23 Ndin Ebraham amaasaña akpere anye anyʌñ abo, "Nte Afo ayaasobo ndinen awo ye mbon ibak? 24 Adieke eyọhọke awo aba mme duob se inen ke abio ado-o? Afo ayaasʌk asobo anye me ayaadakka anọ abio ado ke ntak awo aba mme duob ado? 25 Nsaa mfo-o, afo adinam utọ ñkpọ ado, adiwot ndinen awo ye mbon ibak ukem-ukem, adinam ye ndinen awo ukem naña anam ye mbon ibak. Nsaa mfo-o! Afo nte akpeikpe afịd ederimbod uduunamma se ifọn?" 26 Abọọñ amaabọọrọ, "Adieke ami ñkịtte ndinen awo aba mme duob ke abio Sọdọm, ami ñyaadakka nnọ afịd abio ado ke ntak ammọ." 27 Ebraham amaamaana asio uyio abo: "Idaha a-adooho ami mmenie uko aditañ ikọ ye Abọọñ, akpesʌkado ami ndooho ñkpọ ñkan abu ye ntọñ, 28 adieke ibad ndinen awo asịppe akan aba mme duob ke ñkpọ nte awo ition-o? Afo ayaasʌk asobo afịd abio ke ntak awo ition adisiọọd?" Anye amaabo "Adieke ñkịtte awo aba mme ition do, ami ndiisoboke anye." 29 Ini keed mfen Ebraham amaatañ ikọ ye anye abo, "Akpedo anam anye ado awo aba ke afo akịt do-o?" Anye amaabo, "Ke ntak awo aba ado, ami ndiinamma." 30 Ndin anye amaabo, "Yak Abọọñ akuuyat esịd, ado yak ami ntañ ikọ. Adieke akịtte awo edịb mme duob kpọd do-o?"

Anye amaabọọrọ, "Ami ndiinamma adieke ñkịtte awo edịb mme duob do."

31 Ebraham amaabo, "Idahami sia ami mmenie uko aditañ ikọ ye Abọọñ, adieke adooho awo edịb kpọd ke afo akịt do-o?"

Anye amaabọọrọ, "Ami ñkpekịt awo edịb do, ami ndiisoboke anye."

32 Ndin anye amaabo, "Yak Abọọñ akuuyat esịd, ado yak ami ntañ akañ keed ami. Adieke adooho awo duob kpọd ke akịt do-o?"

Anye amaabọọrọ "Ke ntak awo duob ado, ami ndiisoboke anye."

33 Ke Abọọñ amaaketañ ikọ ama ye Ebraham, anye amaadakka, ndin Ebraham amaanyọñ ufọk.