1 यहोवा बर एक नवां गीत गावव;

हे धरती के जम्मो मनखेमन, यहोवा बर गावव।

2 यहोवा बर गावव, ओकर नांव के परसंसा करव;

ओकर उद्धार के सुसमाचार हर दिन सुनात रहव।

3 जाति-जाति के मनखेमन के बीच म ओकर महिमा के,

अऊ जम्मो मनखेमन के बीच म ओकर अद्भूत काम के बखान करव।

4 काबरकि यहोवा ह महान अऊ अति परसंसा के योग्य अय;

ओह जम्मो देवतामन ले जादा भय के योग्य अय।

5 काबरकि जाति-जाति के जम्मो देवतामन सिरिप मूरती अंय,

पर यहोवा ह स्वरग ला बनाईस।

6 सोभा अऊ वैभव ओकर आघू म हवय;

ताकत अऊ महिमा ओकर पबितर-स्थान म हवय।

7 हे जाति-जाति के जम्मो परिवारमन, यहोवा के बखान करव,

यहोवा के महिमा अऊ बल के बखान करव।

8 यहोवा के नांव के मुताबिक ओकर बखान करव;

भेंट लेके ओकर अंगना म आवव।

9 पबितरता ले सोभायमान होके यहोवा के अराधना करव;

हे धरती के जम्मो मनखेमन, ओकर आघू म कांपव।

10 जाति-जाति के मनखेमन के बीच म कहव, "यहोवा ह सासन करथे।"

संसार ला मजबूती से स्थापित करे गे हवय, येला हटाय नइं जा सकय;

ओह समान रूप से मनखेमन के नियाय करही।

11 अकास ह आनंद मनावय, धरती ह खुस होवय;

समुंदर अऊ ओमा के जम्मो चीजमन गरजंय।

12 भुइयां अऊ ओमा के हर एक चीज बहुंत आनंदित होवंय;

जंगल के जम्मो रूखमन आनंदित होके गीत गावंय।

13 पूरा सिरिस्टी ह यहोवा के आघू म आनंद मनावय, काबरकि ओह आवथे,

ओह धरती के नियाय करे बर आवथे।

ओह धरमीपन ले संसार के

अऊ अपन बिसवासयोग्यता से मनखेमन के नियाय करही।