א आलेफ

1 धइन अंय ओमन, जेमन के चालचलन निरदोस हवय,

जेमन यहोवा के कानून के मुताबिक चलथें।

2 धइन अंय ओमन, जेमन ओकर बिधि-बिधान म चलथें

अऊ अपन पूरा मन से ओकर खोज म रहिथें—

3 ओमन कोनो गलत काम नइं करंय

पर ओकर रसता म चलथें।

4 तेंह नियममन ला बनाय हस

जेमन के पूरा पालन करे जावय।

5 तोर बिधि-बिधान ला माने म

मोर चालचलन ह अटल रिहिस!

6 जब मेंह तोर जम्मो हुकूममन ऊपर बिचार करहूं

त मोला सरमिंदा होय नइं पड़ही।

7 जब मेंह तोर धरमी कानूनमन ला सीखहूं,

त मेंह तोर सही मन से परसंसा करहूं।

8 मेंह तोर बिधिमन ला मानहूं;

मोला झन तियाग दे।

ב बेथ

9 जवान ह अपन चालचलन ला कइसे सुध रख सकथे?

तोर बचन के मुताबिक चले के दुवारा।

10 मेंह अपन पूरा मन से तोर खोज म रहिथंव,

मोला तोर हुकूममन ले भटकन झन दे।

11 मेंह तोर बचन ला अपन हिरदय म रखे हंव

ताकि मेंह तोर बिरूध पाप झन करंव।

12 हे यहोवा, तोर परसंसा होवय;

मोला तोर बिधिमन ला सिखा।

13 तोर दिये गय जम्मो कानून ला

मेंह अपन मुहूं म दोहरात रहिथंव।

14 जइसे कोनो मनखे ह बहुंत धन पाके आनंदित होथे,

वइसे मेंह तोर नियममन ला पालन करके आनंदित होथंव।

15 मेंह तोर उपदेस ऊपर मनन करथंव

अऊ तोर बातमन ऊपर बिचार करथंव।

16 मोला तोर बिधि-बिधान ले खुसी होथे;

मेंह तोर बचन ऊपर धियान दूहूं।

ג गीमेल

17 अपन सेवक के भलई कर कि मेंह जीयत रहंव,

अऊ तोर बचन के पालन करंव।

18 मोर आंखी ला खोल कि मेंह

तोर कानून के अद्भूत चीजमन ला देख सकंव।

19 मेंह धरती म एक अजनबी अंव;

अपन हुकूममन ला मोर ले झन छिपा।

20 मोर परान ह तोर कानून के लालसा म

हर समय बियाकुल होवत हे।

21 तेंह ओ घमंडी मनखेमन ला डांटथस, जऊन मन सरापित अंय,

जऊन मन तोर हुकूममन ले भटक जाथें।

22 मोर ऊपर लगे ओमन के अपमान अऊ तिरस्कार ला हटा,

काबरकि मेंह तो नियममन के पालन करथंव।

23 हालाकि सासन करइयामन एक संग बईठके मोर निन्दा करथें,

पर तोर सेवक ह तोर बिधिमन ऊपर मनन करत रहिही।

24 तोर नियममन ऊपर मेंह खुस होथंव;

ओमन मोर सलाहकार एं।

ד दालेथ

25 मेंह खाल्हे धुर्रा म पड़े हंव;

अपन बचन के मुताबिक मोला बचाय रख।

26 मेंह तोला अपन चालचलन के लेखा-जोखा देंव अऊ तेंह मोला जबाब देय;

अपन बिधिमन ला मोला सिखा।

27 तोर उपदेसमन ला समझे के तरीका मोला बता,

ताकि मेंह तोर अद्भूत काम ऊपर मनन करंव।

28 मोर जीव ह दुख के मारे थक गे हवय;

अपन बचन के मुताबिक मोला मजबूत कर।

29 धोखा देवइया रसता ले मोला अलग रख;

मोर ऊपर अनुग्रह कर अऊ मोला तोर कानून सिखा।

30 मेंह सच्चई के रसता ला चुने हवंव;

मेंह तोर कानून ऊपर अपन मन ला लगाय हवंव।

31 हे यहोवा, मेंह तोर नियम ला मजबूती से थामे हवंव;

मोला लज्जा म झन पड़न दे।

32 मेंह तोर हुकूममन के रसता म दऊड़त हंव,

काबरकि तेंह मोर समझ ला बढ़ाय हस।

ה हे

33 हे यहोवा, तोर बिधिमन ला पालन करे के तरीका मोला सिखा,

ताकि आखिरी तक मेंह येकर पालन करंव।

34 मोला समझ दे ताकि मेंह तोर कानून के पालन करंव

अऊ पूरा हिरदय ले येला मानंव।

35 तोर हुकूममन के रसता म मोला ले चल,

काबरकि उहां मोला खुसी मिलथे।

36 मोर मन ला सुवारथ के लाभ कोति नइं,

पर अपन नियम कोति कर।

37 मोर आंखीमन ला बेकार के चीजमन ले हटा दे;

