1 धइन अय ओ मनखे,

जेकर अपराध छेमा करे जाथे,

जेकर पाप तोपे जाथे।

2 धइन अय ओ मनखे,

जेकर पाप ला यहोवा ह ओकर बिरूध नइं गनय

अऊ जेकर आतमा म कोनो कपट के बात नइं ए।

3 जब मेंह कलेचुप रहंय,

त दिन भर कलहरत-कलहरत

मोर हाड़ामन बेकार होय लगिन।

4 काबरकि रात अऊ दिन

तोर हांथ ह मोर ऊपर भारी पड़िस;

अऊ जइसे घाम महिना के घाम म चीजमन सूखा जाथें

वइसे मोर बल ह कम हो गीस।

5 तब मेंह अपन पाप ला तोर आघू म मान लेंव

अऊ मोर अपराध ला नइं छुपांय।

मेंह कहेंव, "मेंह यहोवा के आघू म

अपन पाप ला मान लूहूं।"

अऊ तेंह मोर पाप के दोस ला

छेमा करय।

6 एकरसेति जम्मो बिसवासयोग्य मनखेमन तोर ले पराथना करंय

जब तेंह मिल सकत हस;

खचित संकट रूपी पानी के भयंकर लहरामन

ओमन करा नइं हबरहीं।

7 तेंह मोर छुपे के जगह अस;

तेंह मोला संकट ले बचाबे

अऊ छुटकारा के गीत म मोला घेर लेबे।

8 मेंह तोला निरदेस दूहूं अऊ ओ रसता के बात सिखाहूं, जेमा तोला जाना चाही;

मेंह तोर ऊपर अपन मया के नजर रखके तोला सलाह दूहूं।

9 तेंह घोड़ा अऊ खच्चर के सहीं झन बन,

जेमन करा कोनो समझ नइं रहय

पर ओमन ला काठी अऊ लगाम ले काबू म करे जाथे

नइं तो ओमन तुम्हर लकठा म नइं आवंय।

10 दुस्टमन के दुख-तकलीफ बहुंत हवय,

पर यहोवा के अब्बड़ मया ह

ओमन ला घेरे रहिथे, जऊन मन ओकर ऊपर भरोसा करथें।

11 हे धरमी मनखेमन, यहोवा म आनंद मनावव अऊ खुस रहव;

अऊ हे मन के जम्मो सीधवा मनखेमन, तुमन गीत गावव।