भजन-संहिता 149

1 यहोवा के परसंसा करव।*149:1 इबरानी म हलिलूयाह; पद 9 म घलो

यहोवा बर एक नवां गीत गावव,

ओकर बिसवासयोग्य मनखेमन के सभा म ओकर परसंसा करव।

2 इसरायल ह अपन सिरिस्टीकर्ता म आनंदित होवय;

सियोन के मनखेमन अपन राजा म खुस होवंय।

3 ओमन नाचत ओकर नांव के परसंसा करंय

अऊ ओकर बर खंजरी अऊ बीना बजावंय।

4 काबरकि यहोवा ह अपन मनखेमन ले खुस रहिथे;

ओह नम्र मनखेमन ला जीत के मुकुट पहिराथे।

5 ओकर बिसवासयोग्य मनखेमन ये आदर पाके आनंद मनावंय

अऊ अपन दसना म आनंद के गीत गावंय।

6 ओमन के मुहूं ले परमेसर के परसंसा होवय

अऊ ओमन के हांथ म दूधारी तलवार रहय,

7 ताकि जाति-जाति के मनखेमन ले ओमन बदला लेवंय

अऊ मनखेमन ला दंड देवंय,

8 अऊ ओमन के राजामन ला बेड़ी म,

अऊ ओमन के परभावसाली मनखेमन ला लोहा के संकली म बांधंय,

9 अऊ ओमन के बिरूध दंड के हुकूम ले जावंय—

येह ओकर जम्मो बिसवासयोग्य मनखेमन के महिमा ए।

यहोवा के परसंसा करव।