1 हे यहोवा, मेंह तोर बहुंत परसंसा करहूं,

काबरकि तेंह मोला खंचवा ले ऊपर निकाले हस

अऊ मोर बईरीमन ला मोर ऊपर आनंद करे बर नइं दे हस।

2 हे यहोवा मोर परमेसर, मेंह तोला मदद बर पुकारेंव,

अऊ तेंह मोला चंगा करय।

3 हे यहोवा, तेंह मोला मिरतू-लोक ले निकाले हस;

तेंह मोला खाल्हे खंचवा म जाय ले बचाय हस।

4 हे यहोवा के बिसवासयोग्य मनखेमन, तुमन ओकर महिमा के गीत गावव;

ओकर पबितर नांव के परसंसा करव।

5 काबरकि ओकर गुस्सा छीन भर के होथे,

पर ओकर किरपा ह जिनगी भर रहिथे;

रोवई ह रथिया भर रह सकथे,

पर आनंद के समय ह बिहनियां आथे।

6 जब मेंह सुरकछित महसूस करेंव, त मेंह अपनआप ला कहेंव,

"मेंह कभूच नइं डोलंव।"

7 हे यहोवा, जब तेंह मोर ऊपर किरपा करय,

त तेंह मोर साही पहाड़* ला मजबूती से खड़े करय;

पर जब तेंह अपन चेहरा ला छिपा लेय,

त मेंह डर गेंव।

8 हे यहोवा, तोला मेंह पुकारेंव;

परभू ला मेंह दया बर गोहारेंव:

9 "का फायदा होही यदि मेंह मर जावंव त,

यदि मेंह खाल्हे कबर म चले जावंव त?

का माटी ह तोर महिमा करही?

का येह तोर बिसवासयोग्यता के बखान करही?

10 हे यहोवा, मोर बात ला सुन, अऊ मोर ऊपर दया कर;

हे यहोवा, मोर मदद कर।"

11 तेंह मोर बिलाप करई ला नचई म बदल दे हस;

तेंह मोर दुख के कपड़ा ला हटाके मोला आनंद के कपड़ा पहिराय हस,

12 ताकि मोर मन ह तोर महिमा के गीत गावय अऊ चुप झन रहय।

हे यहोवा मोर परमेसर, मेंह हमेसा तोर परसंसा करहूं।