1 हे सर्वसक्तिमान यहोवा,

तोर निवास ह बहुंत सुघर हे,

2 मोर जीव ह यहोवा के अंगनामन के लालसा करत

मूरछित तक हो जाथे;

मोर तन अऊ मन

जीयत परमेसर ला पुकारथे।

3 हे सर्वसक्तिमान यहोवा, मोर राजा अऊ मोर परमेसर,

तोर बेदी के लकठा म,

अऊ त अऊ गौरइया चिरई ह बसेरा करे हवय,

अऊ अबाबील चिरई ह एक खोंधरा बनाय हवय—

कि उहां ओह अपन पीलामन ला रख सकय।

4 धइन अंय ओमन, जऊन मन तोर घर म रहिथें;

ओमन हमेसा तोर परसंसा करत रहिथें।

5 धइन अंय ओमन, जेमन ला तोर ले ताकत मिलथे,

जेमन के मन ह तीरथ-यातरा म लगे रहिथे।

6 जब ओमन बाका* के घाटी ले होके जाथें,

त ओमन ओला पानी के सोत के एक जगह बना देथें;

सरदकाल के बरसात के पानी घलो येकर तरियामन ला भर देथे।*

7 ओमन ताकत के ऊपर ताकत पाके तब तक आघू बढ़त रहिथें,

जब तक कि ओमा के हर एक जन सियोन म परमेसर करा नइं हबर जावय।

8 हे यहोवा, सर्वसक्तिमान परमेसर, मोर पराथना ला सुन;

हे याकूब के परमेसर, मोर बात ला सुन।

9 हे परमेसर, हमर ढाल ला देख;

अपन अभिसिक्त जन ऊपर किरपा कर।

10 तोर अंगना म के एक दिन ह

अऊ कहीं के हजार दिन ले जादा बने अय;

दुस्टमन के डेरा म रहे के बदले

मेंह मोर परमेसर के घर म दुवारपाल होवई जादा पसंद करहूं।

11 काबरकि यहोवा परमेसर ह सूरज अऊ ढाल ए;

यहोवा अनुग्रह अऊ सम्मान देथे;

जऊन मन निरदोस बने रहिथें, ओमन ले

ओह बने चीजमन ला अलग नइं रखय।

12 हे सर्वसक्तिमान यहोवा,

धइन अय ओ मनखे, जऊन ह तोर ऊपर भरोसा रखथे।