Luk 2

22 Ka saŋa n da paa yi ba gbi’im ba mɛŋ dol Moozis wara la, ba da tar Yezu keŋa Geruzalɛm ti zaŋ U te Daan la 23 (a aa la n pɔɣun golih se’em Daan la wara gbauŋ la niŋa la, <<La dɔ' mi yi ba zaŋ burikpɛŋ woo keŋ yendoog ni ti te Daan la>>), 24 ba mi da iŋ kããbug dol Daan la wara la n golih se’em la, <<yi peribale’et bee nanam nangbana ayi?>>

25 Buraa kakɔ̃ n da be Geruzalɛm, ka ka wo’or a Simiyɔn; buraaga da a la ntɔɔ daan, ka zɛ' dɔ’ɔ Na’ayen tɔɔn, u putẽ’ẽr da a la Izirɛal buuri la leb Na’ayen sa’ani, Vo’ohun som Sii la da be ni u mi. 26 Vo’ohun Som Sii la da poɣun deŋ nɛɛ te u mi, ka yel u yii; un pu nyɛ Daan la n a Krista laa, u kun kpii. 27 Vo’ohun Som Sii la n da be ni Simiyɔn la, u da bah ka u keŋ kpɛ̃ yendoog la ni. Ka Yezu dɔɣɔrib la da tar Yezu mi kpɛ̃ yendoog la ni na, yi ba malim a aa wara la n pa’al se’em la. 28 Simiyɔn da dɛ’ɛ bii la mi, ka na’ahit Na’ayen, yet yii,

29 <<Kpe’eoŋ zã’ã Daana, nan-nan na, I pana tɔ’ɔn bah I ntomit la, ka u kpi ni suma’ahum,

a aa I yetɔɣum la n yel se’em la;

30 se’el n so la mam nini nyɛ I fããgir la,

31 se’er ka I maahum dɔ’ɔl nirisaal woo tɔɔn la,

32 I a la nɛɛhum liligit pa’an seba n ka' Izirɛal buuri la,

ka a pɛ̃k tet Izirɛal buuri?>>

33 La da iŋ Yezu dɔɣɔrib la la pakir ni Simiyɔn n yet se’el yit Yezu nina la. 34 Ka Simiyɔn da kamaal ba ka yel Mɛɛri, Ka ma la yii, <<Nirikooŋ Izirɛal poŋi luu ni ba dɔɔgir nan yi la bi-kãã la wa nina, ka la mi nan a dããlun se’eog ka nirib nan tɔɣɔ gɛ̃ɛ̃h U, 35 ka la nan bah ka nirib putẽ’ẽra ni ba sũya nɛɛ, ka so’o nan kuh i mɛŋ sũh?>>

36 Na’ayen nɔdɛ’ɛh-pɔk mi n da be ni, u wo’or da a la Anna, ka u a Fanewɛl pɔɣɔwɔɔ, ka ba buuri a Assa. U da korig mi, u mi da kpɛ̃' ni u ser paa la woma ayopoi ka u ser la kpi, 37 ka u da pana a pɔkɔ̃ɔ̃r ka be ti paa wom pihinii ni anaahi. U da pu malegun bahit yendoog laa, ka u da na’ahit Na’ayen mi loot nɔɔr, ka po’ohit wo’oŋ ni wuntɛɛŋ. 38 Sankaŋ la, u da paa niŋa, ka pĩ’ĩl pɛ̃ɣɛt Na’ayen, ka tɔɣɔt tet nirib la Yezu yela, seba woo n da ɛɛt yi Geruzalɛm nyɛ fããgir la.