4 मेंह तोर, सिरिप तोर बिरूध म पाप करे हवंव

अऊ ओहीच काम करे हवंव, जऊन ह तोर नजर म पाप ए;

एकरसेति तेंह अपन फैसला म सही अस

अऊ जब नियाय करथस, त सही नियाय करथस।

5 खचित, मेंह जनम ले पापी अंव,

जब मोर दाई ह मोला गरभ म धरिस, तब ले मेंह पापी अंव।

6 तभो ले तेंह हिरदय के सच्चई ले खुस होथस;

तेंह मोला ओ गुपत जगह म बुद्धि सिखाय।

7 जूफा* पऊधा ले मोला साफ कर, अऊ मेंह साफ हो जाहूं;

मोला धो, अऊ मेंह बरफ ले घलो जादा सफेद हो जाहूं।

8 मोला आनंद अऊ खुसी सबद सुनन दे;

जऊन हाड़ामन ला तेंह कुचर दे हस, ओमन आनंद मनावंय।

9 मोर पापमन ले तेंह अपन मुहूं ला छुपा ले

अऊ मोर जम्मो अपराध ला मिटा दे।