Abọọñanwaan Seba Adise Sọlọmọn
1 Ke ini akwa abọọñanwaan Seba akekoppo etob abaña Sọlọmọn, anye amaadi Yeruselem adidomo Sọlọmọn idomo ye ñkpọsọñ mbuume. Ke anye adisịmme ye ataa uwak udịm mbonisañ, ye mme kamel e-ebiommo mme anemufịk mfiọññọ, uwak ibad kold, ye mme nsọñudua itiad; anye amaadi abịne Sọlọmọn anyʌñ adineme ye anye abaña afịd se ikisịne anye ke esịd. 2 Sọlọmọn amaabọọrọ afịd mbuume amọ; ibaaha se ikisọñ ikan anye adinam nọ anwaña anye. 3 Ke ini akwa abọọñanwaan Seba akekịtte aniọñ Sọlọmọn, akọrọ ye ufọkadidem a-anye akebọppọ, 4 ndidia ke akpokoro amọ, naña mme adaaha amọ etie, mme nditọufọk ye mme nsiine ammọ, mbon ukama kọọb ye mme nsiine ammọ ye mme ufọfọb uwa ake anye akenamma ke tembịd Abọọñ, idem amaakpa anye ataa eti-eti.
5 Anye amaabo adidem, "Mbʌk a-ami ñkekoppo ke idʌñ mmi mbaña mme ñkpọ se afo anam ye aniọñ a-afo anieghe ado akpanikọ. 6 Ado ami ñkinịmme se ammọ eketañ tutu ami ndi ndikịt ke anyen mmi. Ke adinekke ntañ, awo ikindọkkọke kpak mbakka iba naña aniọñ mfo akpon; amenekke aka anyan akpọñ mbʌk ake ami ñkekoppo. 7 Ana ado mbon mfo enekke ekop ataa inemesịd! Mme adaaha mfo, e-edaaha ke iso mfo afịd ini enyʌñ ekop aniọñ mfo, e-ekop ataa inemesịd! 8 Itooro anie Abọọñ Abasi mfo, ake anemme esịd ye afo anyʌñ unịm fiin ke ebekpo amọ nte adidem adikara nnọọ Abọọñ Abasi mfo. Ke ntak ima a-Abasi mfo anieghe anọ Isrel ye uduak amọ adimʌm ammọ ñkama ke nsi-nsi, anye anam afo ado adidem anọ ammọ, nọ afo anam unen ye adinenido esọọñọ eda."