Mateus 8

28 Edi ke ini Jisọs osimde edem inyañ eken ke idut ke Kadarin, owo iba emi ekeyọhọde ye ndiọi spirit (dimọn) ema esaña eto efak mme udi ekesobo ye Enye. Mmọ emi ema enyene ndik eti eti, nte baba owo ndomokiet mikekemeke ndisaña ke usuñ oro mbe.

29 Mmọ ema etuak eda enyuñ efiori ete, "Nso ke ñnyin inyene ndinam ye Afo, Afo Eyen Abasi? Nte Afo edi ndituhọde ñnyin mbemiso ini ñnyin edikem?"

30 Ke nsañade nda esisit, otu edi ema edu, ke edia udia. 31 Ndien mme ndiọi spirit oro ema ekpe Jisọs ubọk ete, "Edieke Afo edibinde ñnyin isioño, nam ñnyin ika ikoduk ke otu mme edi."

32 Jisọs ama ọdọhọ mmọ ete, "Eka ndien!" Ndien mmọ ema ewọñọ ekeduk mme edi ke idem, ndien ofuri otu edi ema efeñe esuhọde ke ebedeñ ekeduọñọ edọñọ ke ñkpọdiọhọ mmọñ enyuñ ekpaña. 33 Edi mme ọbọk edi ema efeñe eka obio eketiñ ofuri se iketibede ye mmọ ye se iketibede ye mme mmọ oro ndiọi spirit ekeduñọde mmọ ke idem. 34 Ke ntak emi ofuri obio ema ewọñọ edi edisobo ye Jisọs, enyuñ ekpe ye Enye ete yak Enye ọkpọñ ñkanñkuk obio mmimọ.