Mateus 18

21 Ekem Pita adaha etiene Enye onyuñ obup Enye ete, "Ọbọñ, ikafañ ke ami ñkpadahado nnọ eyen ete mi emi eduede mi? Ikatiaba?"

22 Jisọs ama ọbọrọ enye ete, "Ami ndọhọ fi nte idighe ikatiaba, edi utim ata ye efuteba."

23 "Ke ntre, ekeme ndida Obio Ubọñ Abasi ndomo ye Edidem emi ebierede ndinam ibat okuk ye ifin esie. 24 Ke ini enye ọtọñọde ndinam ibat okuk emi, ema eda owo isọn kiet edi emi akakamade enye ñkpọ nte tọsin ekpat okuk. 25 Sia enye mikekemeke ndisio isọn oro, eteufọk esie ama ọnọ uyo ete yak enyam enye, ye ñwan esie ye nditọ esie, ye kpukpru inyene esie eda esio isọn esie." 26 Ofin oro ama ọduọ ke iso eteufọk esie onyuñ atuak ibuot ọnọ enye, onyuñ ọdọhọ enye ete, "O, ete mbọk, nyene ime ye ami ndien ñyesio kpukpru isọn mi.

27 Ntem ke eteufọk esie okokop mbọm abaña enye, onyuñ ayak enye ọnyọñ, onyuñ adahado ọnọ enye ke isọn esie."

28 "Edi kadaña emi owo oro ọkpọñde eteufọk esie, enye ama okokut eyen ufọk mmọ kiet emi akakamade enye okuk ikie, enye ama onyuñ omum enye ke itọñ, efik ekpere ndiwot enye, onyuñ ọdọhọ enye ete, ‘kpe mi se afo akamade mi!’

29 Owo oro ama ọduọ ọtọñọ edọñ onyuñ ekpe enye ubọk ete ‘Nyene ime ye ami ndien ñyekpe fi kpukpru.’ "

30 Edi enyene okuk emi ikenyimeke ndibet. Enye ama anam emum akama isọn oro enyuñ esin ke ufọk ñkpọkọbi tutu enye ekpe okuk esie ofuri ofuri.

31 Mmọdo ke adaña emi nditọ ete esie ekekutde se iketibede, mmọ ema efuhọ eti eti, enyuñ emen eketiñ enọ eteufọk mmọ kpukpru se iketibede. 32 Ndien eteufọk ama okot enye edi, onyuñ ọdọhọ enye ete, afo idiọk eyen ufọk. Ami mma ndahado ke kpukpru isọn fo nnọ fi, koro afo ekebeñede mi, 33 nte, afo ñko ukpunyeneke mbọm unọ eyen ufọk mbufo kiet, kpa nte ami ñkenyenede ye afo.

34 Ndien eteufọk ama ayat esit ye enye, onyuñ ayak enye ọnọ esin ke ufọk ñkpọkọbi tutu enye osio ofuri isọn esie. 35 Kpasuk ntre ke Ete Mi emi odude ke enyọñ edinam ye mbufo edieke mbufo esinde ke akpanikọ ndidahado nnọ nditọ ete mbufo ke ndudue mmọ ke ofuri esit.