1 बेबिलोन देस के नदीमन के तीर म हमन बईठेंन

अऊ सियोन ला सुरता करके रोए लगेंन।

2 उहां चिनार रूखमन म

हमन अपन बीना ला टांग देंन,

3 काबरकि जऊन मन हमन ला बंधुवा बनाके ले गे रिहिन,

ओमन उहां हमन ला गीत गाय बर कहिन,

हमन ला सतानेवालामन हमन ला आनंद के गीत गाय बर कहिन;

ओमन कहिन, "हमर बर सियोन के एक गीत गावव!"

4 एक आने देस म

हमन यहोवा के गीत कइसे गा सकत हन?

5 हे यरूसलेम, यदि मेंह तोला भूल जावंव,

त मोर जेवनी हांथ अपन योग्यता ला भूल जावय।

6 यदि मेंह तोला सुरता नइं करंव,

यदि मेंह यरूसलेम ला

अपन सबले बड़े आनंद नइं मानंव,

त मोर जीभ ह मोर तालू ले चपक जावय।

7 हे यहोवा, सुरता कर कि ओ दिन एदोमीमन का करिन,

जब यरूसलेम ला गिराय गीस।

ओमन चिचियाके कहिन, "येला फोरके गिरा दव,

येला येकर नीव ले गिरा दव!"*

8 हे बेटी बेबिलोन, तोर बिनास होवय,

ओ मनखे ह खुस रहय, जऊन ह ओ अतियाचार के मुताबिक

तोर ले बदला लेथे, जेला तेंह हमर ऊपर करे हस।

9 ओ मनखे ह खुस रहय, जऊन ह तोर लइकामन ला पकड़के

चट्टान ऊपर पटक देथे।