अपन बचन के मुताबिक मोर जिनगी ला बनाय रख।

38 अपन सेवक ले करे गे परतिगियां ला पूरा कर,

ताकि तोर भय माने जावय।

39 जऊन कलंक ले मेंह डरत हंव, ओला मोर ले दूरिहा कर दे।

काबरकि तोर कानूनमन उत्तम अंय।

40 मेंह तोर उपदेसमन के ईछा करथंव;

अपन धरमीपन म मोर जिनगी ला बनाय रख।

ו वाव

41 हे यहोवा, तोर उत्तम मया मोर ऊपर होवय,

अऊ अपन करे गे वायदा के मुताबिक मोर उद्धार कर;

42 तब में हर ओ मनखे ला जबाब दे सकहूं, जऊन ह मोला ताना मारथे,

काबरकि मेंह तोर बचन ऊपर भरोसा करथंव।

43 अपन सच्चई के बचन ला मोर मुहूं ले कभू झन हटा,

काबरकि मेंह तोर कानून ऊपर भरोसा रखे हंव।

44 मेंह हमेसा तोर कानून ला मानहूं,

सदाकाल तक मानत रहिहूं।

45 मेंह सुतंतर होके चलहूं,

काबरकि मेंह तोर उपदेसमन ला पा गे हवंव।

46 मेंह राजामन के आघू म तोर नियममन के बारे म गोठियाहूं

अऊ मोला सरमिंदा होय नइं पड़ही,

47 मेंह तोर हुकूममन ला मानके खुस होथंव,

काबरकि मेंह ओमन ले मया रखथंव।

48 मेंह तोर हुकूममन कोति हांथ बढ़ाथंव, जेमन ले कि मेंह मया रखथंव,

ताकि मेंह तोर बिधिमन ऊपर मनन करंव।

ז जईन

49 जऊन बात अपन सेवक ला कहे रहय, ओला सुरता रख,

काबरकि तेंह मोला आसा दे हस।

50 मोर दुख म मोला ये बात ले सांति मिलथे:

तोर वायदा ह मोर जिनगी ला बनाय रखथे।

51 घमंडी मनखेमन बिगर रोक-टोक के मोर हंसी उड़ाथें,

पर मेंह तोर कानून ले नइं हटंव।

52 हे यहोवा, मेंह तोर पुराना कानूनमन ला सुरता करथंव,

अऊ ओमन म मोला सांति मिलथे।

53 जऊन दुस्टमन तोर कानून ला तियाग दे हवंय,

ओमन के कारन मोला गुस्सा आथे।

54 जिहां भी मेंह रहिथंव,

तोर बिधिमन मोर गीत के बिसय होथें।

55 हे यहोवा, रथिया मेंह तोर नांव ला सुरता करथंव,

ताकि मेंह तोर कानून म चल सकंव।

56 येह मोर आदत हो गे हवय:

मेंह तोर उपदेस के पालन करथंव।

ח हेथ

57 हे यहोवा, तेंह मोर भाग अस;

मेंह तोर बचन ला पालन करे के वायदा करे हंव।

58 मेंह अपन पूरा मन से तोला खोजे हंव;

अपन वायदा के मुताबिक मोर ऊपर अनुग्रह कर।

59 मेंह अपन चालचलन ऊपर बिचार करे हंव

अऊ तोर नियममन ला पालन करे बर गोड़ ला आघू बढ़ाय हंव।

60 मेंह तोर हुकूममन ला पालन करे बर

जल्दी से आघू बढ़हूं, देरी नइं करंव।

61 हालाकि दुस्टमन मोला रस्सी ले बांधथें,

तभो ले मेंह तोर कानून ला नइं भूलंव।

62 तोर धरमी कानूनमन के सेति

तोला धनबाद दे बर मेंह आधा रथिया उठहूं।

63 मेंह ओ जम्मो के संगवारी अंव, जऊन मन तोर भय मानथें,

ओ जम्मो जऊन मन तोर नियम म चलथें।

64 हे यहोवा, धरती ह तोर मया ले भर गे हवय;

