Nnwẹr s'Osenga 7

1 Ma wọ, Ọvaar Ubinọkpaabyi obeni Mosẹs bẹ́, "Kker e, amma khọ nsia bẹ́ ade masẹ Ubinọkpaabyi k’ititikha s’Phero, nnwakka Aarọn wọ m’ode usi-ẹyaakha kwọ. 2 Kpaak nnwakka Aarọn udik kwidede kw’mkpaakh-ọ, ọfha ẹma oben Phero otte anạng p’Israẹl ọbọhk, abẹ abina arik ẹkhạma chẹ. 3 Okhenka, amma m’nsi Phero ọbạr ettem. Chibhi s’m’nsi nkhọhkha saabhada, ọttạra ikkukkona-dik k’ọsaabh, ọttạra idik s’m’ipe anạng ifor k’Ijip, 4 Phero khọ itọhng mọ́khọhmọ. Ma wọ m’nsi ijoradik k’Ijip, mbạra ntima ẹfa chaam nnạng aJip-nạng irem sididen, ntima ikhaana s’anạng paam p’ade Israẹl mbina k’Ijip. 5 Anạng p’Ijip m’asonga bẹ́ amma wọ nde Ọvaar Ubinọkpaabyi, k’okpe kw’m’nsi ijoradik k’Ijip, mbạra ntima anạng p’Israẹl mbina."

6 Mosẹs ọttạra Aarọn asi oche kw’Ọvaar Ubinọkpaabyi ọtọhnọ bẹ. 7 Wa Mosẹs ode acho arạbh annebung, Aarọn ode acho arạbh annebung ukuma ittaan k’okpe kw’abẹ akpaakhẹ Phero idik nnọ.

Uchikwura kw’Aarọn ọbhạkhẹ ijọhk

8 Ọvaar Ubinọkpaabyi obeni Mosẹs ọttạra Aarọn bẹ́, 9 "De Phero obeni bạnga bẹ́ abạnga asi ikkukkonadik, ben Aarọn ọtạkha uchikwura kwẹ ọbhạrẹ k’isisek, ma ititikha s’Phero, uchikwura nwọ m’ọbhạkhẹ ijọhk."

10 Ma wọ Mosẹs ọttạra Aarọn afon akhebha Phero, abẹ asi oche kw’Ọvaar Ubinọkpaabyi ọtọhnọ bẹ. Aarọn ọtạkha uchikwura kwẹ ọbhạrẹ k’isisek, ma ititikha s’Phero ọttạra ajukwa pẹ, uchikwura nwọ ọbhạkhẹ ijọhk. 11 Osenga ma, Phero oyeri adiksonga-nạng, ọttạra abọhnganạng p’Ijip, anạng mbọ p’n’asi nkkari o akwu atima ọtaanga kwabẹ, asi ukhira ngwọ gwạnọ. 12 Ọnạng-ọnạng ọbhạrẹ uchikwura kwẹ, achikwura mbọ abạkhẹ ọjọhk. Okhenka, uchikwura kw’Aarọn umyi pabẹ phyibh. 13 Oseng ma, Phero ofon ororo ọbạr ettem, bẹ itọhng nọ́khọma, otor k’oche kw’Ọvaar Ubinọkpaabyi kk’ọkpaakha bạra.

Nkwuru s’isẹ

14 Wa Ọvaar Ubinọkpaabyi obeni Mosẹs bẹ́, "Phero ettem tạm nófhona e; utim ufhum-ufhum bẹ́, otte anạng paam ọbọhk abẹ afona. 15 Sọhng ata akhebha Phero s’m’ọta k’ọraanga k’ekpebha. Ninga ma ẹraangakha atikh-ẹ, atạkha uchikwura nwọ kw’wạra ọbhạkhẹ ijọhk atima k’akhọ k’ọbọhk. 16 Kpaakhẹ bẹ́ "Ọvaar Ubinọkpaabyi, kw’ode Ubinọkpaabyi kw’aHiburu, ọtọhm-m bẹ́ mkpaakh-ọ bẹ́, atte anạng pẹ ọbọhk abẹ afona, ọfha abẹ ata akpobh-ẹ k’ibyi s’anạngn’nárukha. Okhenka, tạrr ukpira mantọmma, itọhng náchera akhọhmọ. 17 Ọvaar Ubinọkpaabyi obeni bẹ́, maa wọ m’atima asonga bẹ́, ẹma wọ ode Ubinọkpaabyi: Amma m’ntima uchikwura nwa kw’ntim k’ọbọhk mvun maa ọraanga kw’Nile, awẹ m’ọbhạkẹ ode isisẹ. 18 Nten s’ining k’Nile m’ipope, ọraanga kw’Nile m’osom iruk ukpira k’oche kw’anạng p’Ijip nạn adạkhẹ mákke agwo."

19 Ma wọ Ọvaar Ubinọkpaabyi obeni Mosẹs bẹ́, "Ben Aarọn bẹ́, Tima uchikwura nwọ kw’atim k’akhọ k’ọbọhk tena k’ọraanga kw’Ijip, ọttạra k’mfhobh, ọttạra k’mmen, ọttạra k’apesi, ọttạra k’ibyi sidede s’asi aber, ọfha apyẹ ẹbhạkhẹ ede isisẹ. Isẹ n’ining k’ibyi sidede k’Ijip tạrr oseng k’nnakpa ọttạra k’atagbagba."

20 Mosẹs ọttạra Aarọn asi obengana k’oche kw’Ọvaar Ubinọkpaabyi ọtọhnọ bẹ. Ma ititikha s’Phero ọttạra ajukwa pẹ, Aarọn udira uchikwura kwẹ uvun ma ọraanga kw’Nile. Asi mbọ phyi-phyibh n’akwu ade isisẹ. 21 Nten s’ọraanga kw’Nile ipe, asi n’asom iruk tạrr anạng p’Ijip dạk kákke agwo. Ijip phyi-phyibh n’ode isisẹ.

22 Okhenka, abọhnganạng p’Ijip atim ọtaanga kwabẹ asi idik nnọ oche ngwọ. Ma wọ Phero ofon ororo ọbạr ettem, itọhng nóchera ọkhọmọ ọnạng Mosẹs ọttạra Aarọn, k’oche kw’Ọvaar Ubinọkpaabyi kk’ọkpaakha bạra. 23 Phero oter ọkpa nnạm ofona k’udimpa kwẹ, idik nnọ k’ettem gigia núgia bạra. 24 Ma wọ anạng p’Ijip phyibh ata atum ape k’ọkhanọkhaan kw’Nile, ọfha abẹ ase asi p’abẹ m’agwo, ukwuru sabẹ nạn adạkhẹ asi p’Nile nákke agwo.

Nkwuru s’ayạrạbọhk

25 Wa iwu isenọfa ikwu iseng s’Ọvaar Ubinọkpaabyi ọbhạkhẹ asi p’Nile ade isisẹ.