Marcos 10

Ayesu bhaalamia bhangalola Abatimayo

46 Bahi, bhakahikanga mu chilambo cha ku Yeliko, Ayesu na bhanapunji bhabhe pamo na nkutuli nkolongwa gwa bhandu pabhakibha bhatendakubhoka mu chenichela chilambo, bhakakongana na bhangalola bhamo, bhakemitwa Abatimayo, mwana jwa Atimayo, bhakibha bhatamite ngulugulu mwa ndela bhabhikujopa bhandu bhaajangatile hilebhe. 47 Pabhakajoa kubhehe nga Ayesu bha ku Nazaleti bhatendita kupeta, bhakajemeka kupalia lilobhe bhabhikulobhola, "Mwenga Ayesu, Mwana jwa Adaudi, ngoleekiha!"

48 Bhandu bhajingi akaakalipila ili akotoke, nambo bhena akapunda kukweha lilobhe, "Mwenga, Ayesu Mwana jwa Adaudi ngoleekiha!"

49 Ayesu bhakajema na kulongela, "Munkemange bhahike."

Henela bhakaakemanga bhenibhala amundu bhangalola na kwaalobholela, "Nchipee ntima!" bhakaalobholela, "Nyimuke, bhatendakunkema."

50 Na bhena bhakajijea jenijela ngobho jabhe, bhakahomba nnani, na kwaajendelela Ayesu.

51 Ayesu akaakonya, "Mpala nintedelee chiniki?"

Bhena bhangalola bhakajaangula, "Bhannyigana, ndendakunnyopa ngombole kulola."

52 Ayesu akaalobholela, "Nnyaule, kuhobhalela kwinu kutekunnamia."

Popopo bhenibhala bhangalola bhakajemeka kulola, bhakaakagula Ayesu nndela.