1 तब इयोबले आफ्नो बहस जारी राखे:

2 "सर्वशक्तिमान् परमेश्‍वर जीवित हुनुभएझैँ,

जसले मेरो न्याय गर्नलाई इन्कार गर्नुभएको छ,

र मेरो जीवन तितो बनाइदिनुभएको छ,

3 जबसम्म मभित्र जीवन रहन्छ,

र परमेश्‍वरको सास मेरा नाकमा रहन्छ,

4 मेरा ओठले कहिल्यै पनि खराबी बोल्नेछैन,

मेरो जिब्रोले झूटो कुरा उच्‍चारण गर्नेछैन।

5 तपाईंहरू ठिक हुनुहुन्छ भनी म कहिल्यै मान्‍नेछैनँ;

म नमरुन्जेल मेरो निष्‍ठालाई म इन्कार गर्नेछैनँ।

6 म मेरो धार्मिकतालाई कायम राख्नेछु र त्यसलाई कहिल्यै छोड्नेछैनँ;

म बाँचुन्जेल मेरो विवेकले मलाई धिक्‍कार्नेछैनँ।

7 "मेरो शत्रु दुष्‍टजस्तै,

र मेरो विरोधीचाहिँ अधर्मीजस्तै होऊन्!

8 किनकि जब ईश्‍वरहीन मानिस नाश हुन्छ, तब त्यसको के आशा हुन्छ र?

जब परमेश्‍वरले त्यसको जीवनलाई लिनुहुन्छ,

9 तब त्यसमाथि कष्‍ट आइलाग्दा,

के परमेश्‍वरले त्यसको विलाप सुन्‍नुहुनेछ र?

10 के त्यसले सर्वशक्तिमान्‌बाट आनन्द पाउनेछ र?

के त्यसले सधैँ परमेश्‍वरको नाम पुकार्नेछ र?

11 "म तपाईंहरूलाई परमेश्‍वरको शक्तिको विषयमा सिकाउनेछु;

सर्वशक्तिमान्‌का मार्गहरू म लुकाउनेछैनँ।

12 तपाईंहरू आफैँले यो कुरा देख्नुभएको छ।

तर पनि तपाईंहरू यस्ता व्यर्थका कुराहरू गर्नुहुन्छ।

13 "परमेश्‍वरले दुष्‍ट मानिसहरूको यस्तो दशा तोक्नुहुन्छ,

निर्दयी मानिसले सर्वशक्तिमान्‌बाट प्राप्‍त गर्ने उत्तराधिकार यही हो:

14 त्यसका छोराछोरीहरू जति धेरै भए तापनि त्यसको अन्त्य तरवारद्वारा हुनेछ;

त्यसका सन्तानहरूसँग कहिल्यै पनि प्रशस्त भोजन हुनेछैन।

15 अनि बाँचेकाहरूलाई रूढीले चिहानमा लानेछ,

र त्यसका विधवाहरूले त्यसका निम्ति शोक गर्नेछैनन्।

16 त्यसले धुलोसरी चाँदी थुपारे तापनि

माटोको थुप्रो जतिकै लुगाफाटा थुपारे तापनि

17 त्यसले थुपारेका कुराहरू धर्मीहरूले पहिरनेछन्,

र निर्दोषहरूले त्यसको चाँदी बाँडचुँड गर्नेछन्।

18 त्यसले बनाएको घर माकुराको जालजस्तै कमजोर हुन्छ,

पहरेदारले बनाएको झुपडीजस्तै हुन्छ।

19 दुष्‍ट धनी भएर सुत्छ, तर अब उसो त्यसले गर्न सक्नेछैन;

त्यसले आफ्नो आँखा खोल्दा सबै गइसकेका हुनेछन्।

20 भलबाढीले जस्तै त्यसलाई त्रासले हताश पार्नेछ;

आँधीले रातमा त्यसलाई खोसेर टाढा लैजानेछ।

21 पूर्वीय बतासले त्यसलाई उडाएर लैजान्छ, र त्यो रहँदैन;

बतासले त्यसलाई उसको ठाउँबाट सोहोरेर लैजानेछ।

22 बतासको शक्तिबाट त्यो टाढा भागे तापनि

बतास त्यसको विरुद्धमा दया नदेखाई जाइलाग्नेछ।

23 बतासले त्यसलाई उपहासको थपडी मार्नेछ,

र सुसेल्दै त्यसको ठाउँबाट त्यसलाई हटाउनेछ।"