भजन-संहिता 53

संगीत के निरदेसक बर। महलत*53:0 संभवतः संगीत के एक सबद के मुताबिक दाऊद के एक मसकील।

1 मुरूख ह अपन मन म कहिथे,

"परमेसर नइं ए।"

ओमन बिगड़ गे हवंय, अऊ ओमन के चालचलन ह निकम्मा ए;

अइसे कोनो नइं ए, जऊन ह भलई करथे।

2 परमेसर ह स्वरग ले

जम्मो मानव-जाति ला ये आसा म देखथे

कि कोनो समझदार हवय कि नइं,

कोनो परमेसर के खोज करथे कि नइं।

3 हर मनखे ह भटक गे हवय, जम्मो झन बिगड़ गे हवंय;

अइसे कोनो नइं ए, जऊन ह भलई करथे,

एको झन घलो नइं।

4 का ये जम्मो दुस्ट काम करइयामन कुछू नइं जानंय?

ओमन मोर मनखेमन ला अइसे खा जाथें, मानो कि रोटी खावत हें;

ओमन कभू परमेसर के नांव नइं लेवंय।

5 जिहां डरे के कोनो बात नइं रहय,

उहां ओमन डर के मारे घबरा गे हवंय।

जऊन मन तोर ऊपर हमला करिन, परमेसर ह ओमन के हाड़ामन ला बिखेर दीस;

तेंह ओमन ला लज्जित करय, काबरकि परमेसर ह ओमन ला तुछ जानिस।

6 बने होतिस कि इसरायल बर उद्धार ह सियोन ले बाहिर आतिस!

जब परमेसर ह अपन मनखेमन ला पहिले के सहीं कर देथे,

त याकूब ह आनंद मनावय अऊ इसरायल ह खुस होवय!