भजन-संहिता 94

1 यहोवा ह बदला लेवइया परमेसर ए।

हे बदला लेवइया परमेसर, अपन चमक ला देखा।

2 हे धरती के नियाय करइया, उठ;

घमंडीमन ले ओमन के काम के मुताबिक बदला ले।

3 हे यहोवा, दुस्टमन कब तक,

ओमन कब तक आनंद मनात रहिहीं?

4 ओमन हमेसा घमंड के बात करत रहिथें;

दुस्ट काम करइया जम्मो झन घमंड ले भरे हवंय।

5 हे यहोवा, ओमन तोर मनखेमन ला कुचरथें;

ओमन तोर निज भाग के मनखेमन ला सतात हवंय।

6 ओमन बिधवा अऊ परदेसी ला मार डारथें;

ओमन अनाथमन ला मार डारथें।

7 ओमन कहिथें, "यहोवा ह नइं देखय;

याकूब के परमेसर ह धियान नइं देवय।"

8 हे मनखेमन के बीच निरबुद्धि मनखेमन, तुमन धियान देवव;

हे मुरूख मनखेमन, तुमन कब बुद्धिमान बनहू?

9 जऊन ह कान ला बनाईस, का ओह खुद नइं सुनय?

जऊन ह आंखी ला बनाईस, का ओह खुद नइं देखय?

10 जऊन ह जाति-जाति के मनखेमन के ताड़ना करथे, का ओह दंड नइं देवय?

जऊन ह मानव-जाति ला सिखाथे, का ओकर करा गियान के कमी हवय?

11 यहोवा ह मनखेमन के जम्मो योजना ला जानथे;

ओह जानथे कि ओमन बेकार अंय।

12 हे यहोवा, धइन अय ओ, जेकर तेंह ताड़ना करथस,

जेला तेंह अपन कानून के बात सिखाथस;

13 समस्या के समय म तेंह ओमन ला तब तक मदद करत रहिथस,

जब तक कि दुस्टमन बर खंचवा नइं कोड़े जावय।

14 काबरकि यहोवा ह अपन मनखेमन ला नइं तियागही;

ओह अपन निज भाग ला कभू नइं छोंड़ही।

15 नियाय फेर धरमीपन के आधार म करे जाही,

अऊ हिरदय के जम्मो सीधवा मनखेमन येकर पाछू चलहीं।

16 दुस्टमन के बिरोध म, मोर बर कोन ठाढ़ होही?

दुस्ट काम करइयामन के बिरोध म, मोर कोति कोन होही?

17 यदि यहोवा ह मोर मदद नइं करे होतिस,

त मेंह बहुंत जल्दी मिरतू के अधीन म रहितेंव।

18 जब मेंह कहेंव, "मोर गोड़ ह फिसलत हे,"

त हे यहोवा, तोर अटूट मया ह मोला संभालिस।

19 जब भीतरे-भीतर मेंह बहुंत बियाकुल रहेंव,

त तोर ढाढ़स ह मोला आनंदित करिस।

20 का कोनो दुस्ट सासक ह तोर संग संधि कर सकथे—

एक अइसने सासक, जऊन ह अपन कानून के दुवारा दुख लानथे?

21 दुस्टमन धरमी जन के बिरूध एक संग जूरथें

अऊ निरदोस ला मिरतू-दंड देथें।

22 पर यहोवा ह मोर गढ़ बन गे हवय,

अऊ ओह मोर परमेसर, मोर चट्टान ए, जेमा मेंह सरन लेथंव।

23 ओह ओमन ले ओमन के पाप के बदला लीही

अऊ ओमन के दुस्टता बर ओमन ला नास कर दीही;

यहोवा हमर परमेसर ह ओमन ला नास करही।