Mateus 21

Jisọs Ọdọk Aka Jerusalem

1 Nte Jisọs ye mbet Esie ekperede Jerusalem, mmọ ema edisim Betfek ke obot Ọlif; Jisọs ama ọdọñ mbet Esie iba, 2 onyuñ ọdọhọ mmọ ete, "Eka ekeduk ke ekpri obio iñwañ emi adade ko ke iso ndien ema enyuñ ededuk mbufo eyekut ekpri enañ mbiomo eyirede ye eyen esie etat mmọ eda esọk Mi. 3 Edieke owo baba kiet obupde mbufo ñkpọ ekededi, ebọrọ enye ete ke edi Ọbọñ oyom mmọ, ndien enye eyeyak mmọ ọnọ mbufo ke usọp."

4 Ñkpọ emi akada itie man okosu ye se mme Asiak Uduak Abasi eketiñde enim ete, 5 "Edọhọ eyenañwan Sayọn ete, sese Edidem mbufo kedi ebine mbufo, Enye edi ke nsuhọde idem, onyuñ awat ke enañ mbiomo, ye ke enyọñ eyen enañ mbiomo."

6 Mbet iba oro ema eka ekenyuñ enam nte Enye eketemede mmọ. 7 Mmọ ema eda enañ mbiomo ye eyen enañ mbiomo oro edi, ndien ebri mme ọfọñidem mmọ ke edem mmọ, ndien Jisọs ama ọdọk etie mmọ ke edem. 8 Ata akwa otu owo oro ema ebri mme ọfọñ idem mmọ ke ọkpọusuñ, ke ini ndusuk eken ekekpide mme ñkọk eto, ebon ke usuñ.

9 Mme otu owo emi ekebede Enye iso, ye mmọ emi eketienede Enye ke edem ema efiori ete, "Osana enyene Eyen Defid! Abasi ọdiọñ Enye emi edide ke Enyiñ Ọbọñ! Osana ke ata enyọñ!"

10 Ke ini Jisọs ama okoduk Jerusalem, ofuri obio ama otime ndien ema ebup ete, "Anie ededi emi?"

11 Ndien otu owo ema ebọrọ ete, "Edi Jisọs, Asiak Uduak Abasi emi otode Nasaret ke Kalili."