1 यहोवा के परसंसा करव।*

हे यहोवा के सेवकमन, तुमन ओकर परसंसा करव;

यहोवा के नांव के परसंसा करव।

2 यहोवा के नांव के परसंसा होवय,

अब अऊ हमेसा-हमेसा बर ओकर परसंसा होवय।

3 उदयाचल ले लेके अस्ताचल तक

यहोवा के परसंसा होवय।

4 यहोवा ला जम्मो जाति के ऊपर उठाय जाथे,

ओकर महिमा अकास ले घलो ऊंच हवय।

5 यहोवा हमर परमेसर सहीं कोन हे,

जऊन ह कि ऊंच म बिराजमान हवय,

6 जऊन ह झुकके

अकास अऊ धरती ला देखथे?

7 ओह गरीब ला धुर्रा ले उठाथे

अऊ राख के कुढ़ा ले जरूरतमंद ला ऊपर करथे;

8 ओह ओमन ला हाकिममन के संग,

अपन मनखेमन के हाकिममन संग बईठाथे।

9 ओह बांझ माईलोगन ला ओकर घर म अइसे बसाथे,

जइसे लइकामन के खुसी ले भरे एक दाई ला।

यहोवा के परसंसा होवय।