João 13

Ayesu atendakwajelejea makongono bhabhachijigana bhabhe

1 Pajikibha jibhandikile lichobha likolongwa lya Pasaka pagukahika. Ayesu akaimanya muda gwa kubhoka mu chilambo heche na kujaula kwa Atati gutekuika. Akibha atenditakwapala bhandu bhabhe bhabhabhilinge pachilambo, kweli, akaapalanga mpaka kupela kwa umomi gwabhe.

2 Bahi, Ayesu na bhabhachijigana bhabhe, bhakatamanga kulyee ndalilo. Abohu akaajambua Ayuda Isikalioti, mwana jwa Asimoni, jwakaagaluka Ayesu. 3 Ayesu kongo abhi kuimanya kubhee Atati abhekite hilebhe yoha pahi ja ukolo gwabhe. Na akahimanya kubhee abhoka kwa Annoongo na atenditakubhuja kwa Annoongo. 4 Bahi, akaleka kulyee, akahula chiwalo chebhe cha panja, akatola chitambaa cha kujomea machi na akachibha ngobho ja kuchihungutila machi. 5 Ngapena akalekela machi mubakuli kolongwa na akajemeka kwajelejea bhabhachijigana bhabhe makongono na kwaahuta kwa chitambaa chenichela chibhakachitabha muchibhuno. 6 Bahi, pabhakanhikila Asimoni Petulo, Apetulo akaakonya, "Hangwana, upakunyelejea na nenga makongono?"

7 Ayesu akaajangula, "Chindenda nangocheni mwenga ngachimanya, nambo mpakuimanya muuda guguhika."

8 Apetulo akalobholela, "Ng’o mwenga nganyelejea makongono gangu!"

Ayesu akaajangula, "Handa nganyelejea makongono ginu ngakwelekana na nenga kabhele."

9 Ngapena Asimoni Petulo akaajangula, "Hangwana, nkotokunyelejea makongono gangu jika, nambo hela hela mutwe gwangu pamo na mmele goha!"

10 Ayesu akaalobholela, "Mundu jwajogite ngapaalikwa kujoga kabhele apalikwa kua makongono, kwa kubhee mmele gwake gwoha nga gutekuhalala. Mwangota ntekuhalalanga, nambo ngabha bhoa." 11 Ayesu akibha atendakummanya jonijola jwapakung’aluka, nga kwa kubhee akalobhola henela, "Mwangota ntekuhalalanga, nambo ngabha bhoa."

12 Ayesu pabhakajomola kwajelejeanga mkongono gabhenji, akawala ngobho jabhe kabhele, akabhuja pachakulya pabhakibha. Akaakonyanga, "Bholi, mmanyanga genago ganakantendelanga?" 13 Mwangota nngemanga nenga, "Bhannyigana na Hangwana, mwangota nnongelanga maha, ligongo nenga nga jonojwe. 14 Bahi, handa chindekubhee Hangwana na Bhannyigana bhinunji ndekunyelejeanga mwangota makongono, na mwangota hela hela mpalikwanga kujelejeananga makongono ginunji. 15 Ndekunnangianga yakubhehe, na mwangota ntendage henela handa chindekuntendelanga mwangota. 16 Kweli ndendakunnobholelanga, abhanda nga nkolongwa kupunda mwe akolo bhabhe, na antumichi nga nkolongwa handa jonijola jwantumite. 17 Nangocheni kwa kubhee mmanyitinge hikubho yakutenda, Annoongo apakuntendelanga gammbone handa mpakugatendanga."