 51 Dži kote blagoslovinela len sine, odvisalilo lendar hem voznesisalilo ko nebo. 52 Togaš ola pele ko kočaka angli leste i ki bari radost irange pe ko Erusalim. 53 Hem sekat sine ko Hrami te slavinen e Devle.