भजन-संहिता 7

दाऊद के सिग्गायोन*7:0 संभवतः संगीत के एक सबद नांव के एक भजन, जेला ओह बिनयामीनी कूस के संबंध म यहोवा के आघू म गाईस।

1 हे यहोवा मोर परमेसर, मेंह तोर सरन लेथंव;

मोला ओ जम्मो झन ले बचा अऊ छुड़ा, जेमन मोर पीछा करत हें,

2 नइं तो ओमन सिंह के सहीं मोला चीरके कुटा-कुटा कर दीहीं

अऊ मोला बचानेवाला कोनो नइं होहीं।

3 हे यहोवा मोर परमेसर, कहूं मेंह ये काम करे हंव

अऊ मोर हांथमन दोसी अंय—

4 यदि मेंह मोर संग मेल रखइयामन के संग भलई के बदले बुरई करे हंव

या बिगर कारन के मेंह अपन बईरी ला लूटे हंव—

5 त फेर मोर बईरी ह मोर पीछा करके मोला धर लेवय;

ओह मोला भुइयां म कुचरके मार डारय

अऊ मोला माटी म मिला देवय।

6 हे यहोवा, अपन कोरोध म उठ;

मोर बईरीमन के कोरोध के बिरूध म उठ।

हे मोर परमेसर, जाग अऊ नियाय कर।

7 मनखेमन के भीड़ तोर चारों कोति जूरय,

अऊ तें ओमन ऊपर ऊंच जगह म बिराजमान हो जा।

8 यहोवा ह मनखेमन के नियाय करय।

हे यहोवा, हे सर्वोच्च परमेसर, मोर धरमीपन के मुताबिक,

मोर ईमानदारी के मुताबिक मोर नियाय कर।

9 हे धरमी परमेसर,

तें जऊन ह मन अऊ हिरदय ला जांचथस;

दुस्टमन के बुरई ला खतम कर दे

अऊ धरमीमन ला सुरकछित रख।

10 सर्वोच्च परमेसर ह मोर ढाल ए,

जऊन ह सीधवा मनखेमन ला बचाथे।

11 परमेसर ह धरमी नियायधीस अय,

अइसन परमेसर, जऊन ह हर दिन कोप करथे।

12 यदि मनखे ह पछताप नइं करही,

त परमेसर ह अपन तलवार ला धार करही;

ओह धनुस ला साधके ओमा तीर चघाही।

13 ओह मिरतू के हथियार तियार करे हवय;

ओह अपन आगी बरत तीरमन ला तियार रखथे।

14 जऊन ह दुस्टता के बात सोचथे,

ओह समस्या खड़े करथे अऊ बईरता ला पईदा करथे।

15 जऊन ह माटी निकालके खंचवा कोड़थे,

ओह अपन कोड़े खंचवा म खुद गिरथे।

16 जऊन समस्या ओह खड़े करथे, ओह लहुंटके ओकरे ऊपर आ जाथे;

ओकर हिंसा के काम ओकरेच मुड़ ऊपर आ जाथे।

17 मेंह यहोवा ला ओकर धरमीपन बर धनबाद दूहूं;

मेंह यहोवा सर्वोच्च परमेसर के नांव म परसंसा के गीत गाहूं।