1 Mchaka cha khumi ni visano va ulamulilo wa mfumu Tibelio, Pontio Pilato wadali wamkulu wa mujhi wa ku Yudea, ni Helode wadali wamkulu wa ku Galilaya, ni mbale wake Filipo wadali wamkulu wa ku dela la Itulea ni Tilakoniti, ni Lusania wadali wamkulu wa ku Abilene, 2 ni Anasi ni Kayafa adali Anjhembe wakulu. Nyengo imeneyo mawu ya Mlungu yadamjhela Yohana, mwana wa Zakalia kujha kuchipululu. 3 Ndiipo, Yohana wadapita mmadela yonjhe ya mbhepete mwamchinje Yolodani kulalikila wandhu asiye machimo ni kubatizidwa, kuti Mnungu waalekelele machimo yawo. 4 Ngati umo yalembedwa mchikalakala cha mlosi Isaya,

"Mundhu wakweza mvekelo kuphululu,

‘Mkonjeleni Ambuye njila yake,

tambasulani malo yayo siwapite.

5 Gombe lililonjhe silikwililidwe,

mapili ni mitandha yonjhe siyasawazichidwe,

yapo papindika sipaongoledwe,

njila zoyipa sizikonjedwe ni kukhala bwino.

6 Ni wandhu onjhe sauone uomboli wa Mnungu!’"

7 Ndiipo Yohana wamaakambila gulu lijha la wandhu ilo lidafika kuti libatizidwe, "Imwe mibadwa ya njoka! Yani uyo wakukambilani kuti simkhoze kuthawa mbhwayi za Mnungu izo zikujha? 8 Ngati mujha mtengo wa vipacho ufunika kubala, nianyiimwe mlangize kwa vichito kuti mwasiya machimo yanu. Osati muyambe kujhikambila mmitima mwanu kuti, ‘Tilinawo ambuyathu Ibilahimu.’ Nikukambilani kuti Mnungu wakhoza kuichita miyala iyi kukhala mbadwa wa Ibulahimu. 9 Chimwecho, nghwangwa yaikidwa tayali pamuzo wa mtengo. Chimwecho, mtengo ulionjhe uwo siubala vipacho vabwino siudulidwe ni kuponyedwa pamoto."

10 Gulu la wandhu lijha lidamfunjha, "Chipano ifunika tichite chiyani?" 11 Yohana wadayangha, "Uyo wali ni njhalu ziwili wamgawile uyo walibe, ni uyo wali ni chakudya wamgawile uyo walibe." 12 Wolandila malipilo naonjho adafika kuti abatizidwe, adamfunjha, "Oyaluza, ni ife ifunika tichite chiyani?" 13 Iye wadaakambila, "Msadalandila malipilo yayakulu kupitilila yayo mwakambilidwa." 14 Asikali naonjho adamfunjha Yohana, "Ni ife tichite chiyani?" Naye wadaayangha, "Msadatenga vindhu vamundhu waliyonjhe kwa kulanda kapina kwa kumnamizila, nambho mukwanilichidwe ni mikokolo yanu."

15 Wandhu amalindilila kujha kwa Kilisito uyo wasanghidwa ni Ambuye, ni adajhifunjha mmitima mwao nghani za Yohana niakamba kapina iye nde Kilisito muomboli uyo wadaahidi Mnungu. 16 Yohana wadakambila wonjhe, "Ine nikubatizani kwa majhi, nambho wakujha uyo wali ni mphavu kupitilila ine, uyo ine sinifunika kumasula vingwe va malapasi yake. Iye siwakubatizeni kwa Mzimu Woyela ni kwa moto. 17 Naye wali ni lichelo lopetela mmanja mwake, ni malo yopetela siwapayeleche kupunda, siwakuse mpunga wabwino ni kuika mnghokwe. Ni siwakuse nghupete ni kuzibucha mmoto uwo siuthimika."

18 Chimwecho, kwa mawu ina yochuluka, Yohana wamanyindila wandhu yapo wamauzila Uthenga Wabwino. 19 Nambho Yohana yapo wadamnyindila mfumu Helode, ndande ya kumkwata Helodia, mkazi wa m'bale wake, ni voipa yonjhe ivo wamachita, 20 ndipo Helode wadachulucha kuchita voipa, pakumuika Yohana mndende.