मोला तोर बिधिमन ला सिखा।

ט टेथ

65 हे यहोवा, अपन बचन के मुताबिक

अपन सेवक के भलई कर।

66 मोला गियान अऊ सही नियाय के बात सिखा,

काबरकि मेंह तोर हुकूममन ऊपर भरोसा करथंव।

67 दुख म पड़े के पहिले मेंह भटक गे रहेंव,

पर अब मेंह तोर बात ला मानथंव।

68 तेंह बने अस, अऊ जऊन कुछू तेंह करथस, ओह बने अय;

मोला अपन बिधिमन ला सिखा।

69 हालाकि घमंडी मनखेमन लबारी बात कहिके मोर ऊपर दाग लगाय हवंय,

पर मेंह अपन पूरा मन से तोर नियममन ला मानथंव।

70 ओमन के हिरदय कठोर अऊ भावनाहीन हो गे हवंय,

पर मोला तोर कानून म चलके खुसी मिलथे।

71 येह मोर बर बने बात होईस कि मेंह दुख म पड़ेंव

ताकि मेंह तोर बिधिमन ला सीख सकंव।

72 तोर मुहूं ले निकले कानून ह मोर बर

सोन अऊ चांदी के हजारों टुकड़ामन ले घलो जादा कीमती ए।

י योध

73 तोर हांथ ह मोला बनाईस अऊ मोला रचिस;

अपन हुकूममन ला सीखे के मोला समझ दे।

74 तोर भय मनइयामन मोला देखके आनंद मनावंय,

काबरकि मेंह तोर बचन ऊपर अपन आसा रखे हंव।

75 हे यहोवा, मेंह जानत हंव कि तोर कानूनमन धरमी अंय,

अऊ ये घलो कि सच्चई के मुताबिक तेंह मोला दुख दे हस।

76 अपन सेवक बर करे गे तोर वायदा के मुताबिक

तोर अटल मया ह मोला सांति देवय।

77 तोर दया मोर ऊपर होवय कि मेंह जीयत रहंव,

काबरकि तोर कानून ला माने म मोला खुसी मिलथे।

78 बिगर कोनो कारन के मोर संग गलत बरताव करे के कारन दुस्टमन लज्जित होवंय;

पर मेंह तोर उपदेसमन ऊपर मनन करत रहिहूं।

79 जऊन मन तोर भय मानथें, ओमन मोर कोति आवंय,

ओमन, जऊन मन तोर नियममन ला समझथें।

80 मेंह पूरा मन से तोर बिधिमन के पालन करंव

ताकि मोला लज्जित होना झन पड़य।

כ काफ

81 मोर परान ह तोर उद्धार के ईछा करत थक जावत हे,

पर मेंह तोर बचन म अपन आसा रखे हंव।

82 मोर आंखीमन तोर वायदा के पूरा होय के बाट जोहत थक जावत हें;

मेंह कहिथंव, "तेंह मोला कब सांति देबे?"

83 हालाकि मेंह कुहरा म अंगूर के मंद के एक कुप्पी सहीं अंव,

तभो ले मेंह तोर बिधिमन ला नइं भूलंव।

84 तोर सेवक ला अऊ कब तक इंतजार करे बर पड़ही?

तेंह मोला सतानेवालामन ला कब दंड देबे?

85 तोर कानून के उल्टा

घमंडीमन मोला फंसाय बर खंचवा कोड़थें।

86 तोर जम्मो हुकूममन बिसवासयोग्य अंय;

मोर मदद कर, काबरकि मेंह बिगर कारन के सताय जावत हंव।

87 ओमन मोला धरती ले लगभग मिटा डारे रिहिन,

पर मेंह तोर उपदेसमन ला नइं छोड़े हंव।

88 तोर अटल मया म मोर जिनगी ला बनाय रख,

ताकि मेंह तोर मुहूं ले दिये गय नियममन ला मानंव।

ל लामेध

89 हे यहोवा, तोर बचन ह सदाकाल बर अय;

येह अकास म अटल बने रहिथे।

90 तोर बिसवासयोग्यता पीढ़ी दर पीढ़ी बने रहिथे;

तेंह धरती ला इस्थिर करय, अऊ येह बने रहिथे।

91 तोर कानूनमन आज तक बने हवंय,

काबरकि जम्मो चीजमन तोर सेवा करथें।

92 कहूं तोर कानून ह मोर खुसी के कारन नइं होतिस,

त मेंह अपन दुख म नास हो गे रहितेंव।

93 मेंह तोर उपदेसमन ला कभू नइं भूलंव,

काबरकि ओमन के दुवारा तेंह मोर जिनगी ला बनाय रखे हस।

94 मोला बचा, काबरकि मेंह तोर अंव;

मेंह तोर उपदेसमन ला खोज ले हंव।

95 दुस्टमन मोला नास करे बर बाट जोहत हें,

पर मेंह तोर बिधिमन ऊपर बिचार करत रहिहूं।

96 हर सिद्धता म मेंह एक सीमना ला देखथंव,

पर तोर हुकूममन के कोनो सीमना नइं ए।

מ मेम

97 अहा! तोर कानून ले मेंह कइसने मया करथंव!

