Êxodo 6

1 Ma wọ Ọvaar Ubinọkpaabyi obeni Mosẹs bẹ́, "M’ase ọttọhk f’m’nsi Phero. Amma m’ntima ẹfa chaam nsi-ẹ otte anạng paam ọbọhk abẹ afona. Ẹfa njọ chaam m’isi-ẹ ukhubh bẹ k’ẹkhạma chẹ."

2 Ubinọkpaabyi ọbạra oben Mosẹs bẹ́, "Amma wọ nde Ọvaar Ubinọkpaabyi. 3 Amma wọ wa nyini Abraham, ọttạra Isaak, ọttạra Jekọb abẹ, masẹ Ubinọkpaabyi kw’Ẹfa phyibh. Okhenka, amma eche chaam ch’ede Ọvaar Ubinọkpaabyi nạ́nyaakha nnạng bẹ. 4 Wa mbạra nchekhi bẹ́ m’nnạng bẹ isek s’Kenaan, nnọ s’uwa abẹ arukhu masẹ akhikhennạng. 5 Amma kk’ẹmạng ch’anạng p’Israẹl n’agạma k’ibira ch’abẹ aning k’Ijip mmaanga, amma kk’echekha chaam mbạra njima.

6 "Osenga ma, kpaak anạng p’Israẹl bẹ́, ‘Amma wọ nde Ọvaar Ubinọkpaabyi. Amma wọ m’nnạbha bạnga k’ọkpak-k’ẹdwạngọ kw’anạng p’Ijip. M’mbạra nnạbha bạnga k’ibira ch’abẹ age bạnga. M’ntima ẹfa chaam mmekhi bạnga, mbạra ntima chẹ nsi iponga ijibh bạnga. 7 M’ntạkha bạnga masẹ anạng paam, m’mbạra nde Ubinọkpaabyi kwabạnga. Abạnga m’asenga ma, atin bẹ́, amma wọ nde Ọvaar Ubinọkpaabyi, kw’ode Ubinọkpaabyi kwabạnga, kw’ọrạbh bạnga k’ọkpak-k’ẹdwạngọ kw’anạng p’Ijip age bạnga. 8 Amma m’mbạra ntima bạnga tạrr mkpira k’isisek nnọ s’uwa nchekhi k’ọmmakkarẹ bẹ, m’nnạng Abraham, ọttạra Isaak, ọttạra Jekọb. Amma m’nnạng bạnga isisek nnọ asẹ ide sabạnga. Amma wọ nde Ọvaar Ubinọkpaabyi.’ "

9 Okhenka, masẹ Mosẹs ọtạk idik nnọ ọkpaak anạng p’Israẹl, abẹ khẹ itọhng nakhọma, ukwuru s’ẹfa kk’bẹ ẹsa, ọttạra k’itọhm-kpọhkha sabẹ n’asi.

10 Osenga ma, Ọvaar Ubinọkpaabyi oben Mosẹs bẹ́, 11 "Sọhng ata akpaak Phero, kw’ode ọvaarnạng kw’Ijip bẹ́, tte otte anạng p’Israẹl ọbọhk abẹ abina arik isisek sẹ."

12 Okhenka, Mosẹs ọbạbhọ Ọvaar Ubinọkpaabyi bẹ́, "De anạng p’Israẹl nạn khaam itọhng nákhọma, Phero wọ m’otera ọkhọhm-m itọhng s’amma n’nyekhi ẹbang o?"

13 Wa Ọvaar Ubinọkpaabyi obeni Mosẹs ọttạra Aarọn bẹ́, "Abạnga akpaak ọvaar Phero kw’Ijip ọttạra anạng p’Israẹl bẹ́, amma wọ ntọhmọ bạnga bẹ́, abạnga atima anạng p’Israẹl abina k’Ijip."

Efonamma ch’Mosẹs ọttạra Aarọn

14 Maa wọ ode acho p’mfonamma sabẹ:

Ajunungva p’Reubẹn, kw’ode ochedennwa kw’Jekọb ofonu ade, Hanọk, ọttạra Palu, ọttạra Hẹzrọn, ọttạra Karmi, ẹbọ wa ade efonamma ch’Reubẹn.