21 Yapo wandhu wonjhe adali kubatizidwa, Yesu nayonjho wadabatizidwa. Ni yapo wadali kupembhela, kumwamba kudachekuka. 22 Ndiipo Mzimu Woyela uwo umaoneka ngati nghunda udamchikila. Ni mvekelo kuchokela kumwamba udaveka, "Iwe nde mwana wanga uyo nikukonda, nakondelechedwa ni iwe."

23 Yesu yapo wadayamba njhito yake wadali ni vyaka selasini. Ni wandhu amajhiwa kuti iye ni mwana wa Yusufu, mwana wa Heli. 24 Heli wadali mwana wa Matati, ni Matati wadali mwana wa Lawi, ni Lawi wadali mwana wa Meleki, ni Meliki wadali mwana wa Yanai, ni Yanai wadali mwana wa Yosefu, 25 ni Yosefu wadali mwana wa Matatiya ni Matatiya wadali mwana wa Amosi ni Amosi wadali mwana wa Nahumu ni Nahumu wadali mwana wa Hesili ni Hesili wadali mwana wa Nagayi 26 ni Nagayi wadali mwana wa Maati ni Maati wadali mwana wa Matatia ni Matatiya wadali mwana wa Shemeni ni Shemeni wadali mwana wa Yoseki ni Yoseki wadali mwana wa Yoda 27 ni Yoda wadali mwana wa Yohamani ni Yohamani wadali mwana wa Lesa ni Lesa wadali mwana wa Zelubabeli ni Zelubabeli wadali mwana wa Shelitieli ni Sheliteli wadali mwana wa Neli 28 ni Neli wadali mwana wa Meliki ni Meliki wadali mwana wa Adi ni Adi wadali mwana wa Kosamu ni Kosamu wadali mwana wa Elimadamu ni Elimadamu wadali mwana wa Eli 29 ni Eli wadali mwana wa Yoshuwa ni Yoshuwa wadali mwana wa Eliezeli, ni Eliezeli wadali mwana wa Yolimu, ni Yolimu wadali mwana wa Matati ni Matati wadali mwana wa Lawi 30 ni Lawi wadali mwana wa Simioni ni Simioni wadali mwana wa Yuda ni Yuda wadali mwana wa Yusufu ni Yusufu wadali mwana wa Yonamu ni Yonamu wadali mwana wa Eliyakimu 31 ni Eliyakimu wadali mwana Melea ni Melea wadali mwana wa Mena, ni Mena wadali mwana wa Matasa ni Matasa wadali mwana wa Nasani ni Nasani wadali mwana wa Daudi 32 ni Daudi wadali mwana wa Yese ni Yese wadali mwana wa Obedi ni Obedi wadali mwana wa Boazi ni Boazi wadali mwana wa Sulemani, ni Sulemani wadali mwana wa Nashoni 33 ni Nashoni wadali mwana wa Abinadabu ni Abinadabu wadali mwana wa Adimini ni Adimini wadali mwana wa Alini, ni Alini wadali mwana wa Hesiloni ni Hesiloni wadali mwana wa Pelesi ni Pelisi wadali mwana wa Yuda 34 ni Yuda wadali mwana wa Yakobo ni Yakobo wadali mwana wa Isaka ni Isaka wadali mwana wa Abulahamu ni Abulahamu wadali mwana wa Tela ni Tela wadali mwana wa Naholi 35 ni Naholi wadali mwana wa Selugi ni Selugi wadali mwana wa Leu ni Leu wadali mwana wa Pelegi, ni Pelegi wadali mwana wa Ebeli, ni Ebeli wadali mwana wa Shela 36 ni Shela wadali mwana wa Kainamu ni Kainamu wadali mwana wa Alifakisadi ni Alifakisadi wadali mwana wa Shemu ni Shemu wadali mwana wa Nowa ni Nowa wadali mwana wa Lameki 37 ni Lameki wadali mwana wa Mesusela ni Mesusela wadali mwana wa Henoki ni Henoki wadali mwana wa Yaledi ni Yaledi wadali mwana wa Mahalaleli ni Mahalaleli wadali mwana wa Kenani 38 ni Kenani wadali mwana wa Enoshi ni Enoshi wadali mwana wa Seti ni Seti wadali mwana wa Adamu ni Adamu wadali mwana wa Mnungu.