दिन भर मेंह येकर ऊपर मनन करत रहिथंव।

98 तोर हुकूममन हमेसा मोर संग हवंय

अऊ मोर बईरीमन ले मोला जादा बुद्धिमान बनाथें।

99 मोर जम्मो गुरूमन ले मोर म जादा समझ हवय,

काबरकि मेंह तोर नियममन ऊपर चिंतन-मनन करत रहिथंव।

100 मोर म अगुवामन ले जादा समझ हवय,

काबरकि मेंह तोर नियममन के पालन करथंव।

101 मेंह अपन गोड़ ला हर एक बुरई के रसता म जाय ले रोके हंव

ताकि मेंह तोर बचन के पालन कर सकंव।

102 मेंह तोर कानून के पालन करे ले नइं हटे हंव,

काबरकि तेंह खुद मोला ये कानून ला सिखाय हस।

103 तोर बचनमन मोला बहुंत मीठ लगथें,

मोर मुहूं म येह मंधरस ले घलो जादा मीठ लगथे!

104 तोर उपदेसमन ले मोला समझ के बात मिलथे;

एकरसेति मेंह हर गलत रसता ले घिन करथंव।

נ नून

105 तोर बचन ह मोर पांव बर दीया,

अऊ मोर रसता बर अंजोर अय।

106 मेंह कसम खाय हंव अऊ ठान ले हंव,

कि मेंह तोर धरमी कानूनमन के पालन करहूं।

107 में बहुंत दुख झेले हंव;

हे यहोवा, अपन बचन के मुताबिक मोर जिनगी ला बनाय रख।

108 हे यहोवा, अपन मन से मोर मुहूं ले निकले परसंसा ला गरहन कर,

अऊ तोर कानून मोला सिखा।

109 हालाकि मेंह लगातार अपन परान ला अपन हथेली म लेके चलथंव,

तभो ले मेंह तोर कानून ला नइं भूलंव।

110 दुस्टमन मोर बर एक फंदा लगाय हवंय,

पर मेंह तोर उपदेसमन ले नइं भटके हंव।

111 तोर बिधिमन सदाकाल बर मोर कुल-परंपरा अंय,

ओमन मोर हिरदय के आनंद अंय।

112 मोर हिरदय ला आखिरी तक

तोर बिधि-बिधान म चले बर लगाय हवंव।

ס सामेख

113 मेंह दोगला मनखेमन ले घिन करथंव,

पर मेंह तोर कानून ले मया करथंव।

114 तेंह मोर सरन-स्थान अऊ मोर ढाल अस;

मेंह तोर बचन म अपन आसा रखे हंव।

115 हे दुस्ट काम करइयामन, मोर ले दूर हटव,

ताकि मेंह अपन परमेसर के हुकूममन ला मान सकंव!

116 हे मोर परमेसर, अपन वायदा के मुताबिक मोला संभाले रख ताकि मेंह जीयत रहंव;

मोर आसा ला झन टूटन दे।

117 मोला थाम ले, अऊ मेंह बांचे रहिहूं;

मेंह हमेसा तोर बिधिमन के आदर करहूं।

118 तेंह ओमन ला गरहन नइं करस, जऊन मन तोर नियम ले भटक जाथें,

काबरकि ओमन के भरम म पड़े ले कोनो फायदा नइं होवय।

119 धरती के जम्मो दुस्टमन ला तेंह कुड़ा-करकट के सहीं छोंड़ देथस;

एकरसेति मेंह तोर नियममन ले मया करथंव।

120 तोर डर म मोर देहें ह कांपथे;

मेंह तोर कानून के भय म रहिथंव।

ע अयीन

121 मेंह ओही काम करे हंव, जऊन ह सही अऊ नियाय-संगत अय;

मोला मोर सतानेवालामन के हांथ म झन छोंड़ दे।

122 अपन सेवक के भलई के बात ला निस्चित कर ले;

घमंडीमन ला मोर ऊपर अतियाचार झन करन दे।

123 मोर आंखीमन तोर उद्धार के बाट जोहत,

तोर धरमी वायदा के बाट जोहत थक गे हवंय।

124 अपन मया के मुताबिक तोर सेवक ले बरताव कर

अऊ मोला तोर नियममन ला सिखा।

125 मेंह तोर सेवक अंव; मोला समझ के आतमा दे

ताकि मेंह तोर बिधिमन ला समझ सकंव।

126 हे यहोवा, तोर काम करे के समय आ गे हवय;

