13 Bhandu bhakaaletela Ayesu bhana bhachoko bhachoko ili bhakombole kwakwaanga, nambo bhanapunji bhabhe bhakaakalipilanga. 14 Ila Ayesu pabhakabhona henela, bhakatumbala bhakaalobholelanga bhanapunji bhabhe, "Mwalekange bhana bhachoko bhahikange kwaachangu, wala nkotokwahibhilanga, kwakubhee bhandu bhabhalinge handa bhana bhachoko habha nga bhabhapakujingilanga mu ukolo gwangu.