15 Ajunungva p’Simeọn ofhonu ade, Jemuyẹl, ọttạra Jamin, ọttạra Ọhad, ọttạra Jakin, ọttạra Zoha, ọttạra Shaul kw’ode nnwa kw’oKenaan-kwanạng ọmaanẹ ọnạng-ẹ. Ma wọ wa ode efona ch’Simeọn.

16 Ajunungva p’Lẹvi ofhonu k’itoru ade, Gẹrshọn, ọttạra Kohat, ọttạra Mẹrari. Phyi-phyibh wa Lẹvi urukhu icho arạbh asajạnẹ ukuma chikhamfa.

17 Ajunungva p’Gẹrshọn ofhonu k’inạmma-k’inạmma ade, Libni, ọttạra Shimei.

18 Ajunungva p’Kohat ofhonu ade, Amram, ọttạra Izha, ọttạra Hẹbrọn, ọttạra Uziyẹl. Phyi-pyibh wa Kohat urukhu acho arạbh isajạnẹ ukuma jobhkantaan.

19 Wa Mẹrari ofhonu ajunungva p’ade, Mali, ọttạra Mushi. Abẹma mbọ abin k’ẹnạmma ch’Lẹvi.

20 Wa Amram ọtạk Jokẹbẹd kw’ode nnwọkka kw’otte kwẹ k’ọbada, kw’ọmaan-ẹ Aarọn ọttạra Mosẹs. Phyi-phyibh wa Amram urukhu icho arạbh asajạnẹ ukuma chikhamfa, brasẹ n’ope.

21 Wa Izha ofhonu ajunungva p’ade, Kọra, ọttạra Nẹphẹg, ọttạra Zikiri.

22 Wa Uziyẹl ofhonu ajunungva p’ade Mishayẹl, ọttạra Ẹlzaphan, ọttạra Sitri.

23 Wa Aarọn ọtạk Ẹlisheba kw’ode uminanwa kw’Aminadab k’ọbada, kw’ọbạra ode nnwọkka kw’Nashọn, ọmaan-ẹ Nadab, ọttạra Abihu, ọttạra Ẹleyaza, ọttạra Itamar.

24 Ajunungva p’Kọra ade, Asir, ọttạra Ẹlkana, ọttạra Abiyasaph, abẹma bọ ade nnạmma s’Kọra.

25 Wa Ẹleyaza kw’Aarọn ofhonu, ọtạk uminanwa wạnọ kw’Putiyẹl k’ọbada, ọmaan-ẹ Phinẹhas.

Abẹma bọ wa ade acho p’ichọhmfhạr s’Lẹvi k’ẹnạmma k’ẹnạmma.

26 Aarọn nwa ọttạra Mosẹs bọ kw’uwa Ọvaar Ubinọkpaabyi obeni bẹ́, "Abạnga atima anạng p’Israẹl abina arik isek s’Ijip, oche kw’abẹ ade k’ọsaabh pfabẹ." 27 Abẹma anạng afa, Aarọn ọttạra Mosẹs bọ wa akpaakhẹ udik atena k’ibina ch’anạng p’Israẹl, anạng Phero kw’ọdạbhẹ k’Ijip.

Aarọn ọkpaakhẹ udik k’echo ch’Mosẹs

28 Masẹ Ọvaar Ubinọkpaabyi ọkpaakhẹ Mosẹs udik k’Ijip, 29 otekh Mosẹs bẹ́, "Amma wọ nde Ọvaar Ubinọkpaabyi. Kpaak ọvaar Phero kw’ode ọvaarnạng kw’Ijip idik nnọ phyibh s’mkpaakh-ọ."

30 Okhenka, Mosẹs ubhin Ọvaar Ubinọkpaabyi bẹ́, "Masẹ amma n’nyekhi ẹbang, m’mkpaak Phero yạn brasẹ ọkhọhm-m itọhng o?"