तोर कानून ला टोरे जावत हे।

127 काबरकि मेंह तोर हुकूममन ला

सोन ले जादा, सुध सोन ले घलो जादा मया करथंव,

128 अऊ काबरकि मेंह तोर जम्मो उपदेसमन ला सही मानथंव,

मेंह हर गलत रसता ले घिन करथंव।

פ पे

129 तोर नियममन अद्भूत अंय;

एकरसेति मेंह ओमन ला मानथंव।

130 तोर बचन के समझ ले अंजोर मिलथे;

येह सधारन मनखे ला समझ के आतमा देथे।

131 मेंह अपन मुहूं ला खोलथंव अऊ हांफथंव,

काबरकि मेंह तोर हुकूम बर पीयासन हंव।

132 मोर कोति देख अऊ मोर ऊपर दया कर,

जइसे कि तेंह हमेसा ओमन ऊपर करथस, जऊन मन तोर नांव ले मया करथें।

133 अपन बचन के मुताबिक मोर गोड़मन ला चले के निरदेस दे;

मोर ऊपर कोनो पाप के अधिकार झन होवन दे।

134 मोला मनखेमन के अतियाचार ले छोंड़ा ले,

ताकि मेंह तोर उपदेसमन के पालन करंव।

135 अपन दास ऊपर अपन मुहूं के अंजोर ला चमका

अऊ मोला अपन बिधिमन ला सिखा।

136 मोर आंखी ले आंसू के धारा बहत हे,

काबरकि मनखेमन तोर कानून के पालन नइं करत हंय।

צ सादे

137 हे यहोवा तेंह धरमी अस,

अऊ तोर कानूनमन सही अंय।

138 जऊन नियम तेंह बनाय हस, ओमन धरमी अंय;

ओमन पूरा बिसवासयोग्य अंय।

139 मोर उत्साह ह मोला भसम करत हवय,

काबरकि मोर बईरीमन तोर बचन के अनदेखा करत हवंय।

140 तोर वायदामन पूरा परखे गे हवंय,

अऊ तोर सेवक ह ओमन ले मया करथे।

141 हालाकि मेंह नीचा अऊ तुछ समझे जावत हंव,

तभो ले मेंह तोर उपदेसमन ला नइं भूलंव।

142 तोर धरमीपन ह सदा बने रहिथे

अऊ तोर कानून ह सच ए।

143 समस्या अऊ दुख मोर ऊपर आय हवय,

पर तोर हुकूम ह मोला खुसी देथे।

144 तोर नियममन हमेसा सही अंय;

मोला समझ के आतमा दे कि मेंह जीयत रहंव।

ק कौफ

145 हे यहोवा, मेंह अपन पूरा मन से तोला पुकारत हंव; मोला जबाब दे,

अऊ मेंह तोर बिधिमन ला मानहूं।

146 मेंह तोला पुकारत हंव; मोला बचा

अऊ मेंह तोर नियममन ला मानहूं।

147 मेंह बिहान होय के पहिले उठथंव अऊ मदद बर गोहारथंव;

मेंह तोर बचन ऊपर अपन आसा रखे हंव।

148 मोर आंखी ह रथिया के जम्मो पहर खुला रहिथे,

ताकि मेंह तोर वायदामन ऊपर मनन कर सकंव।

149 अपन मया के मुताबिक मोर बात ला सुन;

हे यहोवा, अपन कानून के मुताबिक मोर जिनगी ला बनाय रख।

150 जऊन मन दुस्ट योजना बनाथें, ओमन लकठा म हवंय,

पर ओमन तोर कानून ले बहुंत दूरिहा हवंय।

151 तभो ले हे यहोवा, तेंह मोर लकठा म हस,

अऊ तोर जम्मो हुकूममन सच अंय।

152 बहुंत पहिले मेंह तोर नियममन ले सीखे रहेंव

कि तेंह ओमन ला सदाकाल तक बने रहे बर बनाय हस।

ר रेस

153 मोर दुख ला देख अऊ येकर ले मोला छोंड़ा,

काबरकि मेंह तोर कानून ला नइं भूले हंव।

154 मोर मामला के बचाव कर अऊ मोला छोंड़ा;

अपन वायदा के मुताबिक मोर जिनगी ला बनाय रख।

155 दुस्ट मनखेमन ले उद्धार ह बहुंत दूरिहा हवय,

काबरकि ओमन तोर बिधिमन ऊपर धियान नइं देवंय।