आरोहन के एक गीत।

1 जब यहोवा ह सियोन के भाग्य ला फेर पलटिस,*126:1 या बंधुवई ले वापिस लानिस

त हमन सपना देखइयामन सहीं हो गे रहेंन।

2 तब खुसी के मारे हमन बहुंत हंसेंन,

हमर मुहूं ले आनंद के गीत निकलत रिहिस।

तब जाति-जाति के मनखेमन के बीच ये कहे गीस,

"यहोवा ह ओमन बर बड़े-बड़े काम करे हवय।"

3 यहोवा ह हमर बर बड़े-बड़े काम करे हवय,

अऊ येकर कारन हमन बहुंत आनंदित हन।

4 हे यहोवा, नेगेव म पानी के सोता सहीं,

हमर भाग्य ला फेर पलट दे।*126:4 या बंधुवई ले वापिस ले आ

5 जऊन मन आंसू बहात बोथें,

ओमन आनंद के गीत गावत फसल ला लूहीं।

6 जऊन मन बीजा ला बोए बर

रोवत बाहिर निकलथें,

ओमन फसल के बीड़ा लेके

आनंद के गीत गावत लहुंटहीं।