भजन-संहिता 140

संगीत के निरदेसक बर दाऊद के एक भजन।

1 हे यहोवा, मोला दुस्ट काम करइयामन ले छुड़ा;

हिंसा करइयामन ले मोला बचा,

2 जऊन मन अपन मन म दुस्ट काम करे के योजना बनाथें

अऊ हर दिन लड़े बर भड़कावत रहिथें।

3 ओमन के बोलई ह सांप के काटे सहीं अय;

ओमन के ओंठ म करैत सांप के जहर हवय।

4 हे यहोवा, दुस्ट मनखेमन के हांथ ले मोर रकछा कर;

हिंसक मनखेमन ले मोला बचा,

जऊन मन मोर पांव म चोट पहुंचाय के योजना बनाय हवंय।

5 घमंडी मनखेमन मोला फंसाय बर फांदा छुपाय हवंय;

ओमन अपन जाल के डोर ला बिछाय हवंय

अऊ मोर रसता म मोर बर फांदा लगाय हवंय।

6 मेंह यहोवा ले कहिथंव, "तेंह मोर परमेसर अस।"

हे यहोवा, दया के मोर पुकार ला सुन।

7 हे परमपरधान यहोवा, तेंह सामर्थी छुड़ानेवाला अस,

तेंह लड़ई के दिन म मोर मुड़ के ढाल बनथस।

8 हे यहोवा, दुस्टमन के ईछा ला पूरा झन कर;

ओमन के योजना ला सफल झन होवन दे।

9 जऊन मन मोला चारों कोति ले घेरे हवंय अऊ घमंड से मुड़ उठाय हवंय;

ओमन के मुहूं के दुस्टता के बात ओहीचमन ला खा जावय।

10 बरत कोइला ओमन ऊपर गिरय;

ओमन ला आगी म झोंके जावय,

ओमन चीखला ले भरे खंचवा म फटिक दिये जावंय, जिहां ले ओमन कभू उठ नइं सकंय।

11 निन्दा करइयामन देस म स्थापित झन होवंय;

हिंसा करइयामन ऊपर बिपत्ति पड़य।

12 मेंह जानथंव कि यहोवा ह गरीब-दुखीमन के नियाय करथे

अऊ जरूरतमंद के मामला ला संभालथे।

13 खचित धरमीमन तोर नांव के परसंसा करहीं

अऊ ईमानदारमन तोर आघू म रहिहीं।