1 यहोवा के परसंसा करव।*

मेंह सीधवा मनखेमन के मंडली म अऊ सभा म

अपन पूरा मन से यहोवा के परसंसा करहूं।

2 यहोवा के काममन महान एं;

जऊन मन ओ काममन ले खुस होथें, ओमन ओ काममन के ऊपर बिचार करथें।

3 ओकर काममन महिमामय अऊ सानदार अंय,

अऊ ओकर धरमीपन हमेसा बने रहिथे।

4 ओह अपन अद्भूत काममन के सुरता कराय हवय;

यहोवा ह अनुग्रहकारी अऊ दयालु अय।

5 ओह ओमन ला जेवन देथे, जेमन ओकर भय मानथें;

ओह अपन करार ला हमेसा सुरता रखथे।

6 ओह दिगर जाति के मनखेमन के भुइयां अपन मनखेमन ला देके

अपन काम के सक्ति ला देखाय हवय।

7 ओकर हांथ के काममन बिसवासयोग्य अऊ नियाय के अंय;

ओकर जम्मो नियममन बिसवासयोग्य अंय।

8 ओमन सदा-सर्वदा अटल रहिहीं,

ये कानूनमन बिसवासयोग्यता अऊ ईमानदारी से बनाय गे हवंय।

9 ओह अपन मनखेमन ला पाप ले छुटकारा दे हवय;

ओह अपन करार ला हमेसा बर ठहिराय हवय—

ओकर नांव पबितर अऊ अद्भूत अय।

10 यहोवा के भय मनई बुद्धि के सुरूआत ए;

ओ जम्मो, जऊन मन ओकर नियममन ला मानथें, ओमन अपन म सही समझ रखथें।

ओकर महिमा सदाकाल तक होवत रहय।