1 हे जम्मो मनखेमन, तुमन ये बात ला सुनव;

ये संसार म रहइया जम्मो झन सुनव,

2 का ऊंच, का नीच,

का धनी, का गरीब, जम्मो कान लगाके सुनव:

3 मोर मुहूं ले बुद्धि के बात निकलही;

मोर हिरदय के मनन-चिंतन ह समझ ले भरे होही।

4 मेंह नीतिबचन कोति अपन कान लगाहूं;

बीना बजात मेंह जनऊला के बात समझाहूं:

5 जब बिपत्ति के दिन आथे, त मेंह काबर डरंव,

जब दुस्ट धोखेबाजमन मोला घेर लेथें—

6 ओ मनखे, जेमन अपन धन ऊपर भरोसा रखथें

अऊ अपन बहुंत संपत्ति ऊपर घमंड करथें?

7 कोनो भी मनखे कोनो आने मनखे के जिनगी के उद्धार नइं कर सकय

या कोनो भी मनखे परमेसर ला ओकर छुड़ौती के दाम नइं दे सकय—

8 जिनगी के छुड़ौती के दाम ह मंहगा होथे,

कोनो भी दाम ओकर बर परयाप्त नो हय—

9 कि ओह सदाकाल तक जीयत रहय

अऊ कबर ला झन देखय।

10 काबरकि जम्मो झन देख सकत हें कि बुद्धिमानमन मरथें,

अऊ मुरूख अऊ अगियानी मनखेमन घलो

अपन धन-संपत्ति ला आने बर छोंड़के मर जाथें।

11 ओमन सोचथें कि ओमन के कबर ह सदाकाल तक ओमन के घर बने रहिही,

पीढ़ी-पीढ़ी तक ओमन के निवास होही,

काबरकि ओमन अपन भुइयां के नांव अपन नांव म रखथें।

12 अपन धन-संपत्ति के बावजूद, मनखे ह हमेसा बने नइं रहय;

ओह पसु जइसन होथे, जऊन ह नास हो जाथे।

13 येह ओमन के दुरभाग्य ए, जेमन अपन ऊपर भरोसा रखथें,

अऊ ओमन के पाछू चलइया मनखेमन के घलो, जेमन ओमन के बात म सहमती देथें।

14 ओमन भेड़मन सहीं अंय अऊ ओमन के मरना निस्चित अय;

मिरतू ह ओमन के चरवाहा होही

(पर सीधवा मनखे ह बिहनियां ओमन ऊपर जय पाही)।

ओमन के सुघर महल ले दूरिहा,

ओमन के देहें ह कबर म सर जाही।

15 पर परमेसर ह मोला मिरतू-लोक ले छोंड़ाही;

खचित, ओह मोला अपन इहां ले जाही।

16 जब आने मन धनी होथें,

जब ओमन के घर के सोभा बढ़थे, त झन डरव;

17 काबरकि जब ओमन मरहीं, त अपन संग कुछू नइं ले जावंय,

ओमन के सोभा ह ओमन के संग कबर म नइं जावय।

18 हालाकि जब ओमन जीयत रहिथें, त अपनआप ला आसीसित समझथें—

अऊ मनखेमन तोर बड़ई करथें जब तेंह उन्नति करथस—

19 ओमन अपन पुरखामन संग मिल जाहीं,

जेमन फेर कभू जिनगी के अंजोर ला नइं देखंय।

20 ओ मनखे जेमन करा संपत्ति होथे, पर समझे के सक्ति नइं होवय,

ओमन ओ पसु सहीं होथें, जेमन नास हो जाथें।